QUTURISh KASALLIGINING OLDINI OLISh BOʻYIChA MAXSUS OʻQUV-TAKTIK MAShQI OʻTKAZILDI

Amudaryoda “Odamlar va hayvonlar oʻrtasida quturish kasalligi tarqalishining oldini olish tadbirlarida Favqulodda vaziyatlarning oldini olish va ularni bartaraf etish davlat quyi tizimi Amudaryo tumani boʻgʻinining hamkorlikdagi harakatlari” mavzusida maxsus-taktik oʻquv mashqi oʻtkazildi.

15-fevral kuni Kuyuk koʻpir ovuli hududida boʻlib oʻtgan ushbu maxsus-taktik oʻquv mashqiga jami 130 ta shaxsiy tarkib va 6 ta texnika jalb qilindi. Mashgʻulot davomida hududda quturish kasalligiga doir favqulodda vaziyat sodir boʻlganida Favqulodda vaziyatlarning oldini olish va ularni bartaraf etish davlat quyi tizimi Amudaryo tumani boʻgʻinining hamkorlikdagi harakatlari amaliy koʻrsatib berildi.

Maxsus-taktik oʻquv mashqi 4 ta bosqichda oʻtkazildi. Birinchi bosqichda ovuldagi 19-sonli maktab binosi oldida tegishli xizmatlarning saf koʻrigi tashkil etildi. Dastlab tuman Favqulodda vaziyatlar boʻlimi boʻlinma boshligʻi, kapitan Bekzod Tajiboyev tegishli Favqulodda vaziyatlarning oldini olish va ularni bartaraf etish davlat quyi tizimi Amudaryo tumani boʻgʻini tomonidan aholi oʻrtasida quturish kasalligi tarqalishining oldini olish va bartaraf qilish boʻyicha kerakli kuch va vositalarning shayligini koʻrikdan oʻtkazdi. Har bir xizmat tomonidan oʻz funktsional vazifalaridan kelib chiqqan holda amalga oshirilishi lozim boʻlgan vazifalar belgilab olindi.

Ikkinchi bosqichda maktab binosining majlislar zalida koʻrgazmali oʻquv seminar boʻlib oʻtdi. Seminarda tuman Favqulodda vaziyatlar boʻlimi boshligʻi oʻrinbosari Salamat Berdekeyev “Aholi oʻrtasida quturish kasalligi tarqalishi bilan bogʻliq favqulodda vaziyatlar yuzaga kelishi xavfi, ularning oldini olish va bartaraf etishda Favqulodda vaziyatlar davlat quyi tizimining ahamiyati” mavzusida maʼruza qildi.

Tuman Sanitariya-epidemiologiya osoyishtalik va jamoat salomatligi boʻlimi shifokori Durbek Bobojonov “Qoraqalpogʻiston Respublikasi hududida quturish kasalligining epidemiologiyasi, etiologiyasi hamda bu borada olib borilayotgan profilaktik tadbirlar” mavzusida maʼruza qilib, tushuntirishlar berdi.

Tuman Tibbiyot birlashmasi Koʻp tarmoqli markaziy poliklinikasi radiolog shifokori Soliy Xolimbetov “Quturish kasalligi patogenezi, klinikasi, davolash va profilaktika usullari” mavzusida soʻz yuritdi. Tuman Veterinariya va chorvachilikni rivojlantirish boʻlimining Kuyuk koʻpir ovulidagi boʻlinmasi mudiri Sanjar Rajabov esa “Qoraqalpogʻiston Respublikasi hududida quturish kasalligi boʻyicha mavjud epizootik vaziyat hamda uning oldini olish borasida olib borilayotgan epizootiyaga qarshi tadbirlar” mavzularida maʼruzalar qildi.

Mashgʻulotning uchinchi bosqichida quturish kasalligiga gumon qilingan bemor aniqlanganda Favqulodda vaziyatlar davlat quyi tuzilmasi xizmatlari tomonidan bajariladigan harakatlar amalda koʻrsatib berildi. Tibbiyot birlashmasida yuqumli kasalliklar shifokori kasallikka gumon qilingan fuqaroni qabul qilib, quturish kasalligiga xos belgilarini aniqladi va bemorga tegishli tibbiy muolajalar qildi. Shundan soʻng, xabarlash tizimiga muvofiq ushbu holat yuzasidan axborot berdi.

Sanitariya-epidemiologiya osoyishtalik va jamoat salomatligi boʻlimi epidemiolog-shifokori bemor jabrlangan hududda epidemiologik anamnez yigʻdi. Veterinariya va chorvachilikni rivojlantirish boʻlimi xodimlari tomonidan bemorga jabr keltirgan hayvon va ushbu hududda saqlanayotgan boshqa uy hayvonlari veterinar tekshiruvidan oʻtkazildi va 10 kunga nazoratga olindi. Shuningdek, bemorga jabr keltirgan hayvonda quturish kasalligi tashxisini qoʻyilganidan soʻng, Obodonlashtirish boshqarmasidan qarovsiz hayvonlarni tutish brigadasi xodimlarining hayvonni ushlashi va nazorat joyiga yetkazishi amalda koʻrsatib berildi.

Soʻnggi bosqichda oʻquv mashgʻulotining yakuni boʻyicha Kuyuk koʻpir ovul fuqarolar yigʻini binosi majlislar zalida yigʻilish oʻtkazildi. Yigʻilishda ishtirokchilarning kamchiliklari koʻrsatilib, kelgusida bunday kamchiliklarga yoʻl qoʻymaslik kerakligi tushuntirildi hamda takliflar tinglanib, fikr-mulohaza almashildi.

H.Matyakubov, tuman FVB boshligʻi.