Gripp va oʻtkir respirator infektsiyalarning oldini olishga bagʻishlangan targʻibot tadbirlari olib borilmoqda

Sanitariya-epidemiologik osoyishtalikni taʼminlash, hududga yuqumli infektsiyalar kirib kelishi, tarqalishining oldini olish maqsadida Amudaryo tumani Sanitariya-epidemiologik osoyishtalik va jamoat salomatligi boʻlimi tomonidan qator chora-tadbirlar amalga oshirilib kelinmoqda.

Shuningdek, Sogʻliqni saqlash vazirligining 2022-yil 19 sentyabdagi “Respublikada COVID-19 pandemiyasi davrida gripp va oʻtkir respirator infektsiyalar boʻyicha 2022-2023-yillar mavsumida xalq orasida epidemiologik asoyishtalikni taʼminlash yuzasidan amalga oshiriladigan chora-tadbirlar haqida”gi buyrugʻi ijrosini taʼminlash maqsadida ham Amudaryo tumani Sanitariya-epidemiologik osoyishtalik va jamoat salomatligi boʻlimi qoshida tumanda gripp va oʻtkir respirator infektsiyalarning aholi oʻrtasida epidemiya tarzida tarqalib ketishining oldini olish boʻyicha shtab tashkil qilinib, ular tomonidan epidemiologik vaziyatning rivojlanishi boʻyicha kundalik monitoring yuritilmoqda.

Undan tashqari, boʻlim tomonidan barcha davolash-profilaktika mussasalarida va epidemiologik ahamiyatga ega boʻlgan boshqa obektlarda profilaktik, cheklov va epidemiyaga qarshi chora-tadbirlarning amalga oshirilishi boʻyicha oʻrnatilgan tartibda nazorat yoʻlga qoʻyilib, gripp kasalligi tarqalishining oldini olish boʻyicha turli uchrashuvlar, davra suhbatlari oʻtkazilib kelinmoqda.

25-yanvar kuni Amudaryo tumanining Gulzor mahallasi hududidagi 40-sonli maktabgacha taʼlim tashkilotida ham mana shunday uchrashuv oʻtkazilib, xodimlar uchun tushuntirish-targʻibot ishlari olib borildi.

Boʻlimning oliy toifali epidemiolog vrachi Mirzabek Amankulov Amudaryo tumani Sanitariya-epidemiologik osoyishtalik va jamoat salomatligi boʻlimi tomonidan 2022-2023-yillar mavsumi oldidan gripp kasalligiga qarshi emlanishi lozim boʻlgan kontingentlar aniqlanib, gripp kasalligiga qarshi 16 ming 918 doza profilaktik vaktsina olib kelinganini, vaktsinalar tuman tibbiyot birlashmasiga qarashli barcha koʻp tarmoqli markaziy poliklinikalar, oilaviy poliklinikalar, oilaviy shifokorlik punktlariga tarqatilganini taʼkidlab oʻtdi. Ushbu vaktsinalar bilan 4 ming 147 nafar maktab oʻqituvchilari, 1300 nafar maktabgacha taʼlim tashkilotlari tarbiyachilari, 1886 nafar tibbiyot xodimlari, 9585 nafar davlat maktabgacha taʼlim tashkilotlarida tarbiyalanuvchi bolalar gripp kasalligiga qarshi toʻliq emlangan.

Shuningdek, gripp va oʻtkir respirator infektsiyasi kasalliklariga gumon qilingan bemorlar aniqlanganda, ularga davolash-profilaktika muassasalari tomonidan malakali tibbiy yordamlar koʻrsatilib, tez yordam xizmati uzluksiz ravishda xizmat koʻrsatayotgani, dori-darmonlar va virusga karshi preparatlar zahirasi yaratilgani taʼkidlandi.

Qolaversa, xodimlar gripp virusini yuqtirgan odamda kuzatiladigan holatlar bilan ham tanishtirildi. Qayd etilganidek, kasallik toʻsatdan boshlanganda harorat 38-40 darajagacha koʻtariladi, quvvatsizlik, bosh ogʻrishi va mushaklarda, koʻz olmalarini bosganda va ular harakatlanganda ogʻriqlar, tomoq qurishi va qichishi, burun bitishi va quruq yoʻtal kuzatiladi.

Oliy toifali shifokor Mirzabek Amankulov kasallik yuqqandan keyin uy sharoitida davolanish boʻyicha rioya qilinishi lozim boʻlgan qoidalar xususida ham maʼlumot berdi.

Kasallik yuqsa, uyda qolib, yotoq tartibiga rioya qilish va hududiy shifokorni uyga chaqirish lozim. Shaxsiy gigiyena qoidalariga rioya qilish, qoʻllarni tez-tez sovunlab yuvish, xonani muntazam shamollatib turish, shaxsiy sochiq va idishlardan foydalanish hamda koʻproq suyuqlik ichish zarurligi taʼkidlandi.

Maktabgacha taʼlim tashkiloti xodimlari oliy toifali shifokorga oʻzlarini qiziqtirgan savollar bilan murojaat qilib, tegishli javoblar olishdi.

Tuman hokimligining Axborot xizmati