AYoL EʼTIBORGA, EHTIROMGA MUNOSIB

Ayol bilan olam munavvar, borliq goʻzal. Jamiyatning har bir jabhasi, har bir sohasida ayol nafosati, uning cheksiz mehri namoyon. Yurtimizdagi ulkan bunyodkorliklar, taraqqiyot va farovonlik ortida ham soʻzsiz, xotin-qizlarning shijoati, fidoyiligi hamda gʻayrati mujassam. Oila va jamiyat hayotida muhim oʻrin va mavqega ega boʻlgan ayol-qizlarni eʼzozlash, ularga hurmat va ehtirom koʻrsatish esa xalqimiz uchun azaliy qadriyatdir.

Amudaryo tumanida ham barcha sohalarda samarali mehnat qilib kelayotgan ayol-qizlar koʻpchilikni tashkil qiladi. Ularning fidokorona mehnatlari sohalarda erishilayotgan yutuqlarda, amalga oshirilayotgan oʻzgarishlarda yaqqol namoyon boʻlmoqda.

Mamlakatimizda xotin-qizlarni har tomonlama qoʻllab-quvvatlash, onalik va bolalikni muhofaza qilish, oila mustahkamligini taʼminlash davlat siyosati darajasidagi ustuvor vazifadir. 

Bugungi kunda Amudaryo tuman aholisining 102 ming 386 nafarini ayol-qizlar tashkil etadi. Yaqinda Vazirlar Mahkamasining “Xotin-qizlar muammolarini oʻrganish va hal etish tizimini yanada takomillashtirish chora-tadbirlari toʻgʻrisida”gi Qaroriga asosan, “Ayollar daftari”ning 4-bosqichi shakllantirildi. Joriy yilgi “Ayollar daftari”ning 4-bosqichi roʻyxatiga kiritish maqsadida oʻtkazilgan xatlovga koʻra, 49 ta mahallaga biriktirilgan ishchi guruhlar tomonidan soʻrovnoma oʻtkazilib, 30 yoshdan yuqori boʻlgan 46 504 nafar muammoli xotin-qizlar borligi aniqlandi.

Sektorlar rahbarlarining taklifiga koʻra, 4-bosqich “Ayollar daftari”ga jami 5 398 nafar xotin-qizlar kiritilishi rejalashtirilgan edi. Shunga muvofiq 1-sektor hududidan  1 189 nafar, 2-sektor  hududidan  1 805 nafar, 3-sektor hududidan  1 446 nafar, 4-sektor hududidan esa 958 nafar, tuman boʻyicha jami 5 398 nafar xotin-qizlar 4-bosqich “Ayollar daftari”ga kiritildi.

Hozirgi kunda ushbu daftarga kiritilgan xotin-qizlar muammolarini bartaraf etishga qaratilgan yoʻl xaritasi belgilab olinib, shunga koʻra chora-tadbirlar amalga oshirilmoqda.

Tumanimizda, oʻtgan davr mobaynida 218 nafar xotin-qizlar reabilitatsiya vositalari bilan taʼminlandi. Mahallalarda tashkil etilgan oʻquv maskanlari hamda 2-sonli kasb-hunar maktabida 345 nafar ishsiz xotin-qizlar qayta kasbga oʻqitildi. Shuningdek, 16 nafar xotin-qizlarning oʻqish uchun shartnoma badallari toʻlab berildi. Undan tashqari, 116 nafar ajrashish yoqasiga kelib qolgan oilalarning 113 nafari yarashtirilishiga erishildi. Bilib-bilmay jinoyat yoʻliga kirib qolgan 3 nafar xotin-qizlar Oila va xotin-qizlar boʻlimining kafilligi asosida qamoq jazosidan saqlab qolindi va sogʻlom turmush tarziga qaytarildi.

Oila va xotin-qizlar boʻlimi huzurida tashkil etilgan “Yoshlarni oilaviy hayotga tayyorlash markazi”da 495 nafar yosh oilalar oʻqitilib, sertifikatlar topshirildi.

Dunyo ayolning cheksiz mehri bilan obod, desak aslo adashmaymiz. Nafaqat oilalarni, balki jamiyatning har bir jabhasini ayol-qizlarimizsiz aslo tasavvur qila olmaymiz. Yuksak muhabbati bilan hayotimizga mazmun kiritib yashayotgan mehridaryo onalarimiz, aziz opa-singillarimiz, lobar qizlarimizning har biri cheksiz eʼtibor, hurmat va ehtiromga loyiq! 8-mart – Xalqaro xotin-qizlar bayrami barchangizga muborak boʻlsin!

Goʻzal Soburova, tuman hokimi oʻrinbosari,

Oila va xotin-qizlar boʻlimi boshligʻi.