DARYoBOʻYI MAHALLASIDA HOKIM VA YoShLAR UChRAShUVI SAMIMIY MULOQOT TARZIDA OʻTDI

Bugungi yoshlar – mamlakat iqtisodiyoti, siyosiy-maʼnaviy, ijtimoiy va madaniy hayotining ertangi kungi qudratli lokomativlaridir. Bu haqda Prezidentimiz har galgi uchrashuvlarida ham faxr, ham ishonch bilan taʼkidlashlari bejiz emas. Shu bois, mamlakatimizda yoshlarning bilim olishlari, oʻz qobiliyat va iqtidorlarini amalda namoyon etishlari uchun barcha zarur sharoitlar, imkoniyatlar yaratilgan.

Mamlakat rahbaridan tortib, quyi boʻgʻin rahbarlarigacha yoshlar hayotiga oid muammolarni oʻrganish, mavjud muammolarni joylariga chiqqan holda ijobiy hal etishga koʻmaklashish maqsadida oʻtkazilayotgan yoshlar bilan uchrashuvlar, davra suhbatlari samimiy muloqot maydoniga aylanmoqda.

Joriy yilning 2-fevral sanasida boʻlib oʻtgan Amudaryo tumani hokimi Sultonboy Yoʻldashev bilan Daryoboʻyi mahallasi yoshlarining uchrashuvi ham shaffoflik, oshkorolik va samimiy muloqot ruhida oʻtdi.

Hokim va yoshlar uchrashuvida Amudaryo tumani hokimi Sultonboy Yoʻldashev, tuman hokimning sohalar boʻyicha oʻrinbosarlari, Yoshlar agentligi mutaxassislari, Daryoboʻyi mahalla fuqarolar yigʻini hamda hududdagi idora va tashkilotlar rahbarlari, mahalla faollari hamda yoshlar, OAV vakillari ishtirok etdilar.

Uchrashuvda tuman hokimi Sultonboy Yoʻldoshev mamlakatimizda, shu jumladan tumanimizda yoshlarning intillektual salohiyatini yuksaltirish, yoshlar tadbirkorligini rivojlantirish orqali ish bilan bandligini taʼminlash, «bir nuroniyga oʻn yosh» tamoyili asosida yoshlar hayotiga doir muammolarni hal etishga qaratilgan chora-tadbirlar, yaratilayotgan shart-sharoitlar xususida toʻxtalib, Arna boʻyi mahallasi hududida istiqomat qiluvchi yoshlar orasidan yetishib chiqayotgan tadbirkorlar, fermer xoʻjaliklari rahbarlari, nufuzli oliy taʼlim dargohlari talabalari haqida faxrlanib soʻz yuritdi.

Hokim yoshlar bilan uchrashuv davomida hududdagi muammoli yoshlarning murojaatlari bilan yaqindan tanishib, ular bilan samimiy muloqotda boʻldi. Xususan, 1995-yilda tugʻilgan Sirojiddin Ametov oʻzini-oʻzi band qilish tamoyili asosida tadbirkorlik bilan shugʻullanish istagida ekanligini bildirib, buning uchun imtiyozli kredit mablagʻi olishda yordam soʻrab murojaat qildi. Uning murojaati joyida oʻrganilib, mahallada faoliyat olib boruvchi hokim yordamchisining koʻmagi bilan amaliy yordam koʻrsatish choralari koʻrildi.

Shuningdek, 2002-yilda tugʻilgan Ruslan Alimboyevning murojaati ham ijobiy yechim topdi. OTM talabasi boʻlgan Ruslan Alimboyevga toʻlov-shartnoma boʻyicha mablagʻining bir qismini toʻlab berishda amaliy yordam koʻrsatiladigan boʻldi.

Mahallada istiqomat qiluvchi, 1995-yilda tugʻilgan Islom Oʻrozboyevning toza ichimlik suvi inshooti joylashgan hududdan ancha olisda yashashini, shu bois, oila aʼzolarining toza ichimlik suvi bilan taʼminlanishida muammo borligini, bu masalada yordamga muhtoj ekanligini bildirib qilgan murojaati ham tuman hokimining topshirigʻi va mahallada faoliyat olib boruvchi hokim yordamchisining amaliy yordami bilan suvni tozalash uskunasi olib berish orqali ijobiy hal etildi.

Daryoboʻyi mahalla fuqarolar yigʻinida boʻlib oʻtgan hokim va yoshlar uchrashuvi davomida mahalla yoshlari mamlakatimizda, xususan, tumanimizda ham yoshlar hayotiga oid muammoli masalalar doimiy nazoratga olinib, ijobiy yechim topayotganidan mamnun ekanliklarini bildirdilar.

Robiya YOʻLDOShEVA.