Ўқитувчиларнинг Миллий форуми бўлиб ўтди

Дунёда инсонлар турли-туман касбларда фаолият олиб боради. Аммо, мана шу касблар ичида шундай бир касб борки, у ҳам шарафли, ҳам масъулиятлилиги билан бошқалардан ажралиб туради. Бу − ўқитувчилик ва мураббийлик касбидир.

Барча соҳаларнинг усталари, мутахассислари бир касб эгалари меҳнати билан шаклланади, камол топади. Ҳар биримизга кимдир ҳарф ўргатиб, саводимизни чиқарган. Бугун ким, қаерда, қандай вазифада ишламасин, қачондир мактабда ўқиган, устозлар тарбиясини олган. Илк бор мактабга борган кунни, қўлига қалам бериб, ёзишни, ўқишни ўргатган ўқитувчисини эсламайдиган одам топилмаса керак.

Устоз ўз касбига қалб қўри билан киришмаса, мураббийлик йўлида ҳеч қандай ютуқларга эриша олмайди. Шу маънода, устозлар таълим тизимида рўй бераётган ўзгаришларни доимо кузатиб, ўрганиб бориши, янги замонавий педагогик технологиялар билан қуролланиши, инновацион усулларда дарс ўта олиши, умуман, ҳар бир ўқувчини дарс жараёнига қизиқтира билиши лозим.

24 август куни Амударё туманининг Навоий номли маҳалласи ҳудудида жойлашган 1-сонли умумтаълим мактабида бўлиб ўтган устозлар миллий форуми ана шу мақсадларга қаратилди.

Форумда Амударё туманидаги мавжуд 85 та умумий ўрта таълим мактабида фаолият юритувчи 600 нафарга яқин педагог ходимлар иштирок этишди.

Форум иштирокчилари бошланғич таълим, чет тили, тил ва адабиёт, амалий фанлар, ижтимоий-гуманитар фанлар, аниқ фанлар, табиий фанлар каби йўналишлар бўйича гуруҳларга бўлиндилар.

Ҳар бир гуруҳда малакали методист ва ўқитувчилар ўзларининг фан дастурлари доирасида ҳамкасбларига таълим жараёнидаги сўнгги янгиликлар, дарсликларга киритилган ўзгаришлар, янги дарсликлар билан ишлашнинг янгича усуллари, таълим жараёнига тадбиқ этиладиган замонавий инновацион технологиялар, услублар тўғрисида батафсил маълумот бердилар. Шунингдек, форум давомида ўқитувчилар ўзаро билим ва тажриба алмашишди.

Шу ўринда айтиш керакки, умутаълим мактабларда яратилган шарт-шароитлар, ўқувчиларнинг дарсликлар билан тўлиқ таъминланиши, мактабларнинг моддий техник-базаси замон талабларига тўлиқ жавоб бера олиши ҳам таълим сифатининг самарали йўлга қўйилишида муҳим омил бўлиб хизмат қилмоқда.

Таълим жараёнининг самарали йўлга қўйилишида Миллий ўқув дастури лойиҳаси ҳам муҳим аҳамиятга эга. Миллий ўқув дастури лойиҳаси доирасида ҳар бир синф кесимида ўқувчида ривожланиши керак бўлган кўникмалар белгилаб берилади. Мазкур дастур доирасида 2021 йилда 252 номдаги янги замонавий дарсликлар, ўқувчи машқ дафтарлари ҳамда педагоглар учун ўқув қўлланмалари тайёрланиб, мактабларнинг 1- ва 2-синфларида жорий қилинди. 246 нафар маҳаллий ва халқаро экспертлар иштирокида мактаблар учун Миллий ўқув дастури яратилиб, ўқув жараёнига босқичма-босқич жорий этилмоқда.

Шунингдек, дастур асосида 296 номдаги янги авлод дарсликлари, машқ дафтарлари, ўқитувчи методикаси каби китоблар яратилди.

Ўқитувчилар Миллий форуми давомида ушбу ўзгаришлар билан биргаликда ўтган ўқув йилида эришилган ютуқлар сарҳисоб қилиниб, йўл қўйилган камчиликлар таҳлил қилинди ва келгусида уларнинг олдини олиш бўйича чоралар белгиланди.

Миллий форум ўқитувчиларнинг янги ўқув йилини пухта тайёргарлик ва катта режалар билан кутиб олишларида муҳим восита бўлди.

Туман ҳокимлигининг Ахборот хизмати