“BESh TAShABBUS OLIMPIADASI”NING IKKINChI MAVSUMIGA TAYYoRGARLIK YuZASIDAN OʻQUV-SEMINAR OʻTKAZILDI

Soʻnggi yillarda jismoniy tarbiya va sportni rivojlantirish, shu orqali oʻsib kelayotgan yosh avlodni barkamol qilib voyaga yetkazish, yot gʻoyalardan, zararli  illatlardan asrashga alohida eʼtibor qaratilmoqda.

Prezidentimizning “Mahallalarda yoshlarni ommaviy sportga jalb qilishni yangi  bosqichga olib chiqish chora-tadbirlari toʻgʻrisida”gi qarori ijrosini taʼminlash borasida oʻtkazilgan “Besh tashabbus olimpiadasi” sport musobaqalari ham shu maqsadga qaratilgan edi.

Oʻzbekiston Respublikasi Sportni rivojlantirish vazirligi, Yoshlar ishlari agentligi va bir qancha hamkor tashkilotlar bilan birgalikda oʻtkazilgan “Besh tashabbus olimpiadasi” sport oʻyinlari tumanimizda ham koʻpgina iqtidorli sportchilarni aniqlash, ularning iqtidorini ragʻbatlantirish imkonini berdi.

Sportning 9 ta turi boʻyicha oʻtkazilgan  ushbu musobaqalarning birinchi mavsumi yakuniga yetib, gʻoliblar munosib ragʻbatlantirilgani barcha ishtirokchilarda ulkan taassurotlar qoldirdi. Ahamiyatli jihati, ushbu musobaqalarning respublika bosqichi gʻoliblarining mahallalariga 3 ta turdagi sport maydonchalari qurib berilishi belgilangan.

“Besh tashabbus olimpiadasi” doirasidagi ommaviy sport musobaqalarining ikkinchi mavsumi shu yilning avgust-sentyabr oylarida oʻtkaziladi. 17-avgust kuni ushbu masʼuliyatli mavsumda musobaqalarni uyushqoqlik bilan namunali tarzda oʻtkazish yuzasidan Amudaryo tumanida oʻquv-seminar boʻlib oʻtdi.

Tuman Sportni rivojlantirish boʻlimi va hamkor tashkilotlar tomonidan tashkillashtirilgan oʻquv-seminarga soha masʼullari, Yoshlar ishlari agentligi tuman boʻlimi, Bolalar-oʻsmirlar sport maktablari rahbarlari, trenerlari tumandagi mavjud maktablarning jismoniy tarbiya fani oʻqituvchilari, mavjud 49 ta ovul, mahallalarga biriktirilgan  trenerlar, ovul, mahallalar yoshlar yetakchilari ishtirok etdilar.

Tadbirda tuman Sportni rivojlantirish boʻlimi boshligʻi Gʻulomjon Qurbonboyev “Besh tashabbus olimpiadasi”ning yangi mavsumiga tayyorgarlik koʻrish, uni namunali tarzda oʻtkazish borasidagi vazifalarga keng toʻxtaldi va ishtirokchilarni musobaqa nizomi bilan tanishtirdi.

Maʼruzachi ushbu musobaqalar 5 ta bosqichda: mahalla – sektor – tuman – hudud – respublika miqyosida oʻtkazilishi, gʻoliblar dekabr oyida “Yoshlar forumi” doirasidagi tadbirlarda taqdirlanishi belgilanganini  maʼlum qildi.

Tadbirda ushbu mavsumda ham yoshlarning muvaffaqiyatli ishtirok etishiga erishish uchun masʼullarga tegishli topshiriqlar berildi.

Aytish joizki “Besh tashabbus olimpiadasi” sport musobaqalarining oʻtgan mavsumida amudaryolik yoshlar koʻpgina yutuqlarni qoʻlga kiritib, tumanimiz sport sharafini yuksaltirgan etdilar. Ushbu musobaqalarning ikkinchi mavsumida ham ulardan yorqin gʻalabalar kutib qolamiz.

Oygul RAJABOVA.