FARZANDINGIZNI BOGʻChAGA BERMOQChIMISIZ? Unda davlat xizmatlari markaziga murojaat qiling!

Tumanimizda bugungi kunda 37 ta maktabgacha taʼlim muassasalari faoliyat yuritmoqda.

Oʻtgan yili YuNISEF xalqaro bolalar tashkiloti tomonidan har bir MTM 12 mln. soʻmlik turli oʻyinchoqlar, mebellar, oʻquv-metodik qurollari, oʻyingoh uchun jihozlar bilan taʼminlangani bolajonlar uchun yanada qulay sharoitlar yaratish yoʻlida bir qadam boʻldi.

2018-yildan qishloq joylardagi 22 ta maktabgacha taʼlim muassasalarida qoʻshimcha 4-5 soatli qisqa muddatli guruhlar oʻz faoliyatini boshlagani MTMlarga bolalarni qamrab olish darajasi oshishiga sharoit yaratdi. Bugun bogʻcha yoshidagi bolalarni MTMlarga qamrab olish darajasi 55,7 foizni tashkil etadi.

2018-yilda yana 12 ta nodavlat MTMlar faoliyat boshlashi kutilmoqda. Bu ham oʻz navbatida kichkintoylarimizning munosib sharoitda ulgʻayishi yoʻlidagi gʻamxoʻrlik va eʼtiborning belgisidir.

Prezidentimizning 2017-yil 12-dekabrdagi Farmoniga muvofiq, bolalarini maktabgacha taʼlim muassasasiga topshirmoqchi boʻlgan yurtdoshlarimiz joriy yilning 1-aprelidan boshlab davlat xizmatlari markazlariga murojaat qilishlari lozimligi belgilab qoʻyilgan.

Endilikda MTMlarga qabul faqatgina davlat xizmatlari markazlari orqali amalga oshirilmoqda.

Farzandlarini bogʻcha tarbiyasiga berish niyatida yurgan, shuningdek, ilgari MTMlar maʼmuriyatiga murojaat qilib, navbat kutayotgan ota-onalar endilikda tuman davlat xizmatlari markaziga murojaat qilishlari lozimligini bildiramiz.

Soliya BOBOJONOVA,

tuman MTB mutaxassisi.