"MURODBEK" VA "SARVINOZ" NMTTDA YaNGI YIL BAYRAMI NIShONLANDI

Mamlakatimizda tadbirkorlik sohasiga qaratilayotgan eʼtibor va ragʻbat tufayli Amudaryo tumanida ham har yili koʻplab tadbirkorlik subʼektlari tashkil etilib, yangi ish oʻrinlari yaratilmoqda.

“Murodbek” oilaviy nodavlat maktabgacha taʼlim tashkiloti oʻz faoliyatini boshlaganiga hali koʻp vaqt boʻlgani yoʻq. 2019-yilning yanvar oyida 25 nafar 3 yoshdan 6 yoshgacha boʻlgan bolajonlarni oʻz bagʻriga olgan mazkur nodavlat maktabgacha taʼlim tashkilotida taʼlim-tarbiya ishlarini namunali tarzda olib borish maqsadida 1 nafar malakali tarbiyachi va yordamchi tarbiyachi, oshpaz, oshpaz yordamchisi hamda hamshira faoliyat olib boradi.

Muassasada bolajonlarning zamonaviy talablar asosida taʼlim-tarbiya olishlari, fikrni, nutqni rivojlantiruvchi mashgʻulotlar oʻtkazilishi uchun barcha sharoitlar mavjud. Bolajonlar kun boʻyi turli ertak qahramonlari qiyofasidagi oʻyinchoqlarni oʻynab, miriqib uxlaydilar, badantarbiya mashqlarini bajaradilar, qoʻshiq va sheʼrlar aytib, raqsga tushadilar.

Nodavlat maktabgacha taʼlim tashkiloti joylashgan hududda istiqomat qilayotgan ota-onalarning talab va ehtiyojlarini hisobga olgan muassasa mudirasi Nargiza Otamurodova 2021-yilning iyun oyida mazkur sohadagi tadbirkorlik faoliyatini kengaytirib, 25-oʻrinli “Sarvinoz” nodavlat maktabgacha taʼlim tashkiloti faoliyatini ham yoʻlga qoʻydi. 3 yoshdan 6 yoshgacha boʻlgan bolajonlar uchun moʻljallangan ushbu nodavlat maktabgacha taʼlim tashkiloti ochilish bilan yana 2 nafar ayol-qizning doimiy ish bilan bandligi taʼminlandi.

Biz ijodiy guruhimiz bilan Yangi yil bayrami arafasida “Murodbek” va “Sarvinoz” nodavlat maktabgacha taʼlim tashkilotlari tarbiyalanuvchilari huzurida boʻldik. Bezatilgan yam-yashil archa atrofida Yangi yil bayramini nishonlayotgan biri-biridan shirin bolajonlar quvonchining cheki yoʻq. Bolajonlar bogʻcha opalari bilan birgalikda oʻzlari oʻrgangan sheʼr va qoʻshiqlarini ijro etishib, quvnoq raqslari bilan tarbiyachi opalarini xursand qildilar. Bayram tadbiri davomida oʻzlarining epchil va chaqqonliklarini namoyish etib, quvnoq oʻyinlari bilan davraga fayz kiritdilar.

Biri-biridan quvnoq raqslar, kuy va qoʻshiqlar asosida bolajonlarga zavq bagʻishlagan bayram tadbiriga Qorbobo va Qorqiz tashrif buyurib, kichkintoylarga yangi yil sovgʻalarini ulashdi.

Mazkur maktabgacha taʼlim tashkiloti bolajonlarning taʼlim olishga boʻlgan huquqini amalga oshirishni taʼminlash, bolaning jismoniy, aqliy va maʼnaviy kamolotini saqlash va mustahkamlash, umumtaʼlim muassasalarida bolaning jamiyatga moslashishini va taʼlim olishni davom ettirishga tayyorligini taʼminlash borasida tizimli ishlarni amalga oshirmoqda.

Shuningdek, tashklot bolalarda Vatanga muhabbat tuygʻusini, oilaga, oʻz xalqining milliy, tarixiy, madaniy qadriyatlariga hurmat bilan munosabatda boʻlishni, atrof-muhitga ehtiyotkor munosabatni shakllantirish, bolaning shaxsini shakllantirish, uning ijodiy qobiliyatlarini rivojlantirish, ijtimoiy tajriba orttirishini taʼminlash, jamiyatga moslashishini va boshlangʻich taʼlimga tayyorligini taʼminlash uchun taʼlim-tarbiya jarayoniga zamonaviy taʼlim dasturlari va texnologiyalarni joriy etishga harakat qilib kelmoqda.

Tadbir yakunida “Murodbek” va “Sarvinoz” nodavlat maktabgacha taʼlim tashkilotlari mudirasi Nargiza Atamurodova bolajonlarni kirib kelayotgan Yangi yil bayrami bilan samimiy tabriklab, bayram sovgʻalarini topshirdi.