Tumandagi 11 ta olis va chekka ovul hamda mahallalarda tibbiyot punktlari tashkil etildi

2022-yil 18-mart kuni Oʻzbekiston Respublikasi Prezidentining sogʻliqni saqlash sohasi vakillari bilan “Tibbiyotdagi islohotlar-inson qadri uchun” mavzusida oʻtkazgan “ochiq muloqoti”da belgilangan vazifalarni hamda Oʻzbekiston Respublikasi Prezidentining “Birlamchi tibbiy-sanitariya yordamini aholiga yaqinlashtirish va tibbiy hizmatlar samaradorligini oshirish boʻyicha qoʻshimcha chora-tadbirlar toʻgʻrisida”gi 2022-yil 25-aprel kungi Qarori ijrosini taʼminlash maqsadida koʻpgina chora-tadbirlar ishlab chiqilib, amalga oshirilmoqda.

Xususan, Amudaryo tumani Tibbiyot birlashmasiga qarashli 9 ta oilaviy poliklinikalari va 4 ta oilaviy shifokorlik punktlarida kunduzgi statsionar oʻrinlar ish vaqti soat 20:00 gacha uzaytirildi. Shu bilan bir qatorda 1-sonli oilaviy poliklinikada avval mavjud boʻlgan 8 ta kunduzgi statsionar oʻrinlariga qoʻshimcha ravishda 2 ta kunduzgi statsionar oʻrinlar tashkil etilib, jami 10 ta kunduzgi statsionar oʻringa toʻldirildi. 3-sonli oilaviy poliklinikada avval mavjud 4 ta kunduzgi statsionar oʻrinlariga qoʻshimcha ravishda 6 ta kunduzgi statsionar oʻrinlar tashkil etilib, jami 10 ta, 7-sonli oilaviy poliklinikasida avval mavjud 5 ta kunduzgi statsionar oʻrinlariga esa qoʻshimcha ravishda 5 ta kunduzgi statsionar oʻrinlar tashkil etilib, jami 10 ta kunduzgi statsionar oʻringa toʻldirildi.

Bulardan tashqari birlamchi tibbiy-sanitariya yordamini aholiga yaqinlashtirish maqsadida tumandagi 11 ta olis va chekka ovul hamda mahallalarga maxsus konteynerlar oʻrnatilib, mahalla tibbiyot punktlari tashkil etildi.

Endilikda Amudaryo tumanining Jumurtov shaharchasi va shaharcha hududidagi Qoratosh aholi punkti, Amir Temur va Boʻz yop ovullari, Yuqori qishloq, Bogʻ, Qoramon mahallalari, Besh tom mahallasining Xoʻjakoʻl aholi punkti, Nazarxon ovuli hududidagi Maylikoʻl, Bekboy aholi punktlari, Qum yop mahallasining Jumaboy sogʻa aholi punktida yashovchi aholi tuman markaziga kelmasdan birlamchi tibbiy-sanitariya xizmatidan foydalanishlari mumkin boʻladi.

Ushbu ovul va mahallalardagi tibbiyot punktlariga 11 nafar oilaviy shifokorlar hamda oʻrta tibbiyot xodimlari biriktirilgan. Ular mazkur hududlarda yashovchi aholi salomatligini asrash yoʻlida mehnat qilishmoqda.

Amudaryo tumanining olis va chekka ovul hamda mahallalariga maxsus konteynerlar oʻrnatilib, mahalla tibbiyot punktlari tashkil etilgani mazkur hududlarda yashovchi 32 mingdan ziyod fuqarolarga oʻz hududlaridagi mahalla tibbiyot punktlarida tashkil etilgan kunduzgi statsionarlar orqali salomatliklarini mustahkamlashlari uchun imkon yaratildi.

Mahalla tibbiyot punktlari ertalabki soat 8:00dan kechqurungi 20:00gacha faoliyat olib boradi. Ayni kunlarda aholi yangidan ish boshlagan mazkur tibbiyot punktlariga kelib, birlamchi tibbiy-sanitariya yordamidan foydalanmoqda. Ayniqsa, Oq oltin va Boʻzyop ovullari, Jumurtov shaharchasiga oʻrnatilgan mahalla tibbiyot punktlari tibbiyot xodimlari xizmatidan aholi juda minnatdor boʻlishmoqda.

Yaqin kunlarda bu yerlarga tashrif buyuruvchilar uchun yanada yaxshi imkoniyatlar yaratiladi. Kutish uchun maxsus joylar, kelish-ketish uchun yoʻlakchalar quriladi. Eng muhimi, chekka hududlar aholisi zarurat tugʻilganida tuman markaziga kelib vaqt ketkazib yurmasdan, ovoragarchiliksiz birlamchi tibbiy xizmatdan foydalanishlari mumkin boʻldi.

Oygul RAJABOVA.