Navbatdagi “Hokim va yoshlar uchrashuvi” boʻlib oʻtdi

Amudaryo tumanining Toʻlqin ovul fuqarolar yigʻini binosida navbatdagi “Hokim va yoshlar” uchrashuvi boʻlib oʻtdi. Uchrashuvda tuman hokimi Sultonboy Yoʻldashev, tuman Xalq qabulxonasi boʻlimi mudiri Erkin Rajabov, hokim oʻrinbosari Mahmud Shermetov, Yoshlar ishlari agentligi tuman boʻlimi boshligʻi Sardor Ismailov, tegishli tashkilot vakillari hamda 20 dan ortiq faol yoshlar ishtirok etishdi.

Tuman hokimi Sultonboy Yoʻldashev boshchiligidagi uchrashuv rasmiyatchilikdan holi, ochiq va oshkora muloqot tarzida oʻtkazildi. Yigʻilganlarga Prezidentimiz rahnamoligida tumanda olib borilayotgan keng koʻlamli oʻzgarishlar, yangilanishlar, kelgusidagi istiqbolli rejalar haqida batafsil maʼlumot berdi. Mamlakatimizda yoshlarning intilish va tashabbuslarini qoʻllab-quvvatlash, isteʼdod va salohiyatini namoyon etishi uchun zamonaviy sharoitlar yaratishga alohida eʼtibor qaratilayotgani taʼkidlandi.

 Shuningdek, har sohada eng ilgʻor yoshlar bilan samimiy muloqot qildi. Yoshlarga oʻzining hayotiy tajribalaridan misollar keltirib, ularni yanada ruhlantira oldi. Faol yoshlarning taklif va fikrlarini tingladi.

Uchrashuvda tuman Xalq qabulxonasi boʻlimi mudiri Erkin Rajabov yoshlar tomonidan tuman Xalq qabulxonasiga kelib tushayotgan murojaatlarning oʻtgan yillarga nisbatan sezilarli darajada kamayganligini, bunga sabab, joriy yil boshidan mahallalarda yangidan ish boshlagan hokim yordamchilari, yoshlar yetakchilari, xotin-qizlar faolining aholi bilan tizimli ravishda ishlab kelayotganidaligini aytib oʻtdi.

Uchrashuv davomida yoshlardan turli mazmundagi 5 ta murojaat kelib tushdi.

Jumladan, mahallaning faol yoshlaridan Ogʻabek Bekchanov subsidiya asosida haydovchilik guvoxnomasi olishda amaliy yordam soʻrab murojaat qilgan boʻlsa, Ismoil Oʻrazboyev imtiyoli kredit asosida asbob-uskuna olishda, Muhlisa Safarboyeva subsidiya asosida tikish mashinasi olishda, Ogʻabek Jumaboyev imtiyoli kredit asosida mototsikl olishda amaliy yordam soʻrab murojaat qildi.

Murojaatlar shu yerning oʻzida mutasaddilarga topshiriq sifatida berilib ijrosi nazoratga olindi.

Ochiq va samimiy ruhda oʻtgan uchrashuvda yoshlarga taalluqli barcha dolzarb masalalar keng va toʻlaqonli qamrab olindi. Yoshlar oʻzlarini qiziqtirgan masalalar, yangi gʻoya va tashabbuslari yuzasidan tuman hokimiga toʻgʻridan-toʻgʻri murojaat qilib, savollariga javob olishdi.

Bugun Oʻzbekistonda yuksak maʼnaviyatli avlod tarbiyalanmoqda. Bugungi yoshlarning ong-u shuuri, dunyoqarashi ham oʻzgargan. Tuman hokimiga kelib tushgan murojaatlar mazmunidan ham bilsa boʻladiki, ularning oʻz oldiga qoʻygan aniq maqsadlari bor.

Yoshlarimiz orasida yangicha oʻylaydigan, innovatsion gʻoyalarini amalga tatbiq eta oladigan kuchlar borligi bizni quvontiradi. Mana shunday shijoatli va bilimli yoshlar safining kengayishi uchun esa har birimiz hissa qoʻshishimiz lozim. Zero, ertangi kun, mamlakatimiz kelajagi yoshlar qoʻlida.

Tuman hokimligining Axborot xizmati.