“BIZ ZOʻRAVONLIKKA QARShIMIZ!” ShIORI OSTIDA AKTsIYa OʻTKAZILDI

Birlashgan Millatlar tashkiloti Bosh Assambleyasining 1999-yil 17-dekabrdagi rezolyutsiyasiga koʻra, 25-noyabr – Xalqaro ayollarga nisbatan zoʻravonlikka barham berish kuni sifatida belgilangan.

Shu munosabat bilan butun dunyoda, shu jumladan mamlakatimizda ham nafaqat belgilangan sana, balki yil davomida “Biz zoʻravonlikka qarshimiz!” shiori ostida turli xil tadbirlar, davra suhbatlari, aktsiyalar oʻtkaziladi.

Qolaversa, soʻnggi yillarda mamlakatimizda xotin-qizlarning ijtimoiy-siyosiy faolligini yanada oshirish, huquq va qonuniy manfaatlariga soʻzsiz rioya qilinishini taʼminlash, onalik va bolalikni har tomonlama qoʻllab-quvvatlash, oila institutini mustahkamlash borasida keng koʻlamli ishlarni amalga oshirishga qaratilgan meʼyoriy hujjatlar qabul qilingan.

Oʻzbekiston Respublikasi Konstitutsiyasining 46-moddasida “Xotin-qizlar va erkaklar teng huquqlidirlar”, deya eʼtirof etilishining oʻzi mamlakatimizda har bir ayol-qiz jamiyatning barcha sohalarida faol ishtirok etishi uchun huquqiy kafolat hisoblanadi. Bundan tashqari, xotin-qizlarni qoʻllab-quvvatlashga qaratilgan Prezident Farmonlari, ayniqsa, Oʻzbekiston Respublikasining 2019-yil 2-sentyabrdagi “Xotin-qizlarni tazyiq va zoʻravonlikdan himoya qilish toʻgʻrisida”gi Qonuni mamlakatimizda gender tenglikni taʼminlashning yaqqol ifodasidir.

Joriy yilning 21-noyabr kuni Prezident taʼlim muassasalari agentligi tizimidagi Amudaryo tuman ixtisoslashtirilgan maktabining faollar zalida 25-noyabr – Xalqaro ayollarga nisbatan zoʻravonlikka barham berish kuni munosabati bilan “Biz zoʻravonlikka qarshimiz!” shiori ostida aktsiya tashkil etildi. Unda maktab pedagogika jamoasi, maktab oʻquvchilari, Amudaryo tuman Ichki ishlar boʻlimi xodimlari, Ichki ishlar boʻlimining xotin-qizlar masalalari boʻyicha katta inspektori Inobat Oʻrazmatova, tergov boʻlimi tergovchisi Dilafruz Sharipova, isnpektor-psixolog Kumushoy Bekmanova, Oila va xotin-qizlar davlat qoʻmitasi huzuridagi ayollarni reabilitatsiya qilish va moslashtirish Respublika markazining Qoraqalpogʻiston Respublikasi boʻyicha namunali tumanlararo markazi direktori Gavhar Chimboychiyevalar ishtirok etishdi.

Tadbirni Prezident taʼlim agentligi tizimidagi Amudaryo tuman ixtisoslashtirilgan maktabining maʼnaviy-maʼrifiy masalalar boʻyicha direktor oʻrinbosari, Xalq deputatlari Amudaryo tuman Kengashi deputati Muyassar Rahmatullayeva ochdi va oʻtkazilayotgan aktsiyaning mazmun-mohiyati, zoʻravonlikka qarshi mamlakatimizda amalga oshirilayotgan keng koʻlamli ishlar xususida batafsil toʻxtaldi.

Shundan soʻng, Amudaryo tuman Ichki ishlar boʻlimi xotin-qizlar masalasi boʻyicha katta inspektor. leytenat Inobat Oʻrazmatova, tergov boʻlimi tergovchisi Dilafroʻz Sharifovalar bugungi kunda xotin-qizlarni zoʻravonlikdan himoya qilish borasida keng koʻlamli ishlar amalga oshirilayotgani, ushbu yoʻnalishda bir qator xalqaro hujjatlar ratifikatsiya qilingani, mustaqil Oʻzbekistonimizda qanday vaziyatda boʻlmasin, u jamoat joyida, xilvatda yoki oiladami, ayolni, bolalar va keksalarni, har bir insonni sodir etiladigan jinoiy zoʻravonliklardan himoya qilish mexanizmi mustahkamlab qoʻyilgani haqida batafsil soʻz yuritishib, hayotiy misollar orqali zoʻravonlikka barham berishning xalqaro miqyosda tan olingan huquqiy asoslari xususida maʼlumotlar berdilar.

Tadbir davomida oʻquvchi-yoshlar ushbu yoʻnalishda oʻzlarini qiziqtirgan savollar bilan murojaat qildilar. Barcha savollarga masʼul mutaxassislar batafsil javoblar berishdi.

Boʻlib oʻtgan “Biz zoʻravonlikka qarshimiz!” aktsiyasi jamiyatda huquqiy ong va huquqiy madaniyatni yuksaltirish, tazyiq va zoʻravonlikka doir murosasizlik muhitini yaratish boʻyicha oʻquvchi-yoshlarning huquqiy bilimlarini oshirish, ushbu yoʻnalishdagi saʼy-harakatlarni doimiy ravishda izchil amalga oshirishga intilish va qiziqishlari, burch va majburiyatlarini toʻlaqonli tushungan holda harakat qilishlarida muhim ahamiyatga ega boʻldi.

Robiya YOʻLDOShEVA.