“BUYuK ShOH VA ShOIR” MAVZUSIDAGI ADABIY-MUSIQIY TADBIR BARChAGA MAʼNAVIY RUH BAGʻIShLADI

Buyuk shoh va shoir Zahiriddin Muhammad Bobur tavallud kuni har yili nafaqat Bobur vatani – Oʻzbekistonda, balki dunyoning juda koʻp mamlakatlarida shoh va shoir zakosiga cheksiz ehtirom sifatida keng nishonlanadi. Mamlakatimizda esa fevral oyining ilk haftasidanoq boshlangan Zahiriddin Muhammad Bobur hayoti va ijodiga bagʻishlangan adabiy-musiqiy, maʼnaviy-maʼrifiy tadbirlar butun fevral oyi davomida koʻtarinki ruhda davom ettiriladi.

Joriy yilning 13-fevral sanasida shoh va shoir Zahiriddin Muhammad Bobur tavalludining 540 yilligi munosabati bilan Prezident taʼlim muassasalari Agentligi tizimidagi Amudaryo Ixtisoslashtirilgan maktabining tantanalar zalida mazkur maktab oʻqituvchi va oʻquvchilar jamoasi bilan Amudaryo tumani madaniyat va turizm boʻlimi hamkorligida maʼnaviy-maʼrifiy, adabiy-musiqiy tadbir boʻlib oʻtdi. “Buyuk shoh va shoir” mavzusida oʻtkazilgan tadbirda Amudaryo tumani turizm va madaniyat boʻlimi xodimlari boʻlim tarkibidagi madaniyat markazlarida faoliyat olib boruvchi toʻgaraklar aʼzolari, Amudaryo Ixtisoslashtirilgan maktabining adabiyotga qiziquvchi oʻquvchi-yoshlari ishtirok etishdi.

Tadbirni maktabning maʼnaviy-maʼrifiy ishlar boʻyicha direktor oʻrinbosari Muyassar Rahmatullayeva ochdi va Bobur ijodiy faoliyati, dunyo xalqlari tomonidan yuksak eʼtirof etilgan, hamon sevib oʻqilayotgan asarlari, bu asarlarning maʼnaviy-maʼrifiy, tarbiyaviy ahamiyati haqida qisqacha maʼlumot berdi.

Betakror shoir, yirik davlat va madaniyat arbobi, zakovatli olim, tarjimon, donishmand tarixchi, mohir sarkarda, yuksak maʼnaviyatli, oilaparvar, elparvar inson Z.M.Bobur juda qisqa, 47-yil umr koʻrdi. U oʻzining 47 yillik hayoti davomida asrlar osha dunyo xalqlarini hayratga solib kelayotgan ijodi bilan hamon millatlar, elatlar, maʼnaviyatga, sheʼriyatga, gʻazaliyotga oshna xalqlar tomonidan yuksak eʼtirofga, eʼtibor va hurmatga sazovor boʻlaoldi.

Shoh va shoir, betakror adib ijodining sarchashmasi hisoblangan memuar asar – “Boburnoma” nafaqat milliy adabiyotimizning noyob durdonalaridan, balki jahon adabiyotining nodir namunalaridan sanaladi. “Boburnoma” oʻsha davr oʻzbek adabiyotining nasr janrida yaratilgan yirik asarlardan biri sifatida muhim oʻrin tutadi. Mazkur qomusiy asar dunyoning 30 dan ortiq tillariga tarjima qilingan va asarning tarjima nusxalari Bobur va boburiylar sulolasiga oid manbalar sifatida jahonning 70 dan ziyod muzeylarida saqlanmoqda.

Tadbirda Ixtisoslashtirilgan maktabning yosh adabiyot ixlosmandlari faqatgina Frantsiyaning Parij shahridagi kutubxonasida saqlanayotgani Bobur qalamiga mansub “Risolayi aruz” asarida aruzning 537 ta vazni haqida soʻz yuritilgan va Bobur bobomiz oʻz fikrini isbotlash niyatida 70 dan ortiq ijodkorlarning asarlaridan misollar keltirganini, shuningdek shoirning yuksak salohiyatli tarjimonligini isbotlovchi “Risolayi volidiya” kitobi haqida faxrlanib soʻz yuritdilar. Shuningdek, oʻquvchilar shoir hayotining muayyan yillari bilan bogʻliq boʻlgan va bizgacha yetib kelgan 400 dan ortiq lirik asarlari, shundan 119 ta gʻazal, 231 ta ruboiy, tuyuq, masnaviy va qitʼalari xususida maʼlumotlar berdilar.

Tadbirning adabiy-musiqiy qismida oʻquvchi-yoshlar Zahiriddin Muhammad Bobur ijodidan namunalar oʻqidilar, shoir gʻazallari, ruboiy va tuyuqlarini yoddan aytishib, ularning maʼnolari, maʼnaviy-maʼrifiy ahamiyati haqida oʻz fikrlarini bildirdilar. Ayniqsa, maktab oʻquvchilari talqinidagi Bobur hayoti va ijodi haqidagi sahna koʻrinishlari tadbir ishtirokchilariga maʼnaviy ruh bagʻishladi.

Shuningdek, tadbirda Amudaryo tumani turizm va madaniyat boʻlimi sanʼatkorlari tomonidan Bobur gʻazallari asosida tayyorlangan. “Mumtoz navolar” kontsert dasturi ham namoyish etildi. Soʻz va navo uygʻunligida oʻtkazilgan “Buyuk shoh va shoir” mavzusidagi tadbir barchaga maʼnaviy ruh bagʻishladi.

Robiya YOʻLDOShEVA.