Қипчоқ овулида ҳоким ёрдамчиси аҳолига ҳисобот берди

24 январь куни Амударё тумани 1-сектор ҳудудидаги Қипчоқ овул фуқаролар йиғинида ҳоким ёрдамчиси сифатида ўз иш фаолияти олиб бораётган Маъмуржон Темирбоев овул вакилларига ўтган 2022 йил давомида амалга оширган ишлари ҳамда 2023 йилга мўлжалланган режалари ҳусусида ҳисобот берди.

Йиғилишда Маҳаллабай ишлаш ва тадбиркорликни ривожлантириш агентлиги Корақалпоғистон Республикаси бошқармаси бош юрисконсульти Айдос Сейткамалов ҳамда Мурожаатлар билан ишлаш буйича бўлим бошлиғи Бердах Умирбаев, Амударё тумани Маҳаллабай ишлаш ва тадбиркорликни ривожлантириш маркази директори Сирож Ўразматовлар иштирок этишди.

Ҳоким ёрдамчиси ўтган 2022 йил давомида маҳалла инфратузилмасини яхшилаш, аҳоли бандлигини таъминлаш ҳамда аҳолини тадбиркорликка кенг жалб этиш мақсадида салмоқли ишларни амалга оширди.

Жумладан, 635 та хонадонда истиқомат қилувчи 3764 нафар аҳоли орасидан ишсиз, ижтимоий ҳимояга муҳтож, доимий даромад манбаига эга бўлган, аммо қўшимча даромад топишни истаётган оилалар аниқланди. Ҳоким ёрдамчисининг кўмаги билан 56 нафар фуқарога имтиёзли кредитлар ажратилди.

Шунингдек, доимий даромад манбаига эга лекин қўшимча даромад топиш истагидаги фуқароларнинг 5 нафари иссиқхона, 17 нафари тикувчилик, 4 нафари асаларичилик, 3 нафари паррандачилик, 6 нафари чорвачилик, 21 нафари хизмат кўрсатиш йўналишлари бўйича ўз тадбиркорлик фаолиятини йўлга қўйишди. Ундан ташқари, 11 нафар ижтимоий ҳимояга муҳтож фуқароларга субсидия ажратилди.

Умуман олганда, ҳоким ёрдамчиси томонидан 2022 йил давомида Қипчоқ овули ҳудудида катта ижобий ўзгаришлар амалга оширилди. Хусусан, 14 та янги тадбиркорлик субъектлари барпо этилди, 120 нафар фуқаронинг бандлиги таъминланди. Ушбу фуқароларнинг ўртача ойлик даромадлари эса 1,5-2 млн. сўмни ташкил этмоқда.

Йиғилиш давомида ҳоким ёрдамчиси Маъмуржон Темирбоев Қипчоқ овул фуқаролар йиғинида 2023 йил давомида амалга ошириладиган режалар билан ҳам таништириб ўтди.

Таъкидланганидек, маҳалладаги иқтисодий ҳолат, шу жумладан, аҳолининг бандлик даражаси, оилаларнинг даромад манбалари, томорқа ерларидан фойдаланиш ҳолатлари ҳамда даромадли меҳнатга бўлган интилишлари ва эҳтиёжларини қўллаб-қувватлаш давом эттирилади. Ер майдонларда боғдорчилик, узумчилик, полиз ва сабзавотчилик, дуккакли ва мойли экинларни етиштириш орқали экспортбоп қишлоқ хўжалиги экинлари экиш кўпайтирилади ҳамда аҳолининг кенг қатламлари томонидан ушбу ерлардан самарали фойдаланиш тизими яратилади.

Шунингдек, 2023 йил якунига қадар 135 нафар фуқарони доимий ишга жойлаштириш, 140 нафар фуқаронинг ўзини-ўзи банд қилишига кўмаклашиш, ер ажратиш ҳисобига 50 нафар фуқаронинг бандлигини таъминлаш, овулнинг ички кўчаларига 40 та янги симёғоч, 60 та тунги чироқлар ўрнатиш, 2 та ижтимоий соҳа объектларининг ишга туширилишига кўмак бериш кўзда тутилмоқда.

Йиғилиш давомида аҳоли вакиллари ҳоким ёрдамчисига ўзларини қизиқтирган саволлар билан мурожаат қилиб, тегишлича жавоблар олишди.

Туман ҳокимлигининг Ахборот хизмати