ТЎЛҚИН ОВУЛИДА "ҚИШЛОҚ ХЎЖАЛИГИ ХОДИМЛАРИ САЛОМАТЛИГИ ОЙЛИГИ" ДОИРАСИДА ТИББИЙ КЎРИК ТАШКИЛ ЭТИЛДИ
Соғлиқни сақлаш вазирлиги ташаббуси билан мамлакатимизда 1 февралдан 1 мартгача “Қишлоқ хўжалиги ходимлари саломатлиги ойлиги” акцияси жорий этилиб, ҳудудларда ойлик доирасидаги тадбирлар бошлаб юборилди. Амударё туманида ҳам акция доирасида ойлик давомида турли тадбирларни ташкил этиш режалаштирилди.
4 февраль куни Тўлқин овулида акция доирасида ҳудуддаги фермерлар, деҳқон, боғбонлар, кластер ходимлари ва уларнинг оила аъзолари учун тиббий кўрик ўтказилди. Шу куни эрта тонгдан туман Тиббиёт бирлашмасига қарашли Тулкин оилавий шифокорлик пункти биноси фермер хўжалиги ишчилари ва бошқа аграр соҳа вакиллари, уларнинг оила аъзолари билан гавжум бўлди.
Мазкур тиббиёт масканида туман Тиббиёт бирлашмасининг кардиолог, акушер-гинеколог, эндокринолог, ультратовуш текшируви каби мутахассис-шифокорлари ҳамда оилавий шифокорлар иштирокидаги тиббий кўрик бошлаб юборилди. Овулдаги қишлоқ хўжалиги ходимлари ЭКГ, лаборатор текширувлари, профилактик ва чуқурлаштирилган тиббий кўриклар ҳамда скринингдан ўтказилди.
Тиббий кўрик жараёнида кардиолог шифокор томонидан 25 нафар фуқарода, эндокринолог шифокор томонидан 35 нафар фуқарода касалликлар аниқланди. Шундан 7 нафарига бирламчи касаллик ташхиси қўйилди. Акушер-гинеколог кўригидан 50 нафар туғиш ёшидаги аёллар кўрикдан ўтказилди, болалар шифокори томонидан 1 ёшдан 18 ёшгача бўлган 51 нафар болалар кўрилиб, 3 нафарида касаллик аниқланди. Уларга саломатлигини тиклаш, соғломлаштириш ва саломатлигини мустаҳкамлаш мақсадида амбулатор ва стационар даволаниш муолажалари тавсия қилинди. Шунингдек, қўшимча 103 нафар фуқаро ультратовуш текшируви, 25 нафари ЭКГ текширувларидан ўтказилди.
Акция доирасида тиббий кўрикка ташриф буюрган овул фермерлари, деҳқон ва боғбонлар, кластер ходимлари ва уларнинг оила аъзоларига туман Тиббиёт бирлашмаси валеолог шифокори, овулдаги оилавий шифокорлик пункти шифокорлари, патронаж ҳамширалар томонидан тиббий кўрикдан ўтишнинг аҳамияти тўғрисида кенг тушунчалар берилди. Шунингдек, тиббиёт ходимлари кун тартибига амал қилиш, соғлом турмуш тарзи, соғлом овқатланиш, соғлом турмуш асоси бўлган жисмоний фаолликни одатга айлантириш кабиларнинг саломатликни асрашдаги аҳамияти тўғрисида батафсил маълумотлар бериб ўтишди.
Ундан ташқари, суҳбатлар ўтказилиб, иштирокчиларнинг тиббиётга, касалликларнинг олдини олишга доир саволларига тўлиқ жавоблар берилди. Тиббиёт ходимлари томонидан мавсумий ва юқумли касалликларнинг олдини олиш, соғлом турмуш тарзига риоя қилиш каби мавзулардаги буклетлар, эслатмалар ҳам тарқатилди. Тадбирда намойиш этилган видеороликлар орқали ҳам ўз соғлигига эътиборсиз бўлиш, соғлом турмуш тарзига амал қилмаслик, камҳаракатлилик ва тартибсиз овқатланиш, сифатсиз ярим тайёр маҳсулотларни истеъмол қилиш ҳамда зарарли одатларга берилишнинг салбий оқибатлари кўрсатиб берилди.
Овулдаги қишлоқ хўжалиги меҳнаткашлари ўзларининг саломатликларини асрашга қаратилган бундай эътибор ва ғамхўрлик учун тиббиёт ходимларига ўз миннатдорчиликларини билдиришди.
Ж. Явкашев, туман ТТБ ташкилий-услубий бўлими мудири.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
