“ATROF-MUHITGA BOʻLGAN MUNOSABATIMIZ - OʻZIMIZGA BOʻLGAN MUNOSABATDIR”

Yurtimizning har qarich yeri oltinga teng. Uning goʻzal tabiati, musaffo havosi, ziloldek tiniq va shifobaxsh suvlari har qanday kishini oʻziga maftun etadi. Mana shunday betakror goʻzallikni asrab-avaylash, kelajak avlodga bus-butunligicha yetkazish har birimizning asosiy burchimiz hamda majburiyatimizdir.

Bu Oʻzbekiston Respublikasi Konstitutsiyasining 50-moddasida  qatʼiy belgilab qoʻyilgan. Unga koʻra, fuqarolar atrof tabiiy muhitga ehtiyotkorona munosabatda boʻlishga majburdirlar.

Taʼkidlash joiz, soʻnggi yillarda mamlakatimizda ekologik barqarorlikni taʼminlash, aholining qulay tabiiy muhitga ega boʻlishi uchun zarur boʻlgan barcha shart-sharoitlar yaratish, tabiiy resurslardan samarali va oqilona foydalanish, vujudga kelayotgan ekologik muammolarning oldini olish va ularning salbiy oqibatlarini bartaraf etish masalalariga jiddiy eʼtibor qaratib kelinmoqda.

Respublikamizda yashil hududlarni yanada koʻpaytirish maqsadida Muhtaram Prezidentimiz tashabbusi bilan “Yashil makon” umummilliy loyihasi tadbiq etildi.

Mazkur loyihaning ijobiy natijasi oʻlaroq bugungi kunda yurtimizning barcha hududlarida yashil maydonlar ikki barobarga koʻpaydi.

Amudaryo tumanida ham umummilliy harakat uyushqoqlik bilan oʻtkazildi. 2022-yilning bahor mavsumida tuman boʻyicha 744,3 ming dona daraxt koʻchatlari ekildi. Xususan, har bir korxona, tashkilot, muassasa atrofidagi yashil maydonlarga mevali va manzarali koʻchatlar ekilib, butun yoz boʻyi parvarishlandi.

Bahor mavsumida ekilgan koʻchatlar bugun koʻzni quvontirgudek darajada koʻkka boʻy choʻzdi.

Mazkur xayrli tadbirni izchil davom ettirish maqsadida 2022-yil 11-oktyabr kuni muhtaram Prezidentimiz raisligida oʻtkazilgan videoselektor yigʻilishida loyiha doirasida yil yakuniga qadar 75 mln. dona, 2023-yil bahor oylarida yana 125 mln. dona mevali va manzarali koʻchatlar ekish vazifasi qoʻyilib, 20-oktyabrdan 1-dekabrgacha koʻchat ekish boʻyicha “dolzarb 40 kunlik” eʼlon qilindi.

Mazkur topshiriqlar ijrosini taʼminlash maqsadida tumanimizda joriy yilning kuz mavsumida 434,6 ming dona daraxt koʻchatlari ekildi. Dastur asosida umumfoydalanishdagi avtomobil yoʻllari yoqasidagi yerlarga 3,8 ming tup, qishloq xoʻjaligi yerlarida 35 ming tup, fermer xoʻjaliklarining ekin yer maydonlari chetlariga 125,7 ming tup, oʻrta maxsus taʼlim yoʻnalishi obʼektlarida 5 ming tup, xalq taʼlimi yoʻnalishi obʼektlarida 7,5 ming tup, maktabgacha taʼlim yoʻnalishi obʼektlarida 6 ming tup, sogʻliqni saqlash yoʻnalishi obʼektlarida 6,5 ming tup, korxonalar va xizmat koʻrsatish sohalari hududlarida 32,4 ming tup, tuman Obodonlashtirish boshqarmasi tasarrufidagi hududlar va obʼektlarda 109,5 ming tup, ovul va mahallalar hududlarida 103,2 ming tup daraxt koʻchatlari ekilib, belgilangan reja 103 foizga bajarildi.

Fursatdan foydalanib, oʻz mahallasi hududini, ish joyi atrofini obodonlashtirish va koʻkalamzorlashtirish ishlarida uyushqoqlik bilan qatnashgan barcha amudaryoliklarga minnatdorlik bildiramiz 2023-yilning bahor mavsumida ham faollikka chorlab qolamiz.

Nodirbek Kamolov,

tuman hokimi oʻrinbosari.