“Besh tashabbus – yoshlarga qanot” loyihasi doirasida oʻtkazilgan insholar tanlovi gʻoliblari ragʻbatlantirildi

Prezidentimiz tomonidan yoshlar hayotiga keng joriy etilgan besh muhim tashabbus doirasida amalga oshirilayotgan keng qamrovli maʼnaviy-maʼrifiy tadbirlar yoshlarning ijtimoiy faolligini oshirish, oʻz qobiliyatlarini amalda namoyon etishlari uchun ulkan imkon eshiklarini ochib berganligi blian muhim ahamiyat kasb etmoqda. Bu borada “Mening oilam” gazetasi tahririyati ijodiy jamoasi tomonidan amalga oshirilayotgan ishlar eʼtiborga molik.

Tahririyat Oʻzbekiston Respublikasi Oliy Majlisi huzuridagi nodavlat notijorat tashkilotlari va fuqarolik jamiyatining boshqa institutlarini qoʻllab-quvvatlash jamoat fondi tomonidan moliyalashtirilgan “Nogironligi boʻlgan shaxslarni ijtimoiy-maʼnaviy qoʻllab-quvvatlash” mavzusidagi tanlovning “Nogiron yoshlar orasida besh tashabbus tamoyillarini keng joriy etish, ularni ijtimoiy-maʼnaviy yuksaltirish” yoʻnalishida “Besh muhim tashabbus – yoshlarga qanot” loyihasi bilan ishtirok etib, mazkur fondning grant sohibi boʻlgan edi.

Gazeta tahririyati tomonidan besh muhim tashabbus doirasida oʻquv muassasalarida maʼnaviy-maʼrifiy tadbirlar tashkil etilib, unda nogironligi boʻlgan oʻquvchi-yoshlarning faol ishtiroki taʼminlanmoqda.

Joriy yilning yanvar oyi davomida birinchi tashabbus doirasida nogironligi boʻlgan yoshlarning adabiyotga boʻlgan qiziqishini oshirish va isteʼdodlarini yuzaga chiqarish maqsadida “Men oʻqigan asar qahramoni” mavzusida insholar tanlovi oʻtkazildi. Insholar tanlovida Amudaryo tuman Xalq taʼlimi  boʻlimi tasarrufidagi umumtaʼlim maktablarining nogironligi boʻlgan, uyda taʼlim olayotgan 20 nafarga yaqin oʻquvchi-yoshlari ishtirok etishdi.

“Besh tashabbus – yoshlarga qanot” loyihasi doirasidagi insholar tanlovini oʻtkazuvchi hakamlar hayʼati aʼzolarining xulosasiga koʻra, 20-sonli maktab oʻquvchisi Sanʼatbek Rajabov qiyinchiliklarga sabr-bardoshli boʻlishga undovchi fikrlari uchun 1-oʻringa munosib koʻrildi. 65-sonli maktab oʻquvchisi Sevara Safarboyeva yozgan insho xalq ogʻzaki ijodiga cheksiz mehri uchun hamda 13-sonli umumtaʼlim maktabining 10-sinf oʻquvchisi Sevara Xolboyeva ona yurtga muhabbat tuygʻusi ulugʻlangan asar qahramonining  fazilatlarini keng yoritgani uchun 2-oʻringa, 42-sonli maktab oʻquvchisi Kumushoy Quvvatova A.Navoiy dahosiga mehr tuygʻusi uchun, 5-sonli maktab oʻquvchisi Bunyodbek Tojiboyev, 2-sonli maktab oʻquvchisi Xursand Sobirov yozgan insholar esa yovuzlikka nafrat, yaxshilik va ezgulikni ulugʻlash toʻgʻrisidagi fikrlari bilan madaniyatli kitobxon yoʻnalishida 3-oʻringa munosib koʻrildi.

Shuningdek,50-sonli maktab oʻquvchisi Gulnoza Yursinova, 32-sonli maktab oʻquvchisi Zafar Primbetov, 42-sonli maktab oʻquvchisi Ogʻabek Toʻraboyev, 10-sonli maktabdan Tursunoy Murodova, Shahzoda Bozorboyeva, 2-sonli  maktabdan Alibek Bekchanov, 11-sonli maktabdan Oxunjon Gulmirzayev, 11-sonli maktabdan Sohiba Hayitboyeva, Jasurbek Yoʻldoshev, Asadbek Baxtovlar yozgan insholar toʻgʻrilik va rostgoʻylik, tabiatga, hayvonot dunyosiga  mehr tuygʻulari ulugʻlangan insholar sifatida eʼtirof etildi.

Barcha yoʻnalishlar boʻyicha gʻoliblar “Mening oilam” gazetasi tahririyati tomonidan ragʻbatlantirilib, sovgʻalar taqdim etildi.

Robiya YOʻLDOShEVA.