TADBIRKORLAR EʼTIBOR MARKAZIDA

Tumanimizda faoliyat yuritayotgan «Jayxun ilhomlari» nodavlat notijorat tashkiloti tomonidan “Besh tashabbus – besh imkoniyat!” nomli grant loyihasi asosida yoshlar maʼnaviyatini yuksaltirish, ularning iqtidorlarini keng ommaga tanishtirish, yoshlarni turli zararli illatlardan ishonchli himoya qilish, ularning ish bilan bandligini taʼminlash maqsadida tadbirlar, uchrashuvlar oʻtkazilmoqda.

“Yoshlar daftari”ga kiritilgan voyaga yetmaganlarni, “Temir daftar”ga kiritilgan oilalarning hamda “Ayollar daftari”ga kiritilgan onalarning farzandlarini “Besh muhim tashabbus” doirasidagi tadbirlarga faol jalb qilish maqsadida joylarda tushuntirish ishlari olib borilmoqda.

Ayniqsa beshinchi tashabbus doirasida yosh ayol-qizlarni ishga joylashtirish maqsadida uchrashuvlar tashkil qilinib, oʻzini oʻzi band qilgan va tadbirkorlik bilan shugʻullanib, daromad topayotgan yosh ayol-qizlarning ish tajribalarini ommalashtirishga ulkan eʼtibor qaratilmoqda.

Mangʻit shahridagi Boyovul mahallasida oʻzini-oʻzi band qilgan holda uy sharoitida mehnat qilib, daromad topayotgan ayol-qizlar koʻplab topiladi.

Mahallada ayol-qizlarning bandligi taʼminlanishi bilan bir qatorda osoyishtalikni saqlash, koʻcha va xonadonlarning ozodaligiga erishish, toʻy-marakalarni ixcham-tartibli oʻtkazish, yordamga muhtoj insonlarga har tomonlama koʻmaklashish borasida ham ijobiy ishlar qoʻlga olinmoqda.

2022-yil davomida mazkur muammolar hal etilib, bu yilgi ish rejalari ham koʻzda tutilganidek olib borilmoqda.

Mahalladagi “Oqila ayollar harakati” tomonidan ham rejali ish asosida turli tadbirlar oʻtkazilib kelinmoqda.

Mahallada yashovchi ijtimoiy himoyaga muhtoj 72 nafar ayol-qizlar “Ayollar daftari”ga kiritilgan. Ulardan 24 nafari ishsiz ayol-qizlar boʻlib, 8 nafari tadbirkorlik bilan shugʻullanish istagini bildirishgan. Ularga mahalladagi hokim yordamchisining tavsiyasi bilan imtiyozli kreditlar olib berildi. Hozirgi kunda bu tadbirkor ayollar oʻzlarining ish faoliyatlarini yurgizish bilan bir qatorda, mahallada ishsiz yurgan 2-3 nafar ayol-qizlarning bandligini ham taʼminladilar.

Kasb-hunar oʻrganish istagini bildirgan 5 nafar ayol-qizlar kasbga oʻqitish markazida oʻqib kelib, ish faoliyati olib bormoqdalar.

Tadbirkor ayol-qizlarning ana shunday saʼy-harakatlari tufayli mahallada turli xizmat koʻrsatish shoxobchalari, oshxona, oziq-ovqat doʻkonlari, tikuvchilik ustaxonalari muntazam ishlab mahalla ahliga sifatli xizmat koʻrsatib kelmoqda. Imtiyozli kredit asosida ish boshlagan Gulasal Rajabovaning oziq-ovqat doʻkonida uy-roʻzgʻor buyumlari, oziq-ovqat mahsulotlari sotilmoqda. Sifatli oziq-ovqat mahsulotlari xaridorlar tomonidan minnatdor holda xarid qilinmoqda.

Tadbirkor ayol doʻkonni kengaytirib, yangidan imorat qurish evaziga oziq-ovqat turlarini koʻpaytirish niyatida.

Tadbirkor Muborak Rajabova esa tikuvchilik tsexi ochib, ikki nafar shogirdi bilan ish olib bormoqda. Tajribali tikuvchi tomonidan bejirim kiyimlar har bir buyurtmachining istagi-didi asosida tikilmoqda. Tikuvchi qizlarga subsidiya asosida yangi tikuv mashinalarini olib berish rejalashtirilgan.

Mahallada tadbirkor ayol-qizlarning izdoshlari kundan-kunga koʻpayib bormoqda.

Oʻrozali REYIMOV, “Jayxun ilhomlari” NNT raisi.