QILIChBOY MADANIYaT MARKAZI TOMONIDAN “ISTIQLOLIM, MANGU BOʻL OMON!” DEB NOMLANGAN BAYRAM TADBIRI OʻTKAZILDI

Mamlakatimiz oʻz mustaqilligini qoʻlga kiritganidan beri oʻtgan 31-yil mobaynida xalqimizning asriy orzusi boʻlgan bu bebaho neʼmatning qadr-qimmatini har bir yurtdoshimiz tobora teran anglamoqda. Amalga oshirilayotgan keng koʻlamli islohotlar, bunyodkorliklar, yangilanishlar barcha-barchasi inson baxt-saodati uchun, uning munosib hayot kechirishini taʼminlash uchun ekanligini hayot tasdiqlamoqda. Bugungi kunda keksa avlod vakillari, xotin-qizlar va yoshlarga doimiy eʼtibor va gʻamxoʻrlik koʻrsatish, ularning huquq va manfaatlarini taʼminlash, oila, onalik va bolalikni himoya qilish uchun katta mablagʻlar ajratilayotgani – yurtimizda insonga gʻamxoʻrlik, uning qadr-qimmati tobora yuksalayotganini koʻrsatadi.

Shu boisdan ham mamlakatimiz mustaqillikka erishgan kun – 1-sentyabrni har yili koʻpmillatli xalqimiz ulkan shodiyona bilan nishonlaydi.

Shu yilning 27-avgustida Amudaryo tumanining Qilichboy ovulida ham sana munosabati bilan “Yangi Oʻzbekistonda el aziz, inson aziz!” degan gʻoyani ifodalovchi madaniy tadbir oʻtkazildi.

“Istiqlolim, mangu boʻl, omon!” deb nomlangan tadbirga hudud nuroniylari, maktablar oʻqituvchilari va oʻquvchilari, nodavlat maktabgacha taʼlim muassasasi tarbiyachi, tarbiyalanuvchilari, yoshlar, ovul faollari ishtirok etdilar.

Yigʻilganlarni fuqarolar yigʻini raisi Bahrom Qodirov mustaqilligimizning 31-yilligi bilan qutladi, mustaqillik yillarida ovulda amalga oshirilgan ulkan bunyodkorliklar, yuksalishlarga keng toʻxtaldi, obodonlashtirish, koʻklamzorlashtirishga ulkan eʼtibor qaratilayotgani bois hudud tobora chiroy ochib borayotganiga har bir fuqaroning mehnat qilishi va baxtiyor va farovon hayot kechirishi uchun keng imkoniyatlar yaratilayotganligiga keng toʻxtaldi.

Shuningdek, 26-avgust kuni Qoraqalpogʻiston Respublikasi Joʻqorgʻi Kengesining navbatdan tashqari 34 sessiyasida ishtirok etgan muhtaram Yurtboshimizning Qoraqalpogʻistonni ijtimoiy-iqtisodiy rivojlantirish yoʻnalishida, onalik va bolalikni, nuroniylarni ijtimoiy himoyalashni kuchaytirish borasida bergan takliflari, qoraqalpogʻistonlik yoshlar uchun oliy taʼlim muassasalarida alohida kvota ajratilishi xususida aytgan fikrlari xalqimiz turmushi yana ham obod, farovon boʻlishiga xizmat qilishini taʼkidladi.

Ovul nuroniylari tabriklaridan soʻng Qilichboy Madaniyat markazi sanʼatkorlari, hududdagi 69-, 15- va 83-sonli maktablar oʻquvchilari, nodavlat maktabgacha taʼlim tashkiloti tarbiyalanuvchilari ishtirokida mustaqillikning qadr-qimmatini ifoda etuvchi teatrlashtirilgan bayram tomoshasi namoyish etildi.

Shuningdek, tuman Madaniyat boʻlimidan tashrif buyurgan Nurbek Rajabov, Davlatyor Shomurodov, Oybek Nurmanov, Xursand Shukurlayevlar ham oʻzlarining dilrabo kuy-qoʻshiqlari bilan bayram tadbiri ishtirokchilarini xursand qildi.

Yurtimizda bayram shukuhi kezib yurgan damda Qilichboy madaniyat markazida boʻlib oʻtgan madaniy tadbir barchaga xursandchilik hadya etdi.

Oygul RAJABOVA.