YaNGI YIL MUXAMMASI

Yil aylandi azizlar, goho tinch, shov-shuv bilan,
Qaylardadir gʻalayon, tala-toʻp, qutqu bilan.
Tinchlik armon kimgadir, gʻam yutar qaygʻu bilan,
Urush vahmidan toʻz-toʻz onalar “yo, huv!” bilan –
Allohdan kenglik soʻrab, keldilar orzu bilan...

Biz keldik, Vatan mehri  yuraklarga band-u band,
Tenglik, hurlik shavqidan koʻkrakni tutib baland.
Ilm-u irfon, zakovat har dilga berib quvvat,
Ulugʻ orzu-niyatlar buyuk ishlarga payvand –
Avlodlari barkamol va oqil, gʻani bilan.

Ming bor shukur, Vatanda el aziz, inson aziz,
Bul ustuvor maqsadga gʻubor inmagay hargiz.
Yer-u osmon osuda, osuda oshyon aziz,
Totuvlik neʼmatidan charogʻon har dam aziz –
Ulgʻaydi oʻgʻil-qizlar ERK degan tuygʻu bilan.

Yangi yil ostonasi yorishib ketdi, qarang,
Bir yuz-u qirq millatning orzusiday rang-barang.
Shaʼn-u gʻurur yuksalib, madhiya sochib jarang,
Vatan bayrogʻin oʻpib turgan Oʻgʻlonga qarang –
Jumlai jahon toʻldi oʻzbaki yozuv bilan.

Soʻz aytdi Prezident, yuksak minbardan turib,
Va Yusuf xos Hojibdan hikmatlar durin terib.
Qayda zakovat boʻlsa, ulugʻlik izin koʻrib.
Bilim, yana bilimni boshida baland tutib –
Yilimizga nom berdi eng teran mavzu bilan.

Insonga eʼtibor va sifatli taʼlim sari,
Zalvorli qadamlardan el topgay mazmun, maʼni.
Buyuklikka poydevor Prezident maktablari,
Endi boshga koʻtargay Vatan muallimlarni –
Ilm yoʻllari aro ulugʻvor yogʻdu bilan.

Yangi yil oqshomida barcha boʻldi jam-ul jam,
Sport ahli, sanʼatkor, shoir-u davronlar ham.
Tadbirkor dehqon bir yon, qarang, bari xushqadam,
Bir yonda ilmi tolib, dilda mehri mujassam –
Shaʼn, iftixor qorishdi Yangi yil bongi bilan.

Bezandi boshdin-oyoq oʻn ming qishloq, mahalla,
Qorbobosiga mushtoq bolajon el bu palla.
Uylar charogʻon, porloq, yangrayotir kuy, yalla,
Sukunat tilga kirib, Qor qizin quchar dala –
Ajab! Zamin chulgʻandi kumushrang parqu bilan.

Bunchalar suyuk Vatan, osoyishta  har yogʻing,
Ajdodlardan tabarruk mangu yoniq chirogʻing.
Anov yovqur Oʻgʻloning elga qaytgan Shirogʻing,
Balki u Jaloliddin yoki Temur siyogʻing –
Dunyolarni lol etmish shon-shuhrat, dongʻi bilan.

Yangi yil! Misli Vatan – toʻrt tomon Yangi boʻldi,
Yogʻilib ajib ziyo – tonglar nurli tong boʻldi.
Koʻngillar koʻngillarga tutashgan hur yoʻl boʻldi,
Robiya, xalqim endi bitta qalb-u qoʻl boʻldi –
Yangi Oʻzbekistonning nurafshon tongi bilan!

Robiya YOʻLDOShEVA.