АРНАБЎЙИ МАҲАЛЛАСИДА МУСТАҚИЛЛИК БАЙРАМИ АРАФАСИДА БОҚУВЧИСИНИ ЙЎҚОТГАН ОИЛАЛАРГА МОДДИЙ ЁРДАМЛАР БЕРИЛДИ

Муҳтарам Президентимизнинг “Маҳаллада тадбиркорликни ривожлантириш, аҳоли бандлигини таъминлаш ва камбағалликни қисқартириш бўйича давлат сиёсатининг устувор йўналишлари тўғрисида”ги Фармонига мувофиқ Амударё туманидаги овул, маҳаллаларда фаолиятини бошлаган ҳоким ёрдамчилари аҳолининг муносиб ҳаёт кечиришини таъминлашда, турмуш сифатини, фаровонлигини оширишда муҳим роль ўйнамоқда.

Улар ўз ҳудудларидаги ҳолатни хонадонбай ўрганиб, аҳолининг бандлик даражасини, оилаларнинг даромад манбаларини, томорқа ерлардан фойдаланиш ҳолатини, фуқароларнинг даромадли меҳнатга бўлган эҳтиёжи, интилишларини аниқлаб, касб-ҳунарга, тадбиркорликка жалб этиб, зарур ҳолларда имтиёзли фоизларда кредитлар олишига бош-қош бўлмоқда. Айниқса, “Темир дафтар”, “Аёллар дафтари”, “Ёшлар дафтари”га киритилган аёл-қизлар ва ёшларни қўллаб-қувватлаб, уларнинг бандлигини таъминлашга интилмоқдалар. Ижтимоий ҳимояга муҳтож оилалар уларнинг доимо диққат-эътиборида.

Арнабўйи маҳалласи ҳоким ёрдамчиси Сирож Ўрозимбетов ҳам ана шундай фаолияти туфайли аҳоли ҳурматини қозонмоқда. Унинг бевосита аралашуви ва тавсиясига билан шу йилнинг ўзида 80 нафар ишсиз ёшлар қишлоқ хўжалиги соҳасига жалб этилди. 41 нафар ишсиз фуқароларга ўз тадбиркорлик фаолиятини ташкил этишлари учун имтиёзли нархларда 1 миллиард 141 миллион сўмлик кредитлар олиб берилди.

Ҳоким ёрдамчиси эътиборидан ижтимоий ҳимояга муҳтож аҳоли қатлами ҳам четда қолаётгани йўқ. Хусусан, маҳалланинг “Махсум овул” аҳоли пунктида истиқомат қилувчи Марҳабо Ўрозалиеванинг ўзи, турмуш ўртоғи ҳам ишсиз бўлганлиги учун ижтимоий ҳимоя ягона реесстрига киритилди. Унга субсидия асосида 80 та товуқ берилиб, паррандачилик кооперациясига аъзо қилинди ва товуқлар учун бир ойлик озуқаси ғамлаб берилди.

Шунингдек яқинда “Темир дафтар”га киритилган, боқувчисини йўқотган, фарзандларини ёлғиз ўзи вояга етказаётган Гуласал Эшметова, Илия Тажбеноваларга ҳоким ёрдамчиси Сирож Ўрозметов 1 миллион 500 минг сўм моддий ёрдам пули тарқатди.

Туманимиздаги 49 та овул, маҳалла, шаҳарчаларда фаолият юритаётган ҳоким ёрдамчиларининг бюджети мавжуд. Улар давлат томонидан ажратилган пулларни одилона тасарруф этиб, муҳтож оилаларни қўллаб-қувватлаётгани эътирофга сазовордир.

Ўзининг зиммасидаги масъулиятли вазифасини сидқидилдан адо этаётгани туфайли Арнабўйи маҳалласи аҳолиси Сирож Ўрозметовдан жуда миннатдор. Унинг ҳали режалаган ишлари кўп.

Айни кунларда маҳаллада Ўзбекистон Республикаси давлат мустақиллигининг 31 йиллиги муносабати билан байрам тадбирини кўтаринки руҳда ўтказиш учун тайёргарлик ишларига ҳам бош-қош. Тадбир халқимизнинг асрий орзуси бўлган истиқлолимизнинг мазмун-моҳиятини, қадрини халқимизга теран етказишга хизмат қилиши учун қизғин тадориклар кўрилаяпти.

Ойгул РАЖАБОВА.