Xalq deputatlari Amudaryo tuman Kengashining 56-sessiyasi toʻgʻrisida axborot

Fotogalereya

2022-yil 29-dekabr kuni tuman hokimligining majlislar zalida Xalq deputatlari Amudaryo tuman Kengashining navbatdagi – 56-sessiyasi boʻlib oʻtdi.

Sessiya majlisida deputatlar, sektor rahbarlari, tuman hokimi oʻrinbosarlari, hokimlik masʼul xodimlari, boʻlimlar, tashkilotlar rahbarlari hamda ommaviy axborot vositalari vakillari ishtirok etdi.

Sessiya kotibligiga 9-Amir Temur saylov okrugidan deputat Oybek Yusupov saylandi.

Sessiyada dastlab tumanni ijtimoiq-iqtisodiy rivojlantirish masalalari boʻyicha sektorlar rahbarlarining hisobotlari tinglandi.

Tuman hokimi, 1-sektor rahbari Sultonboy Yoʻldashev tumanda 2022-yil davomida amalga oshirilgan ishlar va 2023-yilga moʻljallangan rejalar xususida hisobot berdi. Qayd etilganidek, 2022-yilda tuman boʻyicha kambagʻallikni qisqartirish maqsadida amalga oshirilgan ishlar natijasida 9 437 nafar aholining oilaviy daromadi oshishiga zamin yaratildi. Jumladan, 1 065 nafar fuqarolar doimiy ish bilan taʼminlandi, 3 611 nafar fuqaroning oilaviy tadbirkorlikni rivojlantirish dasturi doirasida ajratilgan imtiyozli kreditlar evaziga bandligi taʼminlandi. 1 213 nafar fuqarolar haq toʻlanadigan jamoat ishlariga jalb qilindi. 625 nafar fuqarolarning subsidiya asosida issiqxona xamda asbob-uskunalar ajratish orqali bandligi taʼminlandi. 2923 nafar fuqarolarga qishloq xoʻjaligi yerlari “E-AUKSION” savdo platformasi orqali ajratildi.

Sessiya ishida tuman prokurori oʻrinbosari Poʻlat Bekniyazov 2-sektorda amalga oshirilgan ishlar boʻyicha hisobot berdi. Taʼkidlanganidek, Oʻzbekiston Respublikasi Prezidentining 2022-yil 25-oktyabrdagi “2022-2023-yillarda mahallalar infratuzilmasini yanada yaxshilash boʻyicha qoʻshimcha chora-tadbirlar toʻgʻrisida”gi qarorining ijrosini taʼminlash maqsadida 4 ta sektorga 25 mlrd 595 mln.soʻm pul mablagʻlari ajratilgan. Shundan 2-sektor hududida mahalla va ovul fuqarolar yigʻinidagi mavjud muammolarni bartaraf etish maqsadida 1 mlrd. 981,2 mln soʻmlik 3 ta loyihani amalga oshirish rejalashtirilgan. Hisobotda shu va boshqa yoʻnalishdagi ishlar haqida batafsil maʼlumotlar berildi.

Kun tartibidagi masala yuzasidan tuman Ichki ishlar boʻlimi boshligʻi oʻrinbosari Xurshid Alimov soʻzga chiqib, 3-sektorda amalga oshirilgan ishlar boʻyicha hisobot berdi. Qayd etilishicha, yakunlanayotgan yilda 3-sektor hududida 1 mlrd. 580,6 mln soʻmlik 5 ta loyiha amalga oshiriladi. Bugungi kunda barcha obʼektlarning tender savdolari yakunlangan boʻlib, belgilangan tartibda pudratchi tashkilotlar qurilish ishlarini boshlanmoqda.

4-sektor rahbari – tuman Davlat soliq inspektsiyasi boshligʻi Aydos Seyitovning hisobotida keltirilishicha, 2022-yilda 4-sektor xududida 14 mlrd. 128 mln soʻmlik 6 ta loyiha amalga oshirilishi orqali mahalla va ovullarda mavjud muammolarni bartaraf etish rejalashtirilgan. Jumladan, Namuna mahallasi hududida ichimlik suvi taʼminotini yaxshilash maqsadida qiymati 5 mlrd 597,2mln. soʻmlik tozalangan suv tarqatish inshootini yangidan qurish va 7,1 km uzunlikdagi suv tarmoqlarini yangidan tortish, Qumyop mahallasi hududida qiymati 6 mlrd 641,6mln. soʻmlik tozalangan suv tarqatish inshootini yangidan qurish va 10,1 kmuzunlikdagi suv tarmoqlarini yangidan tortish, shuningdek, 4-sektor hududidagi 4 ta ovul va mahallalarda umumiy qiymati 1 mlrd 889,1 mln. soʻmlik jami 8,1 km uzunlikdagi ichki yoʻllarni taʼmirlash ishlari olib borilmoqda.

Sessiya ishida “Ayollar daftari”ni yuritish orqali xotin-qizlar muammolarini tizimli ravishda hal etish, ularni ijtimoiy qoʻllab-quvvatlash va “Ayollar daftari”dan chiqarish toʻgʻrisida tuman hokimi oʻrinbosari, Oila va xotin-qizlar boʻlimi boshligʻi Goʻzal Saburova hisobot berdi.

Taʼkidlanganidek, tumanda joriy yilda uchinchi bosqich “Ayollar daftari”ga jami 3810 nafar xotin-qizlar kiritilgan. Shu kunga qadar 3-bosqich “Ayollar daftari”da roʻyxatda turuvchi 3810 nafar xotin-qizlarning 3 803 nafariga turli yordamlar koʻrsatilgan.

Shu bilan birga “Oilaviy qadriyatlarni mustahkamlash” komissiyasiga murojaat qilgan 116 nafar ajrim yoqasiga kelib qolgan oilalarning 113 nafari yarashtirilishiga erishilgan. Bilib-bilmay jinoyat yoʻliga kirib qolgan 3 nafar xotin-qizlar Oila va xotin-qizlar boʻlimining kafilligi asosida qamoq jazosidan saqlab qolingan va sogʻlom turmush tarziga qaytarilgan. 16 nafar xotin-qizlarning esa kontrakt pullari toʻlab berilgan.

Sessiya kun tartibidagi navbatdagi masala yuzasidan Davlat kadastrlari palatasi Qoraqalpogʻiston Respublikasi boshqarmasi Amudaryo tuman filiali boshligʻi Sherzod Sultanovning hisoboti tinglandi.

Hisobotda qayd etilganidek, Davlat kadastrlari palatasi Qoraqalpogʻiston Respublikasi boshqarmasi Amudaryo tumani filiali tomonidan Amudaryo tumani hududida joylashgan yuridik va jismoniy shaxslarga tegishli jami 45 ming 302 ta, koʻchmas mulk obʼekt mavjud boʻlib, shundan 42 ming 51 ta turar joy, 3 ming 251 ta noturar joy obʼektlari hisobga olingan. Shundan, 33 ming 205 ta koʻchmas mulk obʼektlarining huquqni tasdiqlovchi hujjatlari mavjud. 25 ming 789 ta koʻchmas mulk obʼektlariga esa kadastr hujjatlari tayyorlanib, davlat roʻyxatidan oʻtkazilgan. Shuningdek, filial xodimlari tomonidan tumandagi 16 ta ovul, 31 ta mahalla va 2 ta shaharcha fuqarolar yigʻinlari chegaralari belgilangan.

Sessiya ishida “2023-yil uchun Amudaryo tumani mahalliy byudjeti xaqida”gi masala ham koʻrib chiqildi. Amudaryo tumani Moliya boʻlimining mahalliy byudjet ijrosi va hisobi sektori boshligʻi Abay Saginbayev tumanning kelgusi yil uchun mahalliy byudjeti daromadlari va xarajatlari haqida batafsil axborot berdi.

Keltirilishicha, 2023-yil uchun Amudaryo tumani Mahalliy byudjetning daromadlari 77,5 mlrd soʻm, yuqori byudjetdan ajratiladigan transfert miqdori 165,4 mlrd. soʻm, jami xarajatlari esa 242,9 mlrd. soʻm miqdorida prognoz qilinmoqda.

Qaror loyihasida taʼlim, sogʻliqni saqlash, madaniyat, sport va boshqa soha harajatlari uchun ajratiladigan mablagʻlar deputatlar tomonidan qizgʻin muhokama qilindi.

Sessiya ishida Qoraqalpogʻiston Respublikasi hududlarida 2023-yil uchun jismoniy va yuridik shaxslarning qishloq xoʻjaligiga moʻljallanmagan yerlari boʻyicha yer soligʻi stavkalarining bazaviy miqdori toʻgʻrisida tuman Davlat soliq inspektsiyasi boshligʻi Aydos Seyitovning hisoboti tinglandi. Hisobotda jismoniy shaxslar uchun yer soligʻi stavkasini har bir kvadrat metr yer uchun tuman markazida joylashgan hududlarga 197,5 soʻm, boshqa hududlar uchun esa 145,53 soʻm qilib belgilash taklif qilindi. Yuridik shaxslarning 1 gektar yer maydoni uchun yer soligʻi stavkasini esa tuman markazidagi hududlarga 21 million 335 ming soʻm, boshqa hududlarga 17 million 570 ming soʻm qilib belgilash taklif etildi.

Sessiya ishida kun tartibiga kiritilgan barcha masalalar atroflicha koʻrib chiqildi va tuman Kengashining tegishli qarorlari qabul qilindi. Shuning bilan sessiya oʻz ishini yakunladi.

Tuman hokimligining Axborot xizmati.