NAZARXON OVULIDAGI HOKIM VA YoShLAR UChRAShUVIDA MUAMMOLAR OʻRGANILDI

Mamlakatimizda yoshlar hayotida sodir boʻlayotgan muammolarni hal qilish, ularni kasb-hunarga oʻrgatish, faoliyatini rivojlantirishga koʻmaklashish maqsadida tizimli ishlar amalga oshirilmoqda. Buning natijasida yuzlab yoshlar hayotida ijobiy oʻzgarishlar kuzatilmoqda. Muntazam ravishda tashkil qilib kelinayotgan “Hokim va yoshlar” uchrashuvi ham kelajak vorislarining jamiyatda oʻz oʻrnini topishida muhim ahamiyat kasb etmoqda.

Shu mazmundagi navbatdagi uchrashuv Amudaryo tumanining Nazarxon ovul fuqarolar yigʻini binosida boʻlib oʻtdi. Uchrashuvda tuman hokimi Sultonboy Yoʻldashev, Prezidentning tumandagi Xalq qabulxonasi mudiri Erkin Rajabov, yoshlar siyosati, ijtimoiy rivojlantirish va manaviy-maʼrifiy ishlar boʻyicha hokim oʻrinbosari Mahmud Shermetov, Yoshlar ishlari agentligi tuman boʻlimi boshligʻi Sardor Ismoilov hamda maʼsul tashkilot xodimlari tomonidan hudud yoshlarining muammolari oʻrganildi.

Tuman hokimi Sultonboy Yoʻldashev hamda Prezidentning tumandagi Xalq qabulxonasi mudiri Erkin Rajabovlar yurtimizda soʻnggi paytlarda amalga oshirilayotgan islohotlar, ularga asos boʻlayotgan Prezident va hukumat qarorlarining mazmun-mohiyati xususida soʻz yuritishdi. Ularning maʼnan yetuk, jismonan barkamol, yurt kelajagini yaratishga qodir insonlar boʻlib ulgʻayishga chorlashdi. Yoshlarga yaratilayotgan imkoniyatlardan maqsadli foydalanib kasb oʻrganishga, mutaxassis kadr sifatida yetishishga va eng muhimi Vatan uchun kerakli farzand boʻlishga daʼvat etishdi.

Yoshlar siyosati, ijtimoiy rivojlantirish va manaviy-maʼrifiy ishlar boʻyicha hokim oʻrinbosari Mahmud Shermetov hamda Yoshlar ishlari agentligi tuman boʻlimi boshligʻi Sardor Ismoilovlar yoshlar hayotiga daxldor qabul qilingan Qonun, Farmoyish va boshqa shu kabi huquqiy hujjatlarlarning mazmun-mohiyati haqida soʻzlab, tumanda amalga oshirilayotgan ishlar xususida maʼlumot berishdi. “Yoshlar daftari”ga roʻyxatidagi yoshlar uchun amalga oshirilgan ishlar haqida aytib oʻtildi.

Maʼnaviy-maʼrifiy tadbirlar, intellektual oʻyinlar, aqliy-ijodiy va jismoniy tanlovlarda natijali ishtirok etishlari ularning ruhan barkamol, jismonan sogʻlom avlod sifatida kamol topishiga asos boʻlishi hayotiy misollar bilan tushuntirildi.

Shuningdek, Yoshlar ishlari agentligi tuman boʻlimi tomonidan kichik biznes va tadbirkorlik uchun yoshlarga keng imkoniyatlar berilayotganligi, ulardan foydalanib oʻz tadbirkorligini yoʻlga qoʻygan yoshlar haqida ham maʼlumotlar berildi.

Uchrashuvda yoshlar oʻzlarini qiziqtirgan savollar, takliflar bilan faol ishtirok etishdi. Oʻzlarini qiynab kelayotgan ijtimoiy muammolar xususida fikr va takliflarini bildirishdi.

Jarayon davomida jami 7 ta murojaat kelib tushdi. Murojaat egalaridan 4 nafariga shu joyning oʻzida tushuntirish ishlari olib borildi. Shuningdek, 3 nafar yoshning murojaati boʻyicha esa tegishli mutasaddilarga yordam koʻrsatish topshirigʻi berildi.

Shohzod Qurbonboyev.