Oʻzbekiston Respublikasi Prezidenti Farmoni targʻibotiga bagʻishlangan yigʻilish boʻlib oʻtdi

Maʼlumki, 2022-yil 31-avgust kuni Oʻzbekiston Respublikasi Prezidentining “Qoraqalpogʻiston Recpublikasida tadbirkorlik, innovatsion texnologiyalar va infratuzilmalarni jadal surʼatlarda rivojlantirish orqali aholi farovonligini oshirishning qoʻshimcha chora-tadbirlari toʻgʻrisida”gi Farmoni qabul qilingan edi.

Farmonning mazmun-mohiyatini keng jamoatchilik vakillariga yetkazish hamda tushintirish ishlarini olib borish maqsadida targʻibot tadbirlari, yigʻilishlar oʻtkazilib kelinmoqda.  Ana shunday yigʻilishlardan biri 13-sentyabr kuni Amudaryo tumani hokimligi binosida boʻlib oʻtdi.

Unda tuman hokimning birinchi oʻrinbosari Rashid Salayev, 3-sektor rahbari tuman Ichki ishlar boʻlimi boshligʻi Jamaladdin Yusupov, 4-sektor rahbari tuman Davlat soliq inspektsiyasi boshligʻi Aydos Seitov, Majburiy ijro byurosi tuman boʻlimi boshligʻi Mirtemir Davletmuratov hamda mahalla raislari, hokim yordamchilari ishtirok etishdi.

Yigʻilishda Qoraqalpogʻiston aholisining yashash sharoitini yaxshilash, tadbirkor, fermer, tomorqa yer egalariga yaratilgan qulaylik va yengilliklar, yoshlar uchun ajratilan qoʻshimcha qabul kvotalari haqida aytib oʻtildi.

Taʼkidlanganidek, Farmonda qishloq xoʻjaligi mahsulotlari yetishtirishni koʻpaytirish, aholi bandligini taʼminlash va daromadini oshirish hamda qulay agrobiznes muhitini yaratishga alohida eʼtibor qaratilgan.

Shu maqsadda fermer xoʻjaliklari va klasterlar tasarrufidagi paxta va gʻalladan qisqartiriladigan, aholi punktiga yaqin va suv taʼminoti yaxshi boʻlgan hududlardagi yerlar tuman zaxirasiga qaytarib olinadi. Ushbu yerlar dehqon xoʻjaligini tashkil etgan holda sabzavotchilik, poliz, dukkakli, moyli ekinlar, kartoshka yetishtirish kabi loyihalarni amalga oshirish uchun fuqarolarga 2 gektargacha boʻlgan oʻlchamda ochiq elektron tanlov orqali 30-yilga ijaraga beriladi. Albatta, bunday imkoniyat oʻz tadbirkorligini qishloq xoʻjalagi mahsulotlarini yetishtirish orqali yoʻlga qoʻyishni istagan fuqarolar uchun muhim ijobiy yangilik boʻldi.

Yigʻilishda soʻzga chiqqanlar, oilaviy tadbirkorlikni rivojlantirish, investitsiya loyihalarini amalga oshirish, yer va suv resurslaridan samarali foydalanish boʻyicha Farmonda belgilangan ustuvor yoʻnalishlar haqida batafsil maʼlumot berdilar.

Yigʻilishda yuridik va jismoniy shaxslarning soliqlardan qarzdorliklarini bartaraf qilish masalasida ham soʻz yuritildi. Maʼlumki, soliq solinadigan mulkka ega boʻlgan jismoniy shaxslar mulk soligʻi toʻlovchilari hisoblanadi. Koʻchmas mulk, uy-joylar, kvartiralar, dala hovli, garaj va boshqa imoratlar, qonun hujjatlarida belgilangan tartibda ajratilgan yer uchastkalari soliq solish obʼekti sanaladi.

Jismoniy shaxslarning mulkiga solinadigan soliqni hisoblab chiqarish tartibi davlat soliq xizmati organlari tarafidan koʻchmas mulkka boʻlgan huquqlarni davlat roʻyxatidan oʻtkazuvchi idoraning maʼlumotlari asosida amalga oshiriladi.

Koʻchmas mulkka boʻlgan huquqlarni davlat roʻyxatidan oʻtkazuvchi idora soliq solish obʼekti joylashgan joydagi davlat soliq xizmati organlariga har yili obʼektning inventarizatsiya hajmi va uning mulk egasini aniqlab, maʼlumotlarni shu obʼekt joylashgan hududdagi davlat soliq inspektsiyasiga topshiradi.

Ammo soliq toʻlovlariga befarqlik bilan qarayotgan kimsalar ham oramizda yoʻq emas. Mavjud qarzdorlikni bartaraf etish boʻyicha Bosh prokuratura huzuridagi Majburiy ijro byurosi bilan hamkorlikda aniq tadbirlar amalga oshirilyapti. Toʻlanmay qolayotgan qarzdorlikni fuqarolarning mol-mulkidan undirish boʻyicha soliq inspektsiyalari tomonidan ijro varaqalari yuborilmoqda.

Shu oʻrinda yurtdoshlarimizni mol-mulk, yer soligʻi va boshqa soliqlarni oʻz vaqtida toʻlashga chaqiramiz. Davlatimiz rivoji, farzandlarimiz kelajagi, bugungi obod va farovon turmushimiz uchun soliq toʻlovlarini vaqtida amalga oshirish muhim ahamiyat kasb etadi.

Tuman hokimligining Axborot xizmati.