Amudaryo tumani hokimi Sultonboy Yoʻldashevning Oʻzbekiston Respublikasi Qurolli Kuchlari tashkil etilganligining 31 yilligi munosabati bilan Vatan himoyachilariga BAYRAM TABRIGI
Qadrli askar va serjantlar, Qurolli Kuchlarimiz faxriylari!
Avvalo, Siz azizlarni, sizlar orqali barcha harbiylarimizni, butun xalqimizni Oʻzbekiston Respublikasi Qurolli Kuchlari tashkil etilganining 31 yilligi hamda Vatan himoyachilari kuni bilan chin qalbimdan tabriklayman!
Albatta, yurtimizda bayramlar, tarixiy sanalar juda koʻp. Ammo yurt tinchligi, osmonimiz musaffoligi, davlatimiz chegaralarining daxlsizligini taʼminlovchi qudratli kuch – Vatan himoyachilari kuni bayrami barchamiz uchun qadrli va ahamiyatlidir.
Ozod va obod Vatanimizdagi osuda hayot, chegaralarimiz daxlsizligi, bunyodkor xalqimizning tinchligi va osoyishtaligini qoʻriqlashda Vatan himoyachilarining xizmatlari beqiyosdir.
Taʼkidlash kerakki, milliy armiyamizning kuch-qudrati harbiy xizmatchilarimiz bilan bagʻrikeng va olijanob xalqimizning birligidadir. Bugun xalqimiz oʻz qasamyodiga sodiq qolib, xizmat burchini sharaf bilan oʻtayotgan harbiylarimiz bilan har qachongidan ham koʻra jips va birdamdir.
Aziz yurtdoshlar!
Bugungi kunda milliy armiyamiz yoshlarimiz uchun chinakam mardlik, fidoyilik, vatanparvarlik maktabiga aylangani barchamiz uchun ayni haqiqatdir. Bu haqiqatni yurtimizdagi barcha ota-onalar, butun xalqimiz gʻurur bilan, minnatdorchilik bilan eʼtirof etmoqda.
Hozirgi kunda onalar oʻz farzandlarini armiyaga koʻzda yosh, yurakda xavotir bilan emas, balki “Mening oʻgʻlim haqiqiy Vatan himoyachisi boʻladi” degan yuksak ishonch va faxr tuygʻusi bilan kuzatmoqda.
Yurtimizda ofitserlar va serjant kadrlarni tayyorlash hamda malakasini oshirishning zamonaviy talablarga javob beradigan samarali tizimi yaratildi. Harbiy xizmatni oʻzining kasbi, Vatan va xalq oldidagi muqaddas burchi deb bilgan oʻgʻlonlarimizni sharaflash, ularga ehtirom koʻrsatish barchamiz uchun ham qarz, ham farzdir.
Qolaversa, yoshlarni uzluksiz harbiy taʼlimga jalb qilish borasida ham tizimli ishlar yoʻlga qoʻyildi. Birgina 2022-yilda 9 nafar tumanimiz yoshlari Oliy harbiy taʼlim muassasalariga, 8 nafar yoshlarimiz esa “Temurbeklar maktabi” harbiy-akademik litseylariga oʻqishga qabul qilindi. Ular ham kelgusida eng namunali Vatan himoyachilari boʻlib yetishishiga ishonamiz!
Qadrli Vatan himoyachilari!
Fursatdan foydalanib, yana bir bor Siz azizlarni va oila aʼzolaringizni Oʻzbekiston Respublikasi Qurolli Kuchlari tashkil etilganining 31 yilligi hamda Vatan himoyachilari kuni bilan chin qalbimdan tabriklayman!
Barchangizga mustahkam sogʻlik, oilaviy baxt va saodat, sharafli va masʼuliyatli faoliyatingizda ulkan zafarlar tilayman.
Yurtimiz tinch, osmonimiz musaffo boʻlsin!
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
