Ўзбекистон Республикаси Президенти Фармони тарғиботига бағишланган йиғилиш бўлиб ўтди

Маълумки, 2022 йил 31 август куни Ўзбекистон Республикаси Президентининг “Қорақалпоғистон Реcпубликасида тадбиркорлик, инновацион технологиялар ва инфратузилмаларни жадал суръатларда ривожлантириш орқали аҳоли фаровонлигини оширишнинг қўшимча чора-тадбирлари тўғрисида”ги Фармони қабул қилинган эди.

Фармоннинг мазмун-моҳиятини кенг жамоатчилик вакилларига етказиш ҳамда тушинтириш ишларини олиб бориш мақсадида тарғибот тадбирлари, йиғилишлар ўтказилиб келинмоқда.  Ана шундай йиғилишлардан бири 13 сентябрь куни Амударё тумани ҳокимлиги биносида бўлиб ўтди.

Унда туман ҳокимнинг биринчи ўринбосари Рашид Салаев, 3-сектор раҳбари туман Ички ишлар бўлими бошлиғи Жамаладдин Юсупов, 4-сектор раҳбари туман Давлат солиқ инспекцияси бошлиғи Айдос Сеитов, Мажбурий ижро бюроси туман бўлими бошлиғи Миртемир Давлетмуратов ҳамда маҳалла раислари, ҳоким ёрдамчилари иштирок этишди.

Йиғилишда Қорақалпоғистон аҳолисининг яшаш шароитини яхшилаш, тадбиркор, фермер, томорқа ер эгаларига яратилган қулайлик ва енгилликлар, ёшлар учун ажратилан қўшимча қабул квоталари ҳақида айтиб ўтилди.

Таъкидланганидек, Фармонда қишлоқ хўжалиги маҳсулотлари етиштиришни кўпайтириш, аҳоли бандлигини таъминлаш ва даромадини ошириш ҳамда қулай агробизнес муҳитини яратишга алоҳида эътибор қаратилган.

Шу мақсадда фермер хўжаликлари ва кластерлар тасарруфидаги пахта ва ғалладан қисқартириладиган, аҳоли пунктига яқин ва сув таъминоти яхши бўлган ҳудудлардаги ерлар туман захирасига қайтариб олинади. Ушбу ерлар деҳқон хўжалигини ташкил этган ҳолда сабзавотчилик, полиз, дуккакли, мойли экинлар, картошка етиштириш каби лойиҳаларни амалга ошириш учун фуқароларга 2 гектаргача бўлган ўлчамда очиқ электрон танлов орқали 30 йилга ижарага берилади. Албатта, бундай имконият ўз тадбиркорлигини қишлоқ хўжалаги маҳсулотларини етиштириш орқали йўлга қўйишни истаган фуқаролар учун муҳим ижобий янгилик бўлди.

Йиғилишда сўзга чиққанлар, оилавий тадбиркорликни ривожлантириш, инвестиция лойиҳаларини амалга ошириш, ер ва сув ресурсларидан самарали фойдаланиш бўйича Фармонда белгиланган устувор йўналишлар ҳақида батафсил маълумот бердилар.

Йиғилишда юридик ва жисмоний шахсларнинг солиқлардан қарздорликларини бартараф қилиш масаласида ҳам сўз юритилди. Маълумки, солиқ солинадиган мулкка эга бўлган жисмоний шахслар мулк солиғи тўловчилари ҳисобланади. Кўчмас мулк, уй-жойлар, квартиралар, дала ҳовли, гараж ва бошқа иморатлар, қонун ҳужжатларида белгиланган тартибда ажратилган ер участкалари солиқ солиш объекти саналади.

Жисмоний шахсларнинг мулкига солинадиган солиқни ҳисоблаб чиқариш тартиби давлат солиқ хизмати органлари тарафидан кўчмас мулкка бўлган ҳуқуқларни давлат рўйхатидан ўтказувчи идоранинг маълумотлари асосида амалга оширилади.

Кўчмас мулкка бўлган ҳуқуқларни давлат рўйхатидан ўтказувчи идора солиқ солиш объекти жойлашган жойдаги давлат солиқ хизмати органларига ҳар йили объектнинг инвентаризация ҳажми ва унинг мулк эгасини аниқлаб, маълумотларни шу объект жойлашган ҳудуддаги давлат солиқ инспекциясига топширади.

Аммо солиқ тўловларига бефарқлик билан қараётган кимсалар ҳам орамизда йўқ эмас. Мавжуд қарздорликни бартараф этиш бўйича Бош прокуратура ҳузуридаги Мажбурий ижро бюроси билан ҳамкорликда аниқ тадбирлар амалга ошириляпти. Тўланмай қолаётган қарздорликни фуқароларнинг мол-мулкидан ундириш бўйича солиқ инспекциялари томонидан ижро варақалари юборилмоқда.

Шу ўринда юртдошларимизни мол-мулк, ер солиғи ва бошқа солиқларни ўз вақтида тўлашга чақирамиз. Давлатимиз ривожи, фарзандларимиз келажаги, бугунги обод ва фаровон турмушимиз учун солиқ тўловларини вақтида амалга ошириш муҳим аҳамият касб этади.

Туман ҳокимлигининг Ахборот хизмати.