OZOD VA OBOD ELDA YaShASh BAXTI

Biz oyogʻimiz ostidagi yerni insoniyatni dunyoga keltiruvchi, kamolga yetkazuvchi moʻʼtabar zot - onaga qiyoslaymiz. Chunki, tirikligimiz zamin bagʻridan unadigan rizq-roʻz bilan bardavom.

Men yaqinda Oʻzbekiston telekanalida mamlakatimizda paxta yetishtirish boʻyicha yillik shartnomaviy reja ado etilgani munosabati bilan tayyorlangan maxsus koʻrsatuvni maroq bilan tomosha qilib, shular haqida oʻyladim. Respublikamiz paxtakorlari erishgan mehnat zafaridan behad suyundim. Chunki, 3 million 400 ming tonnadan ziyod paxta xalqimizning ertagi kungi farovonligi kafolatidir.

Shu munosabat bilan muhtaram Prezidentimizning Oʻzbekiston paxtakorlari va barcha mehnatkashlariga yoʻllagan tabrigini tinglab, paxtakor, dehqon, yo qishloq xoʻjaligi mutaxassisi boʻlmasam-da, juda taʼsirlandim.

Keyingi yillarda Qoraqalpogʻistondagina emas, mamlakatimizda birinchi boʻlib paxta topshirish rejasini ortigʻi bilan ado etib kelayotgan tumanimiz nomi Yurtboshimiz tabrigida birinchi boʻlib tilga olinganida quvonganimdan oʻzimga sigʻmay ketdim.

Mana, keyingi 6-7-yil davomida paxtakorlarimizning fidoyi mehnatlari natijasida Prezidentimiz tabrigida tumanimiz nomi ilgʻorlar safida tilga olinib kelinmoqda.

Bunday yuksak koʻrsatkichlarga oʻz-oʻzidan erishilmayapti. Albatta, yurtimizning barcha hududlarida agrar sohada katta islohotlar amalga oshirilmoqda, yerlarning meliorativ holati yaxshilanib, fermerlarga qishloq xoʻjaligi texnikalari, yonilgʻi-moylash materiallari, mineral oʻgʻit va zararkunandalardan himoyalash vositalari uzluksiz yetkazib berilmoqda. Ammo, boshqa hududlarga qaraganda sharoiti nisbatan ogʻir boʻlishiga qaramasdan Amudaryo paxtakorlari Respublika tumanlari orasida karvonboshilik qilib kelmoqda. Menimcha, bunday natijalarga erishilayotganining asosiy sababi - tuman rahbariyati boshchiligida sohada samarali tizim yaratilganidir.

Yana bir quvonarli jihati - joriy yildan boshlab tumanimizda yetishtirilgan paxta xom-ashyosining asosiy qismi oʻzimizda "Amudaryotex” xorijiy korxonasida qayta ishlanadi. Prezidentimiz tabrigida taʼkidlanganidek, "Oʻtgan asrning 90-yillarida yurtimizda yetishtirilgan jami paxta tolasining atigi 7 foizi oʻzimizda qayta ishlanar edi. Oʻtgan qisqa davrda bu boradagi koʻrsatkich 6 barobardan ziyod koʻpaygani hamda bugungi kunda 44 foizni tashkil etib, chet mamlakatlarga sotilayotgani, paxta tolasiga yana qoʻshimcha qiymat qoʻshishga imkoniyat yaratayotgani shu yoʻnalishda uzoqni koʻzlab olib borayotgan ishlarimizning amaliy samarasidir”.

Biz keksa avlod vakillari mamlakatimizda, mamlakatimizning kichik bir boʻlagi boʻlmish tumanimizda qoʻlga kiritilayotgan bu kabi yutuqlardan koʻnglimiz togʻdek koʻtarilib, faxr-iftixorga toʻladi.

Nafaqat paxtachilik, balki qishloq xoʻjaligining boshqa sohalari qatori sanoat, ishlab chiqarish, taʼlim, tibbiyot, qurilish kabi yoʻnalishlarda ham tumanimizda ulkan muvaffaqiyatlarga erishilayotgani, xalqimizning turmush farovonligi yil sayin yuksalib borayotganidan juda quvonamiz va Allohga shukronalar aytamiz. Bularning zamirida istiqlol atalmish buyuk neʼmat turgani, uning abadiyligini, Vatanimiz tinchligini koʻz qorachigʻidek asrash, koʻz oʻngimizda amalga oshirilayotgan ulkan bunyodkorlik ishlariga hissa qoʻshish shu elning har bir fuqarosining burchi ekanligini yoshlarimizga qayta-qayta taʼkidlaymiz.

Bunday tinch va farovon mamlakatda, ozod va obod yurtda, ilgʻor, tashabbuskor va intiluvchan, mehnatsevar xalq ichida yashayotganimiz har birimizning baxtimizdir. Bunday baxtga munosib boʻlishga doimo intilib yashaylik, azizlar!

Ibrohim ISMOILOV, xalq taʼlimi faxriysi.