Maktab pedagogika kengashi: U shunchaki yigʻilish emas

Amaldagi “Maktab pedagogika kengashi toʻgʻrisida”gi Nizomga pedagogik kengash umumtaʼlim muassasasi faoliyatiga doir asosiy masalalar kollegial muhokama qilinadigan, taʼlim muassasasida oʻquv-tarbiya jarayonini rivojlantirish, takomillashtirish, uning faoliyati bilan bogʻliq barcha tashkiliy masalalarni muvofiqlashtirish boʻyicha doimiy faoliyat yuritadigan oliy organ hisoblanadi.
Maktab pedagogika kengashi 16 ta asosiy vazifalarni oʻz ichiga oladi. Bundan tashqari kengash taʼlimga oid qonunchilik hujjatlariga muvofiq boshqada vazifalarni amalga oshirishi mumkin. Jumladan maktab pedagogika kengashi Vazirlar Mahkamasining 2019-yil 30-sentyabrdagi “Umumiy oʻrta taʼlim muassasalarining oʻrnak koʻrsatgan xodimlarini moddiy ragʻbatlantirish tartibini takomillashtirish toʻgʻrisida” gi 823-qarori asosida tasdiqlangan Nizomda koʻrsatilganidek, maktabda tuziladigan ishchi guruhni oʻz qarori bilan har oʻquv yilida qaytadan shakllantirish vazifasini ham amalga oshiradi.
Kengash majburiy tarzda oʻquv yili boshida, avgust oyida 1- yigʻilishini oʻtkazadi. Yigʻilish kun tartibida reja asosida maktabning yangi oʻquv yiliga moʻljallangan yillik ish rejasi va oʻquv yili davomida amalga oshiriladigan asosiy vazifalarning yoʻnalishlari belgilab olinadi. Maktab pedagog xodimlarining darslar taqsimoti koʻrib chiqiladi va tasdiqlanadi. Oʻzbekiston Respublikasi Adliya vazirligi tomonidan 2020-yil 30-iyunda 3271 raqam bilan roʻyxatdan oʻtgan “Umumtaʼlim muassasalarida sinflarni komplektlash hamda tarifikatsiya roʻyxatlarini shakllantirish tartibi toʻgʻrisida”gi Nizom asosida maktab metod birlashmalari tomonidan taqsimlangan darslar taqsimotini qayta koʻrib chiqish va qayta taqsimlash vakolatiga ega.
Maktab pedagoglari ishga qabul qilingan kundan eʼtiboran kengash aʼzosi hisoblanadi. Kengash yigʻilishlariga kun tartibidagi masalalarga koʻra, maktab ota-onalar qoʻmitasi raisi, maktab kuzatuv kengashi raisi, fuqarolar yigʻini aʼzolari ham taklif qilinishi mumkin. Kengash yigʻilishi uning raisi tomonidan chaqiriladi va aʼzolarining uchdan ikki qismi hozir boʻlganda vakolatli hisoblanadi. Baʼzi holatlarda yillik tasdiqlangan rejadan tashqari ham kengash yigʻilishini chaqirish zarur boʻlishi mumkin. Bunday yigʻilishlar navbatdan tashqari pedagogika kengashi yigʻilishi deb ataladi va unda kengash aʼzolarining kamida uchdan bir qismi hozir boʻlgan vaqtda vakolatli hisoblanadi. Kengash yigʻilishi oʻtkazilish kuni, vaqti, joyi va kun tartibidagi masalalar bir hafta oldin eʼlon qilinishi shart.
Maktab pedagogika kengashi tomonidan qabul qilingan qarorlar oʻz ahamiyatliligi va taʼlimning sifat samaradorligini taʼminlovchi asosiy omil hisoblanadi. Uning ijrosini taʼminlash- maktab pedagoglari va xodimlarining lavozim majburiyati qilib belgilangan.
Maktab bayonnomalari va qabul qilingan qarorlar pedagogika kengash kotibi tomonidan maxsus, shnurlangan va har bir sahifasi raqamlanib, ip oʻtkazib, muhrlangan daftarga yoziladi. Maktab direktori bayonnomaning toʻgʻri va toʻliq yozilishini nazorat qilib boradi va har bir bayonnoma oxirida imzosi va maktab muhri bilan tasdiqlaydi. Kengash bayonnomalarini qayd qilish daftari- maktabning alohida nazoratda turuvchi hujjatlari sirasiga kiradi va saqlanish muddati 75-yil boʻlib hisoblanadi. Maktab rahbari almashgan vaqtda dalolatnoma bilan keyingi rahbarga topshiriladi.

Yalgʻashboy Shamuratov

Oʻzbekiston va Qoraqalpogʻiston Respublikasi Xalq taʼlimi aʼlochisi.