Тошёплик ўқитувчи Президент фармонига кўра давлат мукофоти билан тақдирланди

Ҳеч эътибор берганмисиз, қилган эзгу ишлари учун кишини ота-онангга,  устозингга раҳмат, дея алқашади. Демак, барчамизнинг бу ҳаётдаги эзгу амалларимизда ота-онамиз қатори таълим-тарбия берган устозларимизнинг ҳам ҳиссаси бор.

Шу боисдан ҳам ким бўлмайлик, неча ёшга кирмайлик, устозларимизнинг ҳурматини жойига қўйишга интиламиз, яхши ишларимиз билан уларни қувонтиргимиз келади.

Тошёп овулида 1968 йилда туғилган Гулбаҳор Саидова машаққатини ҳис қилиб турса-да, ўқитувчиликдек шарафли касбни танлади. У шу мақсадда ўрта мактабни тугатгач, Тошкент давлат чет тиллари педагогика институтига ўқишга кирди ва француз тили ва миллий мактабларда рус тили ўқитувчиси мутахассислигига эга бўлди.

Гулбаҳор олийгоҳни тугатгач, ўзи таълим олган мактабида овулининг ҳаммаси таниш ва азиз болаларига француз тилидан сабоқ бера бошлади. Шундан бери орадан 32 йил вақт ўтди. Неча саф болалар мактабга қабул қилиниб, ҳаётга учирма бўлди. Муаллима уларнинг турли мутахассислик, касб-корли бўлишида ҳиссаси улкан эканлигини қалбан ҳис қилади, қувонади. У ўз фанини ўқувчиларга чуқурроқ сингдириш учун астойдил интилди, ўзи ҳам ўқиб-ўрганишдан чарчамади. Машғулотларига ўқувчилар диққат-эътиборини жалб қилиш учун янги-янги дарс услубларини қўллади. Натижада ўқувчилари турли синовларда, фан олимпиадаларида муваффақиятли иштирок этиб, устози юзини ёруғ қилди.

Гулбаҳор Саидова ўз касбига меҳри, дарс ўтишдаги ўзига хос маҳорати, чуқур билими туфайли олий тоифали ўқитувчи, Қорақалпоғистон Халқ таълими аълочиси бўлди. 2011 йилда мамлакатимизнинг бир гуруҳ маҳоратли ва иқтидорли француз тили ўқитувчилари қаторида Франциянинг Руая шаҳрида бир ойлик малака ошириш курсида ўқиб қайтди. Бу унинг ўқитувчилик фаолиятида ўзига хос ёрқин давр бўлди. Француз тилида, шу тил ватанида шу тилда жуда равон гапириши, сўзларни эркин талаффуз қила олиши у ердаги ўқитувчиларни ҳам бефарқ қолдирмади.

Франциядан Гулбаҳор Саидова янада юксак орзулар билан қайтди ва фаолиятини давом эттирди. Унинг ўқиб, олий маълумотли бўлиб, турли соҳаларда ишлаётган шогирдлари бисёр айримлари ўзи билан шу мактабда бирга ишлайди.

Касб машаққати-ю оила ташвишларини баравар енгиб, турмуш ўртоғи Комилжон Юсупов билан аҳилликда фарзандлари ҳам Камронбек, Қаюмжон, Маржоналарни ҳам муносиб инсонлар қилиб вояга етказишмоқда. Оила тўнғичи олийгоҳ талабаси. Қаюмжон ҳам ўқиш ниятида, Маржона ҳали мактаб ўқувчиси.

Яқинда Гулбаҳор Саидованинг ҳаётида унутилмас воқеа бўлди: 1 октябрь – Ўқитувчилар ва мураббийлар куни муносабати билан Президент Фармонига кўра II Даражали “Соғлом авлод учун” ордени билан тақдирланди.

- Бу эътироф менга янада самарали ишлашга рағбат берди, - дейди қувониб қаҳрамоним.

Чиндан-да умр бўйи эзгу ниятлар билан меҳнат қилсанг, меҳнатларинг қадрланса, эътироф этилса, бу – улкан бахт эмасми?

Фидойи меҳнатлари туфайли ана шундай нурли манзилларга етган муаллимага орден қутлуғ бўлсин, деймиз.

Ойгул РАЖАБОВА.