Oʻqituvchilarning Milliy forumi boʻlib oʻtdi

Dunyoda insonlar turli-tuman kasblarda faoliyat olib boradi. Ammo, mana shu kasblar ichida shunday bir kasb borki, u ham sharafli, ham masʼuliyatliligi bilan boshqalardan ajralib turadi. Bu − oʻqituvchilik va murabbiylik kasbidir.

Barcha sohalarning ustalari, mutaxassislari bir kasb egalari mehnati bilan shakllanadi, kamol topadi. Har birimizga kimdir harf oʻrgatib, savodimizni chiqargan. Bugun kim, qayerda, qanday vazifada ishlamasin, qachondir maktabda oʻqigan, ustozlar tarbiyasini olgan. Ilk bor maktabga borgan kunni, qoʻliga qalam berib, yozishni, oʻqishni oʻrgatgan oʻqituvchisini eslamaydigan odam topilmasa kerak.

Ustoz oʻz kasbiga qalb qoʻri bilan kirishmasa, murabbiylik yoʻlida hech qanday yutuqlarga erisha olmaydi. Shu maʼnoda, ustozlar taʼlim tizimida roʻy berayotgan oʻzgarishlarni doimo kuzatib, oʻrganib borishi, yangi zamonaviy pedagogik texnologiyalar bilan qurollanishi, innovatsion usullarda dars oʻta olishi, umuman, har bir oʻquvchini dars jarayoniga qiziqtira bilishi lozim.

24-avgust kuni Amudaryo tumanining Navoiy nomli mahallasi hududida joylashgan 1-sonli umumtaʼlim maktabida boʻlib oʻtgan ustozlar milliy forumi ana shu maqsadlarga qaratildi.

Forumda Amudaryo tumanidagi mavjud 85 ta umumiy oʻrta taʼlim maktabida faoliyat yurituvchi 600 nafarga yaqin pedagog xodimlar ishtirok etishdi.

Forum ishtirokchilari boshlangʻich taʼlim, chet tili, til va adabiyot, amaliy fanlar, ijtimoiy-gumanitar fanlar, aniq fanlar, tabiiy fanlar kabi yoʻnalishlar boʻyicha guruhlarga boʻlindilar.

Har bir guruhda malakali metodist va oʻqituvchilar oʻzlarining fan dasturlari doirasida hamkasblariga taʼlim jarayonidagi soʻnggi yangiliklar, darsliklarga kiritilgan oʻzgarishlar, yangi darsliklar bilan ishlashning yangicha usullari, taʼlim jarayoniga tadbiq etiladigan zamonaviy innovatsion texnologiyalar, uslublar toʻgʻrisida batafsil maʼlumot berdilar. Shuningdek, forum davomida oʻqituvchilar oʻzaro bilim va tajriba almashishdi.

Shu oʻrinda aytish kerakki, umutaʼlim maktablarda yaratilgan shart-sharoitlar, oʻquvchilarning darsliklar bilan toʻliq taʼminlanishi, maktablarning moddiy texnik-bazasi zamon talablariga toʻliq javob bera olishi ham taʼlim sifatining samarali yoʻlga qoʻyilishida muhim omil boʻlib xizmat qilmoqda.

Taʼlim jarayonining samarali yoʻlga qoʻyilishida Milliy oʻquv dasturi loyihasi ham muhim ahamiyatga ega. Milliy oʻquv dasturi loyihasi doirasida har bir sinf kesimida oʻquvchida rivojlanishi kerak boʻlgan koʻnikmalar belgilab beriladi. Mazkur dastur doirasida 2021-yilda 252 nomdagi yangi zamonaviy darsliklar, oʻquvchi mashq daftarlari hamda pedagoglar uchun oʻquv qoʻllanmalari tayyorlanib, maktablarning 1- va 2-sinflarida joriy qilindi. 246 nafar mahalliy va xalqaro ekspertlar ishtirokida maktablar uchun Milliy oʻquv dasturi yaratilib, oʻquv jarayoniga bosqichma-bosqich joriy etilmoqda.

Shuningdek, dastur asosida 296 nomdagi yangi avlod darsliklari, mashq daftarlari, oʻqituvchi metodikasi kabi kitoblar yaratildi.

Oʻqituvchilar Milliy forumi davomida ushbu oʻzgarishlar bilan birgalikda oʻtgan oʻquv yilida erishilgan yutuqlar sarhisob qilinib, yoʻl qoʻyilgan kamchiliklar tahlil qilindi va kelgusida ularning oldini olish boʻyicha choralar belgilandi.

Milliy forum oʻqituvchilarning yangi oʻquv yilini puxta tayyorgarlik va katta rejalar bilan kutib olishlarida muhim vosita boʻldi.

Tuman hokimligining Axborot xizmati