TOʻLQIN OVULIDA "QIShLOQ XOʻJALIGI XODIMLARI SALOMATLIGI OYLIGI" DOIRASIDA TIBBIY KOʻRIK TAShKIL ETILDI

Sogʻliqni saqlash vazirligi tashabbusi bilan mamlakatimizda 1-fevraldan 1-martgacha “Qishloq xoʻjaligi xodimlari salomatligi oyligi” aktsiyasi joriy etilib, hududlarda oylik doirasidagi tadbirlar boshlab yuborildi. Amudaryo tumanida ham aktsiya doirasida oylik davomida turli tadbirlarni tashkil etish rejalashtirildi.

4-fevral kuni Toʻlqin ovulida aktsiya doirasida hududdagi fermerlar, dehqon, bogʻbonlar, klaster xodimlari va ularning oila aʼzolari uchun tibbiy koʻrik oʻtkazildi. Shu kuni erta tongdan tuman Tibbiyot birlashmasiga qarashli Tulkin oilaviy shifokorlik punkti binosi fermer xoʻjaligi ishchilari va boshqa agrar soha vakillari, ularning oila aʼzolari bilan gavjum boʻldi.

Mazkur tibbiyot maskanida tuman Tibbiyot birlashmasining kardiolog, akusher-ginekolog, endokrinolog, ultratovush tekshiruvi kabi mutaxassis-shifokorlari hamda oilaviy shifokorlar ishtirokidagi tibbiy koʻrik boshlab yuborildi. Ovuldagi qishloq xoʻjaligi xodimlari EKG, laborator tekshiruvlari, profilaktik va chuqurlashtirilgan tibbiy koʻriklar hamda skriningdan oʻtkazildi.

Tibbiy koʻrik jarayonida kardiolog shifokor tomonidan 25 nafar fuqaroda, endokrinolog shifokor tomonidan 35 nafar fuqaroda kasalliklar aniqlandi. Shundan 7 nafariga birlamchi kasallik tashxisi qoʻyildi. Akusher-ginekolog koʻrigidan 50 nafar tugʻish yoshidagi ayollar koʻrikdan oʻtkazildi, bolalar shifokori tomonidan 1 yoshdan 18 yoshgacha boʻlgan 51 nafar bolalar koʻrilib, 3 nafarida kasallik aniqlandi. Ularga salomatligini tiklash, sogʻlomlashtirish va salomatligini mustahkamlash maqsadida ambulator va statsionar davolanish muolajalari tavsiya qilindi. Shuningdek, qoʻshimcha 103 nafar fuqaro ultratovush tekshiruvi, 25 nafari EKG tekshiruvlaridan oʻtkazildi.

Aktsiya doirasida tibbiy koʻrikka tashrif buyurgan ovul fermerlari, dehqon va bogʻbonlar, klaster xodimlari va ularning oila aʼzolariga tuman Tibbiyot birlashmasi valeolog shifokori, ovuldagi oilaviy shifokorlik punkti shifokorlari, patronaj hamshiralar tomonidan tibbiy koʻrikdan oʻtishning ahamiyati toʻgʻrisida keng tushunchalar berildi. Shuningdek, tibbiyot xodimlari kun tartibiga amal qilish, sogʻlom turmush tarzi, sogʻlom ovqatlanish, sogʻlom turmush asosi boʻlgan jismoniy faollikni odatga aylantirish kabilarning salomatlikni asrashdagi ahamiyati toʻgʻrisida batafsil maʼlumotlar berib oʻtishdi.

Undan tashqari, suhbatlar oʻtkazilib, ishtirokchilarning tibbiyotga, kasalliklarning oldini olishga doir savollariga toʻliq javoblar berildi. Tibbiyot xodimlari tomonidan mavsumiy va yuqumli kasalliklarning oldini olish, sogʻlom turmush tarziga rioya qilish kabi mavzulardagi bukletlar, eslatmalar ham tarqatildi. Tadbirda namoyish etilgan videoroliklar orqali ham oʻz sogʻligiga eʼtiborsiz boʻlish, sogʻlom turmush tarziga amal qilmaslik, kamharakatlilik va tartibsiz ovqatlanish, sifatsiz yarim tayyor mahsulotlarni isteʼmol qilish hamda zararli odatlarga berilishning salbiy oqibatlari koʻrsatib berildi.

Ovuldagi qishloq xoʻjaligi mehnatkashlari oʻzlarining salomatliklarini asrashga qaratilgan bunday eʼtibor va gʻamxoʻrlik uchun tibbiyot xodimlariga oʻz minnatdorchiliklarini bildirishdi.

 J. Yavkashev, tuman TTB tashkiliy-uslubiy boʻlimi mudiri.