Тумандаги 11 та олис ва чекка овул ҳамда маҳаллаларда тиббиёт пунктлари ташкил этилди

2022 йил 18 март куни Ўзбекистон Республикаси Президентининг соғлиқни сақлаш соҳаси вакиллари билан “Тиббиётдаги ислоҳотлар-инсон қадри учун” мавзусида ўтказган “очиқ мулоқоти”да белгиланган вазифаларни ҳамда Ўзбекистон Республикаси Президентининг “Бирламчи тиббий-санитария ёрдамини аҳолига яқинлаштириш ва тиббий ҳизматлар самарадорлигини ошириш бўйича қўшимча чора-тадбирлар тўғрисида”ги 2022 йил 25 апрель кунги Қарори ижросини таъминлаш мақсадида кўпгина чора-тадбирлар ишлаб чиқилиб, амалга оширилмоқда.

Хусусан, Амударё тумани Тиббиёт бирлашмасига қарашли 9 та оилавий поликлиникалари ва 4 та оилавий шифокорлик пунктларида кундузги стационар ўринлар иш вақти соат 20:00 гача узайтирилди. Шу билан бир қаторда 1-сонли оилавий поликлиникада аввал мавжуд бўлган 8 та кундузги стационар ўринларига қўшимча равишда 2 та кундузги стационар ўринлар ташкил этилиб, жами 10 та кундузги стационар ўринга тўлдирилди. 3-сонли оилавий поликлиникада аввал мавжуд 4 та кундузги стационар ўринларига қўшимча равишда 6 та кундузги стационар ўринлар ташкил этилиб, жами 10 та, 7-сонли оилавий поликлиникасида аввал мавжуд 5 та кундузги стационар ўринларига эса қўшимча равишда 5 та кундузги стационар ўринлар ташкил этилиб, жами 10 та кундузги стационар ўринга тўлдирилди.

Булардан ташқари бирламчи тиббий-санитария ёрдамини аҳолига яқинлаштириш мақсадида тумандаги 11 та олис ва чекка овул ҳамда маҳаллаларга махсус контейнерлар ўрнатилиб, маҳалла тиббиёт пунктлари ташкил этилди.

Эндиликда Амударё туманининг Жумуртов шаҳарчаси ва шаҳарча ҳудудидаги Қоратош аҳоли пункти, Амир Темур ва Бўз ёп овуллари, Юқори қишлоқ, Боғ, Қорамон маҳаллалари, Беш том маҳалласининг Хўжакўл аҳоли пункти, Назархон овули ҳудудидаги Майликўл, Бекбой аҳоли пунктлари, Қум ёп маҳалласининг Жумабой соға аҳоли пунктида яшовчи аҳоли туман марказига келмасдан бирламчи тиббий-санитария хизматидан фойдаланишлари мумкин бўлади.

Ушбу овул ва маҳаллалардаги тиббиёт пунктларига 11 нафар оилавий шифокорлар ҳамда ўрта тиббиёт ходимлари бириктирилган. Улар мазкур ҳудудларда яшовчи аҳоли саломатлигини асраш йўлида меҳнат қилишмоқда.

Амударё туманининг олис ва чекка овул ҳамда маҳаллаларига махсус контейнерлар ўрнатилиб, маҳалла тиббиёт пунктлари ташкил этилгани мазкур ҳудудларда яшовчи 32 мингдан зиёд фуқароларга ўз ҳудудларидаги маҳалла тиббиёт пунктларида ташкил этилган кундузги стационарлар орқали саломатликларини мустаҳкамлашлари учун имкон яратилди.

Маҳалла тиббиёт пунктлари эрталабки соат 8:00дан кечқурунги 20:00гача фаолият олиб боради. Айни кунларда аҳоли янгидан иш бошлаган мазкур тиббиёт пунктларига келиб, бирламчи тиббий-санитария ёрдамидан фойдаланмоқда. Айниқса, Оқ олтин ва Бўзёп овуллари, Жумуртов шаҳарчасига ўрнатилган маҳалла тиббиёт пунктлари тиббиёт ходимлари хизматидан аҳоли жуда миннатдор бўлишмоқда.

Яқин кунларда бу ерларга ташриф буюрувчилар учун янада яхши имкониятлар яратилади. Кутиш учун махсус жойлар, келиш-кетиш учун йўлакчалар қурилади. Энг муҳими, чекка ҳудудлар аҳолиси зарурат туғилганида туман марказига келиб вақт кетказиб юрмасдан, оворагарчиликсиз бирламчи тиббий хизматдан фойдаланишлари мумкин бўлди.

Ойгул РАЖАБОВА.