Amudaryo tumani hokimi Sultonboy Yoʻldoshevning tibbiyot xodimlari kuni munosabati bilan soha vakillariga BAYRAM TABRIGI

Aziz shifokor va hamshiralar, qadrli salomatlik posbonlari!

Avvalo, inson sogʻligʻini saqlash va mustahkamlashdek olijanob ishga oʻz hayotini bagʻishlagan Siz azizlarni mamlakatimizda keng nishonlanayotgan Tibbiyot xodimlari kuni munosabati bilan tuman hokimligi, qolaversa butun amudaryoliklar nomidan chin qalbimdan tabriklayman!

Inson borki, hayoti davomida albatta shifokor yordamiga ehtiyoj sezadi. Sogʻlom insongina oilasiga naf keltirib, davlat va jamiyat rivojiga hissa qoʻshadi. Shu boisdan ham, aholi salomatligini asrash, tibbiyot xodimlarining mehnatini eʼzozlash va ragʻbatlantirish davlat siyosatining ustuvor vazifalaridan hisoblanadi.

Mamlakatimizda soʻnggi yillarda bu sohada ham salmoqli ishlar amalga oshirilmoqda. Sogʻlikni saqlash tizimiga ilgʻor texnologiyalar joriy qilinib, tibbiyot maskanlarining moddiy-texnik bazasi mustahkamlanmoqda. Eng chekka qishloqlarda ham tibbiy punktlar, oilaviy poliklinikalar tashkil qilinib, aholi malakali tibbiy xizmat bilan toʻliq qamrab olinmoqda. Eng muhimi, tibbiyot xodimlarining ish haqlarini oshirish, ijtimoiy muhofazasini yaxshilashga eʼtibor qaratilib, jamiyatda shifokorlarning nufuzini oshirish borasida tizimli ishlar qilinmoqda.

Amudaryo tumanida ham tibbiyot sohasida amalga oshirilayotgan islohotlar, oʻzgarishlar amalda oʻzining ijobiy natijalarini koʻrsatmoqda. Soha xodimlari fuqarolarga sifatli tibbiy xizmat koʻrsatish, aholi reproduktiv salomatligini mustahkamlash, onalar va bolalar salomatligini asrash, ularni patronaj xizmati va profilaktik koʻriklar bilan qamrab olish borasidagi masʼuliyatli vazifalarini fidoyilik bilan bajarishmoqda.

Oʻz navbatida davlatimiz va hukumatimiz tomonidan ham tibbiy xizmat sifatini yanada yaxshilash maqsadida qator amaliy ishlar qilinmoqda. Sohaga har yili mahalliy byudjet hisobidan ham mablagʻ yoʻnaltirilib, tibbiyot maskanlariga turli uskuna va jihozlar xarid qilinmoqda.

Masalan, birgina joriy yilda tibbiy asbob-uskunalar xaridiga 1,2 mlrd soʻm, 2021-yilda 1,3 mlrd soʻm, 2020-yilda 2,1 mlrd soʻm mablagʻ ajratildi. Natijada, 7 ta oilaviy poliklinikalarda aholiga tibbiy xizmat koʻrsatish sifati ancha oshdi.

11 ta olis va chekka mahallalarga maxsus konteynerlar oʻrnatilib, 1,3 mlrd soʻmlik taʼmirlash ishlari olib borilmoqda. Bu oʻz navbatida tuman markazidan olis hududlarda yashovchi 32 ming nafar aholiga tibbiy xizmat koʻrsatishga xizmat qiladi.

Qoraqalpogʻiston Respublikasi byudjeti hisobidan 4,9 mlrd soʻm evaziga 2 ta obʼektda, yaʼni Qangli oilaviy shifokor punkti va 72-sonli oilaviy poliklinikada qurilish-taʼmirlash ishlari amalga oshirilmoqda.

Mangʻit shahrida qiymati 14,3 mlrd. soʻmlik 90-oʻrinli yangi tugʻruq boʻlimi binosini qurish ishlari davom ettirilmoqda. Bularning barchasi aholiga tibbiy xizmat koʻrsatish sifatini yangi bosqichga olib chiqish va tibbiyot xodimlari uchun munosib shart-sharoitlar yaratish yoʻlida amalga oshirilayotgan islohotlar natijasidir.

Qadrli tibbiyot xodimlari!

Mamlakatimizning taraqqiy etishi, millat bardavomligi eng avvalo aholi salomatligiga bogʻliq. Bu borada esa tajribali va malakali, oʻzgalar salomatligi uchun oʻz oromidan voz kechib mehnat qilayotgan Siz kabi aziz va qadrli tibbiyot xodimlarining oʻrni alohida.

Insonning hali xomila paytidan tortib, dunyoga kelishi, sogʻlom va barkamol boʻlib ulgʻayishi, voyaga yetishi jarayonida, bir soʻz bilan aytganda, umri davomida salomatlik posbonlarining koʻmagi va tavsiyalariga ehtiyoj boʻladi. Shunday ekan, har birimiz Sizning mashaqqatli mehnatlaringizni eʼtirof etib, fidokorona xizmatlaringiz uchun taʼzim qilamiz.

Fursatdan foydalanib, Siz azizlarni, siz orqali yurtimizdagi barcha tibbiyot xodimlarini kasb bayrami bilan tabriklaymiz! Hamisha mashaqqatli mehnatlaringizning rohatini koʻrib, sharafli kasbingizdan kamol topib, davlatimiz va jamiyatimiz, el-yurtning eʼzozida yurishingizga tilakdoshmiz!

Bayramingiz muborak boʻlsin, qadrli tibbiyot sohasi xodimlari!