OʻQUVChI-YoShLAR OʻRTASIDA “KONSTITUTsIYa BILIMDONI” KOʻRIK-TANLOVI BOʻLIB OʻTDI

Bosh qomusimiz boʻlmish Konstitutsiyamizning mazmun-mohiyatini bilish, undagi moddalarni oʻrganish har bir yurtdoshimizning fuqarolik burchi hisoblanadi. Amaldagi qonunlarimizning jamiyatimizda, ayniqsa, yoshlar orasida keng targʻib qilinishi ularning huquqiy savodxonligini oshirishda, jamoatchilik nazorati shakllanishida hamda mamlakatimizda qonun ustuvorligi taminlanishida muhim oʻrin tutadi.

12-noyabr kuni Prezident taʼlim muassasalari agentligi tizimidagi Amudaryo tuman ixtisoslashtirilgan maktabida “Adolat” sotsial demokratik partiyasining Amudaryo tuman Kengashi tomonidan “Vatan kelajagi yoshlar qoʻlida” loyihasi doirasida tashkil etilgan “Konstitutsiya bilimdoni” koʻrik-tanlovining tuman bosqichi boʻlib oʻtdi.

Tadbirda Oʻzbekiston “Adolat” sotsial demokratik partiyasi tuman Kengashi raisi Oʻktam Yoʻldoshev soʻzga chiqdi va bu kabi tanlovlar yoshlarning huquqiy va siyosiy bilimlarini yuksaltirish, ularni Oʻzbekiston Respublikasi Konstitutsiyasi va amaldagi boshqa qonun hujjatlariga hurmat ruhida tarbiyalash, yoshlarning faol fuqarolik pozitsiyasini yanada mustahkamlashda alohida ahamiyat kasb etishini taʼkidlab oʻtdi.

Shuningdek, Oʻzbekiston “Adolat” sotsial-demokratik partiyasi davlat siyosatini qoʻllab-quvvatlagan holda ijtimoiy adolat, qonun ustuvorligi va barcha fuqarolarning qonun oldida tengligi, konstitutsiyaviy huquq hamda erkinliklarini taʼminlash, jamiyatda, ayniqsa, yoshlar orasida huquqiy madaniyatni shakllantirishni oʻz ustuvor vazifalaridan deb belgilaganligini alohida eʼtirof etdi.

Shundan soʻng, ishtirokchilarni adolatli baholash va jarayonni nazorat qilib borilishini taʼminlash maqsadida tanlov nizomiga koʻra hakamlar hayʼati saylab olindi. Hayʼat aʼzoligiga partiya fraktsiyasidan Xalq deputatlari tuman Kengashi deputati Mansur Oʻrozboyev, “Adolat” sotsial-demokratik partiyasi tuman Kengashi raisi Oʻktam Yoʻldoshev, partiyaning xotin-qizlar qanoti raisi Nasiba Hayitmurodova, Yangiobod mahalla fuqarolar yigʻini yoshlar yetakchisi Farrux Qodirberganovlar bir ovozdan maʼqullandi.

Tanlovda Prezident taʼlim muassasalari agentligi tizimidagi Amudaryo tuman ixtisoslashtirilgan maktabining 11-sinf oʻquvchisi Asaloy Baxtiyorova, Amudaryo muhandislik texnukumining 2-kurs talabasi Shahlo Ibodullayeva, 40-sonli maktabning 11-sinf oʻquvchisi Shirin Sharipovalar gʻoliblik uchun tengdoshlari bilan oʻzaro bahsga kirishishdi.

Tanlov nizomiga asosan ishtirokchilarning bilimlari “Tanishuv”, “Savol-javob” hamda “Erkin mavzu” shartlari asosida baholab borildi.

Jarayon davomida yoshlar maxsus tayyorlangan savollarga batafsil javob berishdi va Oʻzbekiston Respublikasi Konstitutsiyasi hamda amaldagi Qonun hujjatlaridan xabardorligini, siyosiy-huquqiy bilimlarini namoyon etishdi.

Koʻrik-tanlov ishtirokchilari oʻz chiqishlarida Konstitutsiya va qonunlarni bilgan kishi oʻz xatti-harakatini qonun doirasida amalga oshirishini, boshqalarning hamda jamiyat va davlatning huquq va erkini hurmat qilishini qayd etishdi.

Hakamlar hayʼatining yakuniy xulosalariga koʻra 40-sonli maktabning 11-sinf oʻquvchisi Shirin Sharipova 1-oʻrin, Amudaryo muhandislik texnikumining 2-kurs talabasi Shahlo Ibodullayeva 2-oʻrin, Prezident taʼlim muassasalari agentligi tizimidagi Amudaryo tuman ixtisoslashtirilgan maktabining 11-sinf oʻquvchisi Asaloy Baxtiyorova 3-oʻrinni egalladi. Ishtirokchilar faxriy yorliq hamda esdalik sovgʻalari bilan taqdirlandi. Tanlovda 1-oʻrinni qoʻlga kiritgan Shirin Sharipovaga Qoraqalpogʻiston Respublikasi bosqichiga yoʻllanma berildi.

Partiya tomonidan anʼanaviy tarzda oʻtkazib kelinayotgan “Konstitutsiya bilimdoni” koʻrik-tanlovi oʻquvchi-yoshlarning huquqiy savodxonligini oshirish bilan birga ularni Konstitutsiyaning har bir moddasini uqib olishga, mazmunan anglashga undashi bilan ahamiyatlidir.

Shohzod Qurbonboyev, QDU talabasi.