MAKTABLAR AMALIYoTChI PSIXOLOGLARI IShTIROKIDA YIGʻILISh OʻTKAZILDI

Maktab sinfxonasida oʻtirgan har bir oʻquvchi har xil oilaviy muhitda tarbiya topgan, turlicha xarakterga ega boʻlishini inobatga olsak, oʻqituvchi ularga fan asoslarini chuqur oʻrgatishi, darslarni hamma oʻquvchi ham oʻzlashtira olishiga erishishi ancha murakkab jarayon ekanligi ravshan boʻladi. Chunki bola maktab yoshiga yetgan vaqtida uning shaxsiy xususiyatlari, dunyoqarashi va xarakteri ancha shakllangan boʻladi.

Mamlakatimizdagi umumiy oʻrta taʼlim maktablarida faoliyat olib borayotgan amaliyotchi psixologlar bu borada fan oʻqituvchilariga yaqin koʻmakdosh boʻladi. Ular oʻzi ishlayotgan muassasada oʻquvchilar va ustozlar orasida doʻstona munosabat oʻrnatilishi, oʻquvchilarda oʻz maktabiga, ustozlariga, sinfdoshlariga hurmat hissini tarbiyalashga masʼuldirlar. Shuningdek, oʻquvchilar rivojlanishiga toʻsqinlik qiluvchi omillar bor yoki yoʻqligini aniqlaydi va psixologik yordam beradi. Pedagogik jamoa bilan mavjud muammolarni hal etish choralarini koʻradi.

Maktab psixologi oʻquvchilar shaxsining individual xususiyatlarini inobatga olib, ularning izlanishini, intilishlarini qoʻllab-quvvatlaydi va salohiyatli boʻlib voyaga yetishiga koʻmaklashadi.

Shu yilning 30-yanvarida Mangʻit shahridagi 38-sonli maktabda tumanimizdagi umumiy oʻrta taʼlim maktablarida mehnat qilayotgan amaliyotchi psixologlari uchun yigʻilish boʻlib oʻtdi. Unda maktablar amaliyotchi psixologlaridan tashqari tuman xotin-qizlar qoʻmitasi raisi Goʻzal Soburova, tuman Tibbiyot birlashmasi shifokori Gulbahor Oʻroimbetova, tuman Xalq taʼlimi boʻlimi metodist psixologlari Tatyana Pirlepesova, Nurbek Seyitboyevlar ishtirok etdilar.

Yigʻilishda umumiy oʻrta taʼlim maktablarida taʼlim-tarbiya sifatini oshirishda, oʻquvchilar intillektual salohiyatini oshirishda psixologlarning pedagogik jamoaga yordamini bugungi kun talablari darajasida tashkil etish, yosh avlod tarbiyasida masʼuliyatini oshirish masalalari muhokama etildi.

Tadbirda ushbu mavzuda tuman hokimi oʻrinbosari, xotin-qizlar qoʻmitasi raisi Goʻzal Soburova, maktab oʻquvchilarida yoshga doir sodir boʻladigan oʻzgarishlar, ulardagi bu oʻzgarishlarga oqilona munosabatda boʻlishning ahamiyati xususida tuman Tibbiyot birlashmasi shifokori Gulbahor Oʻrozimbetova, maktablar amaliyotchi psixologlarning taʼlim sifatini oshirish yoʻlida olib borayotgan ishlari xususida tuman Xalq taʼlimi boʻlimi metodist psixologi Tatyana Pirlepesovalar maʼruza qildilar.

Shuningdek, yigʻilish kun tartibidagi masalalar yuzasidan 84-sonli maktab amaliyotchi psixologi Nigora Saparova, 11-sonli maktab amaliyotchi psixologi Dilnoza Shomurodovalar ham oʻz fikr-mulohazalarini bildirdilar.

Yigʻilishida voyaga yetmaganlar orasida noxush holatlar sodir boʻlishining oldini olish, huquqbuzarliklar sodir etilishiga yoʻl qoʻymaslik, oʻquvchilar eʼtiborini taʼlim olish, fan asoslarini chuqur egallashga jalb etish borasida maktablar amaliyotchi psixologlarining oʻrni muhim ekanligi taʼkidlandi.

Oygul RAJABOVA.