МАКТАБ ДИРЕКТОРЛАРИ УЧУН ҲУҚУҚИЙ ТАРҒИБОТ ТАДБИРИ ТАШКИЛ ЭТИЛДИ
Президентимизнинг 2018 йил 13 апрелдаги “Давлат ҳуқуқий сиёсатини амалга оширишда адлия органлари ва муассасалари фаолиятини тубдан такомиллаштириш чора-тадбирлари тўғрисида”ги Фармонида Адлия бўлимларининг асосий вазифаларидан бири − қабул қилинаётган қонунлар ва бошқа норматив-ҳуқуқий ҳужжатларнинг мазмун-моҳияти ва аҳамиятини туманлар тузилмаларидаги ижрочиларга етказиш, “республика-вилоят-туман-маҳалла” принципи бўйича ҳуқуқий-тарғибот ва аҳолининг ҳуқуқий саводсизлигига барҳам бериш, шу жумладан ҳуқуқни муҳофаза қилувчи ва суд органлари билан биргаликда чора-тадбирларни амалга ошириш эканлиги белгилаб қўйилган.
Шунга мувофиқ Амударё тумани Адлия бўлими томонидан тумандаги давлат органлари ва ташкилотлари билан ҳамкорликда аҳолининг ҳуқуқий онги ва ҳуқуқий маданиятини юксалтириш, янгидан қабул қилинаётган норматив ҳуқуқий ҳужжатларни кенг аҳоли қатламига етказиш, уларнинг ҳуқуқий билимларини ошириш мақсадида тарғибот тадбирлари ўтказилиб келинмоқда.
Жорий йилнинг 9 сентябрь куни Олмазор маҳалласи ҳудудидаги 82-сонли мактабда Қорақалпоғистон Республикаси Бандлик ва меҳнат муносабатлари вазирлиги ходими Даврон Бозорбоев ҳамда туман Адлия бўлими масъуллари туман Халқ таълими бўлимига қарашли умумтаълим мактаблари директорлари билан учрашув ўтказдилар.
Учрашувда мактаб директорлари янгидан қабул қилинаётган норматив-ҳуқуқий ҳужжатлар, Ўзбекистон Республикаси Конституциясига киритилаётган ўзгартиришлар, коррупцияга қарши курашиш соҳасида амалга оширилаётган ишлар билан яқиндан таништирилди. Шу билан бирга, коррупцияга қарши курашиш соҳасида давлат сиёсатининг самарали амалга оширилишини таъминлаш ҳамда коррупция кўринишларининг сабабларини бартараф этиш бўйича янги тизимли чоралар кўрилаётганлиги таъкидланди.
Сўзга чиққан масъуллар мамлакатимизда инсон ҳуқуқлари ва эркинликларига риоя этилиши, жамиятнинг маънавий янгиланиши, жаҳон ҳамжамиятига қўшилишини таъминлайдиган ҳуқуқий демократик давлат ва очиқ фуқаролик жамияти барпо этилаётгани, бу жараёнда эса жамиятда ҳуқуқий маданиятни юксалтириш талаб этилишини алоҳида эътироф этиб ўтишди.
Шундан сўнг Президентимизнинг 2022 йил 31 августдаги “Қорақалпоғистон Республикасида тадбиркорлик, инновацион технологиялар ва инфратузилмаларни жадал суръатларда ривожлантириш орқали аҳоли фаровонлигини оширишнинг қўшимча чора-тадбирлари тўғрисида”ги ҳамда 2022 йил 24 августдаги “Мулк ҳуқуқининг дахлсизлигини ишончли ҳимоя қилиш, мулкий муносабатларга асоссиз аралашувга йўл қўймаслик, хусусий мулкнинг капиталлашув даражасини ошириш чора-тадбирлари тўғрисида”ги Фармонларининг мазмун-моҳияти бўйича батафсил тушунчалар бериб ўтилди.
Ушбу Фармоннинг кўплаб янги имтиёзларга йўл очаётгани тўғрисида сўз юритилиб, эндиликда қорақалпоғистонлик пенсионерларга самолёт ва поезд чипталари – 50 фоиз чегирмада берилиши, кам таъминланган оилаларга 600 минг сўмдан бир марталик ёрдам пуллари тарқатилиши, келаси ўқув йилидан ёшлар учун қўшимча қабул квоталари жорий этилиши, солиқ имтиёзлари, тадбиркорларга ва бошқаларга ажратиладиган янги кредитлар ва шу каби яратилаётган қатор имкониятлар хусусида маълумотлар берилди.
Тадбир иштирокчилари ўзларини қизиқтирган саволлар билан мурожаат қилиб тегишлича жавоблар олишди.
Жамшид Бекимбетов, туман Адлия бўлими бош маслаҳатчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
