ЯНГИ ЙИЛ МУХАММАСИ

Йил айланди азизлар, гоҳо тинч, шов-шув билан,
Қайлардадир ғалаён, тала-тўп, қутқу билан.
Тинчлик армон кимгадир, ғам ютар қайғу билан,
Уруш ваҳмидан тўз-тўз оналар “ё, ҳув!” билан –
Аллоҳдан кенглик сўраб, келдилар орзу билан...

Биз келдик, Ватан меҳри  юракларга банд-у банд,
Тенглик, ҳурлик шавқидан кўкракни тутиб баланд.
Илм-у ирфон, заковат ҳар дилга бериб қувват,
Улуғ орзу-ниятлар буюк ишларга пайванд –
Авлодлари баркамол ва оқил, ғани билан.

Минг бор шукур, Ватанда эл азиз, инсон азиз,
Бул устувор мақсадга ғубор инмагай ҳаргиз.
Ер-у осмон осуда, осуда ошён азиз,
Тотувлик неъматидан чароғон ҳар дам азиз –
Улғайди ўғил-қизлар ЭРК деган туйғу билан.

Янги йил остонаси ёришиб кетди, қаранг,
Бир юз-у қирқ миллатнинг орзусидай ранг-баранг.
Шаън-у ғурур юксалиб, мадҳия сочиб жаранг,
Ватан байроғин ўпиб турган Ўғлонга қаранг –
Жумлаи жаҳон тўлди ўзбаки ёзув билан.

Сўз айтди Президент, юксак минбардан туриб,
Ва Юсуф хос Ҳожибдан ҳикматлар дурин териб.
Қайда заковат бўлса, улуғлик изин кўриб.
Билим, яна билимни бошида баланд тутиб –
Йилимизга ном берди энг теран мавзу билан.

Инсонга эътибор ва сифатли таълим сари,
Залворли қадамлардан эл топгай мазмун, маъни.
Буюкликка пойдевор Президент мактаблари,
Энди бошга кўтаргай Ватан муаллимларни –
Илм йўллари аро улуғвор ёғду билан.

Янги йил оқшомида барча бўлди жам-ул жам,
Спорт аҳли, санъаткор, шоир-у давронлар ҳам.
Тадбиркор деҳқон бир ён, қаранг, бари хушқадам,
Бир ёнда илми толиб, дилда меҳри мужассам –
Шаън, ифтихор қоришди Янги йил бонги билан.

Безанди бошдин-оёқ ўн минг қишлоқ, маҳалла,
Қорбобосига муштоқ болажон эл бу палла.
Уйлар чароғон, порлоқ, янграётир куй, ялла,
Сукунат тилга кириб, Қор қизин қучар дала –
Ажаб! Замин чулғанди кумушранг парқу билан.

Бунчалар суюк Ватан, осойишта  ҳар ёғинг,
Аждодлардан табаррук мангу ёниқ чироғинг.
Анов ёвқур Ўғлонинг элга қайтган Широғинг,
Балки у Жалолиддин ёки Темур сиёғинг –
Дунёларни лол этмиш шон-шуҳрат, донғи билан.

Янги йил! Мисли Ватан – тўрт томон Янги бўлди,
Ёғилиб ажиб зиё – тонглар нурли тонг бўлди.
Кўнгиллар кўнгилларга туташган ҳур йўл бўлди,
Робия, халқим энди битта қалб-у қўл бўлди –
Янги Ўзбекистоннинг нурафшон тонги билан!

Робия ЙЎЛДОШЕВА.