Toshyoplik oʻqituvchi Prezident farmoniga koʻra davlat mukofoti bilan taqdirlandi

Hech eʼtibor berganmisiz, qilgan ezgu ishlari uchun kishini ota-onangga,  ustozingga rahmat, deya alqashadi. Demak, barchamizning bu hayotdagi ezgu amallarimizda ota-onamiz qatori taʼlim-tarbiya bergan ustozlarimizning ham hissasi bor.

Shu boisdan ham kim boʻlmaylik, necha yoshga kirmaylik, ustozlarimizning hurmatini joyiga qoʻyishga intilamiz, yaxshi ishlarimiz bilan ularni quvontirgimiz keladi.

Toshyop ovulida 1968-yilda tugʻilgan Gulbahor Saidova mashaqqatini his qilib tursa-da, oʻqituvchilikdek sharafli kasbni tanladi. U shu maqsadda oʻrta maktabni tugatgach, Toshkent davlat chet tillari pedagogika institutiga oʻqishga kirdi va frantsuz tili va milliy maktablarda rus tili oʻqituvchisi mutaxassisligiga ega boʻldi.

Gulbahor oliygohni tugatgach, oʻzi taʼlim olgan maktabida ovulining hammasi tanish va aziz bolalariga frantsuz tilidan saboq bera boshladi. Shundan beri oradan 32-yil vaqt oʻtdi. Necha saf bolalar maktabga qabul qilinib, hayotga uchirma boʻldi. Muallima ularning turli mutaxassislik, kasb-korli boʻlishida hissasi ulkan ekanligini qalban his qiladi, quvonadi. U oʻz fanini oʻquvchilarga chuqurroq singdirish uchun astoydil intildi, oʻzi ham oʻqib-oʻrganishdan charchamadi. Mashgʻulotlariga oʻquvchilar diqqat-eʼtiborini jalb qilish uchun yangi-yangi dars uslublarini qoʻlladi. Natijada oʻquvchilari turli sinovlarda, fan olimpiadalarida muvaffaqiyatli ishtirok etib, ustozi yuzini yorugʻ qildi.

Gulbahor Saidova oʻz kasbiga mehri, dars oʻtishdagi oʻziga xos mahorati, chuqur bilimi tufayli oliy toifali oʻqituvchi, Qoraqalpogʻiston Xalq taʼlimi aʼlochisi boʻldi. 2011-yilda mamlakatimizning bir guruh mahoratli va iqtidorli frantsuz tili oʻqituvchilari qatorida Frantsiyaning Ruaya shahrida bir oylik malaka oshirish kursida oʻqib qaytdi. Bu uning oʻqituvchilik faoliyatida oʻziga xos yorqin davr boʻldi. Frantsuz tilida, shu til vatanida shu tilda juda ravon gapirishi, soʻzlarni erkin talaffuz qila olishi u yerdagi oʻqituvchilarni ham befarq qoldirmadi.

Frantsiyadan Gulbahor Saidova yanada yuksak orzular bilan qaytdi va faoliyatini davom ettirdi. Uning oʻqib, oliy maʼlumotli boʻlib, turli sohalarda ishlayotgan shogirdlari bisyor ayrimlari oʻzi bilan shu maktabda birga ishlaydi.

Kasb mashaqqati-yu oila tashvishlarini baravar yengib, turmush oʻrtogʻi Komiljon Yusupov bilan ahillikda farzandlari ham Kamronbek, Qayumjon, Marjonalarni ham munosib insonlar qilib voyaga yetkazishmoqda. Oila toʻngʻichi oliygoh talabasi. Qayumjon ham oʻqish niyatida, Marjona hali maktab oʻquvchisi.

Yaqinda Gulbahor Saidovaning hayotida unutilmas voqea boʻldi: 1-oktyabr – Oʻqituvchilar va murabbiylar kuni munosabati bilan Prezident Farmoniga koʻra II Darajali “Sogʻlom avlod uchun” ordeni bilan taqdirlandi.

- Bu eʼtirof menga yanada samarali ishlashga ragʻbat berdi, - deydi quvonib qahramonim.

Chindan-da umr boʻyi ezgu niyatlar bilan mehnat qilsang, mehnatlaring qadrlansa, eʼtirof etilsa, bu – ulkan baxt emasmi?

Fidoyi mehnatlari tufayli ana shunday nurli manzillarga yetgan muallimaga orden qutlugʻ boʻlsin, deymiz.

Oygul RAJABOVA.