“Barkamol avlod” bolalar maktabi toʻgaraklarida shugʻullanayotgan bolalar hoji onaxonlar bilan uchrashdilar

Amudaryo tumani “Barkamol avlod” bolalar maktabi Oʻzbekiston Respublikasi Prezidentining 2019-yil 30-sentyabrdagi “Xalq taʼlimi tizimidagi maktabdan tashqari taʼlim samaradorligini tubdan oshirish chora-tadbirlari toʻgʻrisida”gi Qarori asosida tashkil qilinib, “Barkamol avlod” bolalar markazlari negizida oʻz faoliyatini davom ettirib kelmoqda.

Oʻtgan davr mobaynida maktabda tashkil etilgan toʻgaraklar aʼzolari oʻzlari tanlagan yoʻnalishlari boʻyicha alohida iqtidor va qobiliyatlarini amalda namoyon etishib, tuman, Respublika, hatto Oʻzbekiston miqyosidagi turli koʻrik-tanlovlarda faol ishtirok etishib, sovrindor boʻldilar.

Bugungi kunda maktabda 7 ta yoʻnalish – “Madaniyat va sanʼat”, “Texnika, konstruktorlik va modellashtirish”, “Jismoniy tarbiya va sport”, “Hunarmandchilik va qoʻl mehnati”, “Turizm va ekologiya” hamda “Oliy taʼlim muassasalari va maktabga tayyorlov” yoʻnalishlarida 67 ta toʻgarak maqjud boʻlib, ushbu toʻgaraklarga 1668 nafar oʻquvchi qamrab olingan.

Toʻgaraklar faoliyatini jonlantirish, eng faol, oʻz sohasining bilimdoni boʻlgan toʻgarak rahbarlarining tajribalarini ommalashtirish, yutuqlarini ragʻbatlantirishga qaratilgan chora-tadbirlar natijasida jamoat va nodavlat tashkilotlar bilan hamkorlik tizimli shakllantirilib, toʻgaraklarning faol, iqtidorli oʻquvchilari safi oshib bormoqda.

Maktab 2022-2023 oʻquv yilidan boshlab turli tashkilotlar bilan memorandumlar imzolab, oʻquvchilarning boʻsh vaqtlarini mazmunli tashkil etish bilan bir qatorda tumandagi tashkilotlar bilan ham hamkorlikni yoʻlga qoʻymoqda. Tuzilgan hamkorlik memorandumlari doirasida turli maʼnaviy-maʼrifiy tadbirlar, davra suhbatlari va seminar-treninglar tashkil etilib kelinmoqda.

Ana shunday tadbirlardan biri 25-fevral kuni oʻtkazildi. “Keksalar oʻgiti – hayot maktabi” mavzusidagi ushbu tadbirda Gulasal va Oʻgʻiljon xoji momolar mehmon boʻlishdi. Shu kuni tuman “Mahalla va nuroniylarni qoʻllab-quvvatlash” boʻlimi bilan imzolangan memorandum doirasida hoji onaxonlar ishtirokida “Barkamol avlod” bolalar maktabi hududida “Barkamol avlod bogʻi” ham barpo etildi. Bogʻga turli xil manzarali va mevali daraxt koʻchatlari oʻtqazildi.

Barpo etilgan “Barkamol avlod bogʻi”ga koʻchat ekish tadbirida Gulasal va Oʻgʻiljon hoji onalar oʻquvchi-yoshlarga daraxt ekish, parvarishlash, bogʻ yaratishning xosiyatlari xususida qimmatli masalahatlar va tavsiyalar berdilar.

Tadbir davomida Toʻqish toʻgaragi aʼzolari orasida toʻqish boʻyicha koʻrik-tanlov boʻlib oʻtdi. Unda 21 nafar oʻquvchi-qizlar ishtirok etishdi. Koʻrik-tanlovda mehmon onaxonlar - Gulasal va Oʻgʻiljon hoji momolar ham qatnashdilar va toʻgarak aʼzolari tomonidan toʻqilgan turli xil biri-biridan bejirim kiyim-kechaklar, yumshoq oʻyinchoqlarni koʻrib, oʻquvchi-qizlarning epliligidan mamnun boʻldilar.

Tadbir davomida nuroniy hoji onaxonlar “Barkamol avlod” bolalar maktabining “Shoʻx bolalar” havaskorlik jamoasi tomonidan tayyorlangan kontsert dasturini tomosha qildilar. Ona Vatan, Ayol, baxt va bahorni, doʻstlik va tinchlikni madh etuvchi joʻshqin navolar, shoʻx raqslar barchaga manzur boʻldi.

Robiy YOʻLDOShEVA.