ARNABOʻYI MAHALLASIDA MUSTAQILLIK BAYRAMI ARAFASIDA BOQUVChISINI YOʻQOTGAN OILALARGA MODDIY YoRDAMLAR BERILDI

Muhtaram Prezidentimizning “Mahallada tadbirkorlikni rivojlantirish, aholi bandligini taʼminlash va kambagʻallikni qisqartirish boʻyicha davlat siyosatining ustuvor yoʻnalishlari toʻgʻrisida”gi Farmoniga muvofiq Amudaryo tumanidagi ovul, mahallalarda faoliyatini boshlagan hokim yordamchilari aholining munosib hayot kechirishini taʼminlashda, turmush sifatini, farovonligini oshirishda muhim rol oʻynamoqda.

Ular oʻz hududlaridagi holatni xonadonbay oʻrganib, aholining bandlik darajasini, oilalarning daromad manbalarini, tomorqa yerlardan foydalanish holatini, fuqarolarning daromadli mehnatga boʻlgan ehtiyoji, intilishlarini aniqlab, kasb-hunarga, tadbirkorlikka jalb etib, zarur hollarda imtiyozli foizlarda kreditlar olishiga bosh-qosh boʻlmoqda. Ayniqsa, “Temir daftar”, “Ayollar daftari”, “Yoshlar daftari”ga kiritilgan ayol-qizlar va yoshlarni qoʻllab-quvvatlab, ularning bandligini taʼminlashga intilmoqdalar. Ijtimoiy himoyaga muhtoj oilalar ularning doimo diqqat-eʼtiborida.

Arnaboʻyi mahallasi hokim yordamchisi Siroj Oʻrozimbetov ham ana shunday faoliyati tufayli aholi hurmatini qozonmoqda. Uning bevosita aralashuvi va tavsiyasiga bilan shu yilning oʻzida 80 nafar ishsiz yoshlar qishloq xoʻjaligi sohasiga jalb etildi. 41 nafar ishsiz fuqarolarga oʻz tadbirkorlik faoliyatini tashkil etishlari uchun imtiyozli narxlarda 1 milliard 141 million soʻmlik kreditlar olib berildi.

Hokim yordamchisi eʼtiboridan ijtimoiy himoyaga muhtoj aholi qatlami ham chetda qolayotgani yoʻq. Xususan, mahallaning “Maxsum ovul” aholi punktida istiqomat qiluvchi Marhabo Oʻrozaliyevaning oʻzi, turmush oʻrtogʻi ham ishsiz boʻlganligi uchun ijtimoiy himoya yagona reyesstriga kiritildi. Unga subsidiya asosida 80 ta tovuq berilib, parrandachilik kooperatsiyasiga aʼzo qilindi va tovuqlar uchun bir oylik ozuqasi gʻamlab berildi.

Shuningdek yaqinda “Temir daftar”ga kiritilgan, boquvchisini yoʻqotgan, farzandlarini yolgʻiz oʻzi voyaga yetkazayotgan Gulasal Eshmetova, Iliya Tajbenovalarga hokim yordamchisi Siroj Oʻrozmetov 1 million 500 ming soʻm moddiy yordam puli tarqatdi.

Tumanimizdagi 49 ta ovul, mahalla, shaharchalarda faoliyat yuritayotgan hokim yordamchilarining byudjeti mavjud. Ular davlat tomonidan ajratilgan pullarni odilona tasarruf etib, muhtoj oilalarni qoʻllab-quvvatlayotgani eʼtirofga sazovordir.

Oʻzining zimmasidagi masʼuliyatli vazifasini sidqidildan ado etayotgani tufayli Arnaboʻyi mahallasi aholisi Siroj Oʻrozmetovdan juda minnatdor. Uning hali rejalagan ishlari koʻp.

Ayni kunlarda mahallada Oʻzbekiston Respublikasi davlat mustaqilligining 31 yilligi munosabati bilan bayram tadbirini koʻtarinki ruhda oʻtkazish uchun tayyorgarlik ishlariga ham bosh-qosh. Tadbir xalqimizning asriy orzusi boʻlgan istiqlolimizning mazmun-mohiyatini, qadrini xalqimizga teran yetkazishga xizmat qilishi uchun qizgʻin tadoriklar koʻrilayapti.

Oygul RAJABOVA.