MAKTAB DIREKTORLARI UChUN HUQUQIY TARGʻIBOT TADBIRI TAShKIL ETILDI

Prezidentimizning 2018-yil 13-apreldagi “Davlat huquqiy siyosatini amalga oshirishda adliya organlari va muassasalari faoliyatini tubdan takomillashtirish chora-tadbirlari toʻgʻrisida”gi Farmonida Adliya boʻlimlarining asosiy vazifalaridan biri − qabul qilinayotgan qonunlar va boshqa normativ-huquqiy hujjatlarning mazmun-mohiyati va ahamiyatini tumanlar tuzilmalaridagi ijrochilarga yetkazish, “respublika-viloyat-tuman-mahalla” printsipi boʻyicha huquqiy-targʻibot va aholining huquqiy savodsizligiga barham berish, shu jumladan huquqni muhofaza qiluvchi va sud organlari bilan birgalikda chora-tadbirlarni amalga oshirish ekanligi belgilab qoʻyilgan.

Shunga muvofiq Amudaryo tumani Adliya boʻlimi tomonidan tumandagi davlat organlari va tashkilotlari bilan hamkorlikda aholining huquqiy ongi va huquqiy madaniyatini yuksaltirish, yangidan qabul qilinayotgan normativ huquqiy hujjatlarni keng aholi qatlamiga yetkazish, ularning huquqiy bilimlarini oshirish maqsadida targʻibot tadbirlari oʻtkazilib kelinmoqda.

Joriy yilning 9-sentyabr kuni Olmazor mahallasi hududidagi 82-sonli maktabda Qoraqalpogʻiston Respublikasi Bandlik va mehnat munosabatlari vazirligi xodimi Davron Bozorboyev hamda tuman Adliya boʻlimi masʼullari tuman Xalq taʼlimi boʻlimiga qarashli umumtaʼlim maktablari direktorlari bilan uchrashuv oʻtkazdilar.

Uchrashuvda maktab direktorlari yangidan qabul qilinayotgan normativ-huquqiy hujjatlar, Oʻzbekiston Respublikasi Konstitutsiyasiga kiritilayotgan oʻzgartirishlar, korruptsiyaga qarshi kurashish sohasida amalga oshirilayotgan ishlar bilan yaqindan tanishtirildi. Shu bilan birga, korruptsiyaga qarshi kurashish sohasida davlat siyosatining samarali amalga oshirilishini taʼminlash hamda korruptsiya koʻrinishlarining sabablarini bartaraf etish boʻyicha yangi tizimli choralar koʻrilayotganligi taʼkidlandi.

Soʻzga chiqqan masʼullar mamlakatimizda inson huquqlari va erkinliklariga rioya etilishi, jamiyatning maʼnaviy yangilanishi, jahon hamjamiyatiga qoʻshilishini taʼminlaydigan huquqiy demokratik davlat va ochiq fuqarolik jamiyati barpo etilayotgani, bu jarayonda esa jamiyatda huquqiy madaniyatni yuksaltirish talab etilishini alohida eʼtirof etib oʻtishdi.

Shundan soʻng Prezidentimizning 2022-yil 31-avgustdagi “Qoraqalpogʻiston Respublikasida tadbirkorlik, innovatsion texnologiyalar va infratuzilmalarni jadal surʼatlarda rivojlantirish orqali aholi farovonligini oshirishning qoʻshimcha chora-tadbirlari toʻgʻrisida”gi hamda 2022-yil 24-avgustdagi “Mulk huquqining daxlsizligini ishonchli himoya qilish, mulkiy munosabatlarga asossiz aralashuvga yoʻl qoʻymaslik, xususiy mulkning kapitallashuv darajasini oshirish chora-tadbirlari toʻgʻrisida”gi Farmonlarining mazmun-mohiyati boʻyicha batafsil tushunchalar berib oʻtildi.

Ushbu Farmonning koʻplab yangi imtiyozlarga yoʻl ochayotgani toʻgʻrisida soʻz yuritilib, endilikda qoraqalpogʻistonlik pensionerlarga samolyot va poyezd chiptalari – 50 foiz chegirmada berilishi, kam taʼminlangan oilalarga 600 ming soʻmdan bir martalik yordam pullari tarqatilishi, kelasi oʻquv yilidan yoshlar uchun qoʻshimcha qabul kvotalari joriy etilishi, soliq imtiyozlari, tadbirkorlarga va boshqalarga ajratiladigan yangi kreditlar va shu kabi yaratilayotgan qator imkoniyatlar xususida maʼlumotlar berildi.

Tadbir ishtirokchilari oʻzlarini qiziqtirgan savollar bilan murojaat qilib tegishlicha javoblar olishdi.

Jamshid Bekimbetov, tuman Adliya boʻlimi bosh maslahatchisi.