BOLAJONLAR YOʻL HARAKATI QOIDALARINI OʻRGANIShMOQDA

Yoʻl qoidasiga amal qilish – har bir fuqaro zimmasidagi burchdir. Chunki inson yoʻl qoidasiga amal qilish orqali nafaqat oʻz sogʻligi va hayotini, balki atrofidagilarning, shu barobarida transport vositasi haydovchisining ham hayotini xavf-xatardan himoya qiladi.
Mangʻit shahridagi 5-sonli maktabgacha taʼlim tashkilotida bolajonlar uchun bu borada rejadagi maxsus mashgʻulotlardan tashqari, amaliy va koʻrgazmali davra suhbatlari, mutaxassislar ishtirokidagi savol-javob kechalari ham tashkil etilib, ularning yoʻl harakat qoidalarini mukammal oʻrganishlariga alohida eʼtibor qaratilmoqda.

Yaqinda MTTda tuman IIB xodimi Nodirbek Qurbonboyev ishtirokida “Yoʻl qoidasi – umr foydasi” mavzusida koʻrgazmali davra suhbati boʻlib oʻtdi. Unda Nodirbek Qurbonboyev bolajonlarga svetafor chiroqlarining maʼnolari, ularga amal qilish qoidalari, shuningdek, serqatnov yoʻllar, chorrahalarga oʻrnatilgan yoʻl belgilari, bu belgilarning qanday maʼno va harakatlarni anglatishi haqida batafsil tushunchalar berdi.

Maktabgacha taʼlim guruhi va kichik guruhlar tarbiyalanuvchilari ham yoʻl belgilari yuzasidan Nodirbek akasiga savollar berishdi va shartli yoʻl belgilariga rioya etish qoidalari boʻyicha oʻz bilimlarini amalda namoyish etib berdilar.
Shundan soʻng, bolajonlar svetafor, yoʻl harakati qoidalari, Vatan, doʻstlik va tinchlik mavzularida sheʼr va qoʻshiqlar aytishib, raqslar ijro etishdi
Samimiy va doʻstona kayfiyatda oʻtgan davra suhbati bolajonlarda katta taassurot qoldirdi.

Xolida HAYITBOYeVA, 5-sonli MTT tarbiyachisi.