Qipchoq ovulida hokim yordamchisi aholiga hisobot berdi

24-yanvar kuni Amudaryo tumani 1-sektor hududidagi Qipchoq ovul fuqarolar yigʻinida hokim yordamchisi sifatida oʻz ish faoliyati olib borayotgan Maʼmurjon Temirboyev ovul vakillariga oʻtgan 2022-yil davomida amalga oshirgan ishlari hamda 2023-yilga moʻljallangan rejalari hususida hisobot berdi.

Yigʻilishda Mahallabay ishlash va tadbirkorlikni rivojlantirish agentligi Koraqalpogʻiston Respublikasi boshqarmasi bosh yuriskonsulti Aydos Seytkamalov hamda Murojaatlar bilan ishlash buyicha boʻlim boshligʻi Berdax Umirbayev, Amudaryo tumani Mahallabay ishlash va tadbirkorlikni rivojlantirish markazi direktori Siroj Oʻrazmatovlar ishtirok etishdi.

Hokim yordamchisi oʻtgan 2022-yil davomida mahalla infratuzilmasini yaxshilash, aholi bandligini taʼminlash hamda aholini tadbirkorlikka keng jalb etish maqsadida salmoqli ishlarni amalga oshirdi.

Jumladan, 635 ta xonadonda istiqomat qiluvchi 3764 nafar aholi orasidan ishsiz, ijtimoiy himoyaga muhtoj, doimiy daromad manbaiga ega boʻlgan, ammo qoʻshimcha daromad topishni istayotgan oilalar aniqlandi. Hokim yordamchisining koʻmagi bilan 56 nafar fuqaroga imtiyozli kreditlar ajratildi.

Shuningdek, doimiy daromad manbaiga ega lekin qoʻshimcha daromad topish istagidagi fuqarolarning 5 nafari issiqxona, 17 nafari tikuvchilik, 4 nafari asalarichilik, 3 nafari parrandachilik, 6 nafari chorvachilik, 21 nafari xizmat koʻrsatish yoʻnalishlari boʻyicha oʻz tadbirkorlik faoliyatini yoʻlga qoʻyishdi. Undan tashqari, 11 nafar ijtimoiy himoyaga muhtoj fuqarolarga subsidiya ajratildi.

Umuman olganda, hokim yordamchisi tomonidan 2022-yil davomida Qipchoq ovuli hududida katta ijobiy oʻzgarishlar amalga oshirildi. Xususan, 14 ta yangi tadbirkorlik subʼektlari barpo etildi, 120 nafar fuqaroning bandligi taʼminlandi. Ushbu fuqarolarning oʻrtacha oylik daromadlari esa 1,5-2 mln. soʻmni tashkil etmoqda.

Yigʻilish davomida hokim yordamchisi Maʼmurjon Temirboyev Qipchoq ovul fuqarolar yigʻinida 2023-yil davomida amalga oshiriladigan rejalar bilan ham tanishtirib oʻtdi.

Taʼkidlanganidek, mahalladagi iqtisodiy holat, shu jumladan, aholining bandlik darajasi, oilalarning daromad manbalari, tomorqa yerlaridan foydalanish holatlari hamda daromadli mehnatga boʻlgan intilishlari va ehtiyojlarini qoʻllab-quvvatlash davom ettiriladi. Yer maydonlarda bogʻdorchilik, uzumchilik, poliz va sabzavotchilik, dukkakli va moyli ekinlarni yetishtirish orqali eksportbop qishloq xoʻjaligi ekinlari ekish koʻpaytiriladi hamda aholining keng qatlamlari tomonidan ushbu yerlardan samarali foydalanish tizimi yaratiladi.

Shuningdek, 2023-yil yakuniga qadar 135 nafar fuqaroni doimiy ishga joylashtirish, 140 nafar fuqaroning oʻzini-oʻzi band qilishiga koʻmaklashish, yer ajratish hisobiga 50 nafar fuqaroning bandligini taʼminlash, ovulning ichki koʻchalariga 40 ta yangi simyogʻoch, 60 ta tungi chiroqlar oʻrnatish, 2 ta ijtimoiy soha obʼektlarining ishga tushirilishiga koʻmak berish koʻzda tutilmoqda.

Yigʻilish davomida aholi vakillari hokim yordamchisiga oʻzlarini qiziqtirgan savollar bilan murojaat qilib, tegishlicha javoblar olishdi.

Tuman hokimligining Axborot xizmati