Amudaryo tumani boʻyicha yil boshidan buyon 25 mingdan ortiq shaxsga salkam 200 mlrd soʻm pensiya va nafaqa pullari toʻlandi

Mamlakatimizda fuqarolarni ijtimoiy qoʻllab-quvvatlash masalasiga doimiy eʼtibor qaratib kelinmoqda. Bu borada Byudjetdan tashqari pensiya jamgʻarmasining Amudaryo tuman boʻlimi tomonidan ham tizimli ishlar amalga oshirilmoqda.

Boʻlim xodimlari qonun hujjatlarida belgilangan tartibda fuqarolarning davlat pensiya taʼminotini tashkil etish, fuqarolarga pensiyalar, ijtimoiy nafaqalar, kompensatsiya toʻlovlari va boshqa toʻlovlarni tayinlash, pensiyalar va boshqa toʻlovlar miqdorlarining qayta hisoblab chiqilishini taʼminlash ishlarini sifatli tarzda amalga oshirib kelmoqdalar. Shuningdek, tuman miqyosida pensiyalar va boshqa toʻlovlarni toʻliq hajmda moliyalashtirish va toʻlanishini tashkil etish, ular boʻyicha hisob va hisobotni yuritish ham mazkur boʻlim xodimlarining zimmasiga yuklatilgan.

Bugungi kunda boʻlimda 21 ta shtat birligi mavjud boʻlib, shundan, Pensiya, nafaqa va boshqa toʻlovlarni tayinlash, qayta hisoblash hamda toʻlovlarni tashkil qilish shuʼbasida 11 nafar xodim, "Ijtimoiy himoya yagona reyestri" axborot tizimi orqali davlat ijtimoiy xizmatlari va yordamini tadim etish shuʼbasida 5 nafar xodim faoliyat yuritib kelmoqda.

Amudaryo tumani boʻyicha 2022-yil 1-sentyabr holatiga pensiya va nafaka oluvchilar soni 25 ming 332 nafarni tashkil qiladi. Joriy yilning yanvar-sentyabr oylarida ularga jami 193,1 mlrd. soʻmlik pensiya va nafaqalar toʻlab berildi. Mazkur shaxslarning 18 ming 515 nafari yoshga doir, 2654 nafari nogironlik, 1141 nafari boquvchisini yoʻqotganlik pensiyasini oluvchi  pensioner, 3022 nafari zarur mehnat stajiga ega boʻlmagan ijtimoiy nafaqa oluvchi fuqarolardir.

Shuningdek, boʻlim mutaxassislari tomonidan oyma-oy toʻlangan pensiya va ijtimoiy nafaqalarning oʻz vaqtida va toʻliq toʻlanishi yuzasidan doimiy monitoring ishlari olib borilmoqda.

Bundan tashqari, mahallalar masʼul xodimlari tomonidan kam taʼminlangan oilalarga bollalar nafaqasi va moddiy yordamlar tayinlash boʻyicha taqdim etilgan hujjatlar ham oʻrganilib, belgilangan tartibda moliyalashtirilmoqda. “Ijtimoiy himoya yagona reyestri" axborot tizimi orqali joriy yil 1-sentyabr holatiga jami 22 ming 496 ta kam taʼminlangan oilalarning 21 ming 206 tasiga bolalar nafaqasi, 1290 tasiga moddiy yordam pullari tayinlandi va ularga toʻqqiz oy davomida jami 83,8 mlrd. soʻm toʻlandi.

Oʻzbekiston Respublikasi Prezidentining 2021-yil 4-maydagi “Fuqarolarga davlat pensiyalarini yetkazish tizimini yanada takomillashtirish chora-tadbirlari toʻgʻrisida”gi qaroriga muvofiq Byudjetdan tashqari pensiya jamgʻarmasining Amudaryo tuman boʻlimida ham 2022-yilning 1-iyulidan boshlab davlat pensiyalarini fuqarolarning faqat pasport yoki identifikatsiya ID-kartasi orqali tayinlash tartibi yoʻlga qoʻyildi. Joriy yilning 1-iyulidan 1-sentyabriga qadar 256 nafar fuqarolarga pensiya va nafaqalar mazkur tartib asosida tayinlandi.

Oʻzbekiston Respublikasi Moliya vazirligi huzuridagi Byudjetdan tashqari pensiya jamgʻarmasi Qoralpogʻiston Respublikasi Amudaryo tuman boʻlimi xodimlari aholini ijtimoiy himoya qilish borasida oʻrnatilgan tartib-taomillar va qoidalarga qatʼiy rioya qilgan holda samarali faoliyat yuritib, aholiga beminnat xizmat koʻrsatmoqdalar.

Fotima Eshimbetova