Kelasi haftada mamlakatimiz boʻylab “Keksalar haftaligi”ni oʻtkaziladi

Mamlakatimizda muhtaram Prezidentimizning tashabbusi bilan keksa avlod vakillarini har tomonlama qoʻllab-quvvatlash, ularning jamiyat, oila va mahallalardagi tinchlik va osoyishtalikni taʼminlash, shuningdek yosh avlodni xalqimizning koʻp asrlik anʼanalarini hurmat qilish ruhida tarbiyalash ishidagi rolini oshirishga qaratilgan keng koʻlamli chora-tadbirlar amalga oshirib kelinmoqda.

Jumladan, Oʻzbekiston Respublikasi Vazirlar Mahkamasining 2019-yil 27-sentyabrdagi 816-sonli qarori bilan har yili oktyabr oyining birinchi haftasi “Keksalar haftaligi” deb belgilangani keksa avlod vakillariga boʻlgan hurmat va eʼtiborning yana bir ifodasidir.

30-sentyabr kuni Amudaryo tumani hokimligi binosida boʻlib oʻtgan yigʻilishda ushbu haftalik doirasidagi tadbirlarni yuqori saviyada oʻtkazish boʻyicha har bir mahallada amalga oshirilishi lozim boʻlgan muhim chora-tadbirlar belgilab olindi.

Yigʻilishda tuman hokimining birinchi oʻrinbosari Rashid Salayev, Mahalla va nuroniylarni qoʻllab-quvvatlash boʻlimi boshligʻi Gʻulomjon Duysenbayev hamda “Keksalar haftaligi”ni yuqori saviyada oʻtkazish maqsadida tumandagi turli korxona-tashkilot rahbarlaridan tuzilgan ishchi guruh aʼzolari ishtirok etishdi.

Tuman hokimining birinchi oʻrinbosari Rashid Salayev haftalik doirasida har bir keksa holidan xabar olish, ularga mehr-muruvvat koʻrsatish, ijtimoy qoʻllab-quvvatlash borasida amalga oshirilib kelinayotgan saʼy-harakatlarni yanada jadallashtirish lozimligini aytib oʻtdi.

Mahalla va nuroniylarni qoʻllab-quvvatlash boʻlimi boshligʻi Gʻulomjon Duysenbayev 3-9-oktyabr kunlari “Keksalarni eʼozlash, ularga hurmat ehtirom koʻrsatish-xalqimizga xos ezgu fazilat” degan bosh gʻoyani oʻzida mujassam etgan holda keksalar haftaligi doirasida amalga oshiriladigan chora-tadbirlar dasturi bilan barchani tanishtirdi.

Taʼkidlanganidek, mazkur haftalik davomida mahallalarda usta-hunarmandlar, kulollar tomonidan yaratilgan milliy mahsulot turlari, turli millat vakillarining amaliy sanʼat namunalari koʻrgazmasi tashkil etiladi. Shuningdek, keksa avlod vakillari uchun Toshkent shahri va viloyatlar hamda Qoraqalpogʻiston Respublikasining diqqatga sazovor joylariga sayohat tashkil etiladi. Qolaversa, barcha ziyoratgoh va qabristonlarda hamda yakka-yolgʻiz keksalarning xonadonlarida hasharlar oʻtkaziladi.

Shu kuni tuman Mahalla va nuroniylarni qoʻllab-quvvatlash boʻlimi binosida ham shu mavzuda yigʻilish oʻtkazildi. Yigʻilishda ovul va mahalla fuqarolar yigʻinlari raislari ishtirok etdi.

Yigʻilganlarga haftalik doirasida keksalarning uy-joy, maishiy muammolarini hal etishga, sanatoriya-kurortlarda sogʻlomlashtiish va davolanishlari uchun sharoitlar yaratilishiga alohida eʼtibor berilib, har bir mahallada yashovchi keksa avlod vakillari reja asosida chuqurlashtirilgan tibbiy koʻrikdan oʻtkazilib, sogʻligʻini tiklashlari uchun amaliy yordamlar berilishi lozimligi alohida taʼkidlandi.

Xotin-qizlarni qoʻllab-quvvatlash davlat maqsadli jamgʻarmasi bilan birgalikda hududlarda nogironligi bor keksa ayollarga reabilitatsiya-texnik vositalari taqdim etilib, ehtiyojmandlarini bepul jarrohlik yoʻli bilan sogʻlomlashtirish choralari koʻriladi.

Shu oʻrinda aytish kerakki, keyingi yillarda nuroniylarning nafaqa va pensiyalarini oʻz vaqtida, ular istagan shaklda yetkazib berish, ularni moddiy va maʼnaviy qoʻllab-quvvatlash, salomatligiga eʼtiborni kuchaytirish borasida amalga oshirilayotgan ijobiy ishlar keksalarimizning farovon hayotida oʻz aksini topmoqda.

“Keksalar haftaligi” va shu singari ijtimoiy loyihalar yoshi ulugʻ insonlar mamlakatimizda doimo eʼtibor va eʼzozda ekanini yana bir bor tasdiqlaydi.

F.Eshimbetova, tuman hokimligining Axborot xizmati rahbari