ChORVADORLAR QISh MAVSUMI UChUN YeTARLI OZUQA JAMGʻARIShMOQDA

Mamlakatimiz aholisini arzon va sifatli goʻsht va sut mahsulotlari bilan taʼminlashni yaxshilash borasida amaliy chora-tadbirlar amalga oshirilmoqda. Chorvachilikni taraqqiy ettirish uchun ushbu faoliyat turi bilan shugʻullanuvchi fermer xoʻjaliklariga imkoniyatlar yaratilmoqda, sohani rivojlantirishga doir tadbirkorlik tashabbuslari qoʻllab-quvvatlanib, ularga subsidiyalar, imtiyozli kreditlar ajratilayotganligi oʻzining ijobiy samaralarini berayotir.

Sohani rivojlantirishga butun mamlakatimizda boʻlgani singari Amudaryo tumanida ham ulkan eʼtibor qaratilmoqda.

Hozirgi kunda tumandagi barcha toifadagi xoʻjaliklarda 178 mingdan ortiq bosh qoramollar namunali parvarish qilinayapti. Qoramollar naslini yaxshilash maqsadida 2022-yil davomida tuman boʻyicha jami 11 milliard 327 million soʻmlik 10 ta loyihalar bajarilishi belgilangan. Shuning 5 tasi qoramolchilik, 3 tasi parrandachilik, 2 tasi baliqchilik yoʻnalishidadir.

Mavjud qoramollarni toʻyimli boqish uchun 1 ming 862 gektar tabiiy yaylovlar mavjud. Bundan tashqari 1 ming 926 gektar yer maydonlarga ozuqabop ekinlar joylashtirilgan. Shuning 240 gektariga beda, 106 gektariga silos uchun makkajoʻxori, 1 ming 580 gektariga oqjoʻxori ekilgan.

Chorvachilik sohasida amalga oshirilayotgan buningdek saʼy-harakatlar evaziga har yili 16 ming 622 tonna goʻsht, 65 ming 465 tonna sut yetishtiriladi.

Shavkat Haydarov rahbarlik qilayotgan chorvachilikka ixtisoslashgan “Xoʻjakoʻl” fermer xoʻjaligida 215 bosh qoramol veterinariya qoidalari asosida boqilayapti. Xoʻjalikda boqilayotgan yirik shoxli qoramollarning naslini yaxshilash, shu yil bilan mahsulot yetishitirishni koʻpaytirishga ulkan eʼtibor berilmoqda.

Ayni kunda xoʻjalik dalalaridagi makkajoʻxori poyalari oʻrilib, qishlov mavsumi uchun silos tayyorlanmoqda. Bu ishlarga xoʻjalikning kombayni va ikkita transport traktori jalb etilgan.

Xususan, 2018-yilda Polshadan 66 bosh golshteyn zotli, 2020-yilda Germaniyadan semental zotli naslli qoramollar keltirildi. Sigirlarni maxsus uskunalarda xoʻjalikning 3 nafar ishchilari sogʻishadi. Xoʻjalikda yetishtirilgan sut shartnomaga muvofiq har kuni Nukusdagi sutni qayta ishlash zavodiga yetkazib beriladi.

Yirik shoxli qoramollardan mahsulot olishni koʻpaytirish maqsadida xoʻjalik ishchilari tomonidan toʻyimli boqilib, oʻsishi va sogʻlomligi har kuni nazorat qilib boriladi.

Xoʻjalikda chorva mollarini toʻyimli ozuqa bilan boqish maqsadida 40 gektar maydonga makkajoʻxori, 15 gektar maydonga beda, 2 gektar maydonga sabzi, 1 gektar maydonga qovoq, 2 gektar yerga lavlagi ekilib, moʻl hosil yetishtirilayapti.

Bu ishlarga 17 nafar ijarachi jalb etilgan. Ular oʻzlariga qarashli yerlardagi ozuqa ekinlarini agrotexnika qoidalari asosida parvarishlashi tufayli goʻsht va sul yetishtirish boʻyicha yaxshi natijalarga erishmoqdalar.

Chorvasi toʻqning – koʻngli toʻq. Tumanimiz chorvadorlari qishlov mavsumi oldidan yetarli ozuqa tayyorlab, yil davomida xalqimizni sifatli chorvachilik mahsulotlari bilan taʼminlash yoʻlida astoydil mehnat qilmoqdalar.

Mahmudjon Shomurodov.