“SOLIQChI – KOʻMAKChI” TAMOYILI BOʻYIChA TADBIRKORLARGA KOʻMAK BERILMOQDA

“Soliqchi – koʻmakchi” tamoyili doirasida Amudaryo tumanida faoliyat yuritib kelayotgan tadbirkorlik subʼektlarini segmentlash, yaʼni yashil, sariq, qizil toifalarga ajratish orqali koʻmaklashish tizimi yoʻlga qoʻyilgan. Ushbu tizim asosida tuman Davlat Soliq inspektsiyasi xodimlari tomonidan tadbirkorlar bilan joyiga chiqqan holda uchrashuvlar oʻtkazilib, ularni qiynab kelayotgan muammolar oʻrganilmoqda va yechimi izlanmoqda.

Inspektsiya xodimlari tadbirkorlarning faoliyat yuritishdagi dastlabki buxgalteriyasiga koʻmaklashish bilan birga, soliq qarzi toʻgʻrisida maʼlumotlar berib, imtiyozlar va ularni qoʻllash tartibi boʻyicha tushunchalar berishmoqda. Taʼkidlash joizki, boshqa soliq turlaridan ortiqcha toʻlov summasini qaytarish, kredit olishiga koʻmaklashish, yer ajratishga koʻmaklashish va soliq organiga aloqador boshqa bir qancha muammolar yuzasidan joriy yilning oʻtgan ikkinchi choragi mobaynida 390 ta tadbirkorlik subʼektlarining muammolari ijobiy hal qilindi.

Navoiy mahallasida joylashgan kichik sanoat zonasi hududidagi temir eshiklar va temirdan yasalgan boshqa buyumlar ishlab chiqarish faoliyati bilan shugʻullanib kelayotgan “Jumamurod usta” oilaviy korxonasiga ish faoliyatini kengaytirish uchun bank tomonidan 100 mln. soʻm miqdorida kredit ajratilishida amaliy yordam koʻrsatiladi. Natijada hozirgi kunda 5 ta ish oʻrin yaratildi va qoʻshimcha yana yangi ish oʻrinlarini yaratish rejalashtirilmoqda.

Korxona ishchilari bugungi kunda ehtiyojga koʻra temir eshik, darvoza va boshqa roʻzgʻor buyumlarini ishlab chiqarib, aholini taʼminlab kelmoqda. Ular tomonidan tayyorlangan mahsulotlar sifatli va mustahkamligi uchun bozorda juda xaridorgir.

Kichik sanoat zonasi hududidagi yangidan tashkil etilgan “Xolboyev Madrim” masʼuliyati cheklangan jamiyatining tsexida ham arzon va sifatli mebel ishlab chiqarilmoqda. Ushbu tsexda 4 ta doimiy ish oʻrin yaratilgan. Ishchilar tomonidan aholi ehtiyojiga koʻra tayyorlanayotgan turli mebellarning xaridorlari koʻp. Ayniqsa, oshxona jihozlari qulayligi va sifatliligi, narxlari hamyonbopligi bilan hammaga maʼqul kelmoqda. Tsexda xonadonlarda avvaldan foydalanilib kelinayotgan eski, ammo taʼmirlansa, yana ishlatsa boʻladigan mebellar ham yangidek qilib tuzatib berilmoqda.

Masʼuliyati cheklangan jamiyati faoliyatini kengaytirib, tikuvchilik tsexi ochish maqsadi borligini aytgan tadbirkorga soliq organlari xodimlari tomonidan yaqindan yordam koʻrsatilmoqda. Endilikda tikuvchilik tsexi tashkil etilib, hudud aholisiga xizmat koʻrsatishni yoʻlga qoʻyish bilan birga, yangi ish oʻrinlarini yaratish va ayol-qzlar bandligini taʼminlash koʻzda tutilmoqda.

“Soliqchi – koʻmakchi” tamoyiliga koʻra tuman Davlat Soliq inspektsiyasi xodimlarining yordami, koʻmagi bilan faoliyatni yoʻlga qoʻyayotgan va rivojlantirayotgan tadbirkorlar bu kabi gʻamxoʻrliklardan nihoyatda mamnun boʻlishmoqda.

O.Xudoyberganova.