“БЕШ ТАШАББУС ОЛИМПИАДАСИ”НИНГ ИККИНЧИ МАВСУМИГА ТАЙЁРГАРЛИК ЮЗАСИДАН ЎҚУВ-СЕМИНАР ЎТКАЗИЛДИ

Сўнгги йилларда жисмоний тарбия ва спортни ривожлантириш, шу орқали ўсиб келаётган ёш авлодни баркамол қилиб вояга етказиш, ёт ғоялардан, зарарли  иллатлардан асрашга алоҳида эътибор қаратилмоқда.

Президентимизнинг “Маҳаллаларда ёшларни оммавий спортга жалб қилишни янги  босқичга олиб чиқиш чора-тадбирлари тўғрисида”ги қарори ижросини таъминлаш борасида ўтказилган “Беш ташаббус олимпиадаси” спорт мусобақалари ҳам шу мақсадга қаратилган эди.

Ўзбекистон Республикаси Спортни ривожлантириш вазирлиги, Ёшлар ишлари агентлиги ва бир қанча ҳамкор ташкилотлар билан биргаликда ўтказилган “Беш ташаббус олимпиадаси” спорт ўйинлари туманимизда ҳам кўпгина иқтидорли спортчиларни аниқлаш, уларнинг иқтидорини рағбатлантириш имконини берди.

Спортнинг 9 та тури бўйича ўтказилган  ушбу мусобақаларнинг биринчи мавсуми якунига етиб, ғолиблар муносиб рағбатлантирилгани барча иштирокчиларда улкан таассуротлар қолдирди. Аҳамиятли жиҳати, ушбу мусобақаларнинг республика босқичи ғолибларининг маҳаллаларига 3 та турдаги спорт майдончалари қуриб берилиши белгиланган.

“Беш ташаббус олимпиадаси” доирасидаги оммавий спорт мусобақаларининг иккинчи мавсуми шу йилнинг август-сентябрь ойларида ўтказилади. 17 август куни ушбу масъулиятли мавсумда мусобақаларни уюшқоқлик билан намунали тарзда ўтказиш юзасидан Амударё туманида ўқув-семинар бўлиб ўтди.

Туман Спортни ривожлантириш бўлими ва ҳамкор ташкилотлар томонидан ташкиллаштирилган ўқув-семинарга соҳа масъуллари, Ёшлар ишлари агентлиги туман бўлими, Болалар-ўсмирлар спорт мактаблари раҳбарлари, тренерлари тумандаги мавжуд мактабларнинг жисмоний тарбия фани ўқитувчилари, мавжуд 49 та овул, маҳаллаларга бириктирилган  тренерлар, овул, маҳаллалар ёшлар етакчилари иштирок этдилар.

Тадбирда туман Спортни ривожлантириш бўлими бошлиғи Ғуломжон Қурбонбоев “Беш ташаббус олимпиадаси”нинг янги мавсумига тайёргарлик кўриш, уни намунали тарзда ўтказиш борасидаги вазифаларга кенг тўхталди ва иштирокчиларни мусобақа низоми билан таништирди.

Маърузачи ушбу мусобақалар 5 та босқичда: маҳалла – сектор – туман – ҳудуд – республика миқёсида ўтказилиши, ғолиблар декабрь ойида “Ёшлар форуми” доирасидаги тадбирларда тақдирланиши белгиланганини  маълум қилди.

Тадбирда ушбу мавсумда ҳам ёшларнинг муваффақиятли иштирок этишига эришиш учун масъулларга тегишли топшириқлар берилди.

Айтиш жоизки “Беш ташаббус олимпиадаси” спорт мусобақаларининг ўтган мавсумида амударёлик ёшлар кўпгина ютуқларни қўлга киритиб, туманимиз спорт шарафини юксалтирган этдилар. Ушбу мусобақаларнинг иккинчи мавсумида ҳам улардан ёрқин ғалабалар кутиб қоламиз.

Ойгул РАЖАБОВА.