“Yagona maktab formasi – amalda” mavzusida yarmarkalar oʻtkazilmoqda

Amudaryo tumanining Qilichboy ovulidagi 15-sonli umumtaʼlim maktabida ovul faollari, hududdagi maktab oʻqituvchilari va ommaviy axborot vositalari xodimlari ishtirokida “Yagona maktab formasi – amalda” mavzusida yarmarka oʻtkazildi. Unda yagona maktab formasining afzalliklari, ota-onalar uchun ham, maktab oʻquvchilari uchun ham birday qulay va hamyonbop xarid boʻlishi haqida soʻz yuritildi.

Maʼlumki, Oʻzbekiston Respublikasi Vazirlar Mahkamasining 2018-yil 15-avgustdagi 666-sonli Qaroriga muvofiq mamlakatimizdagi barcha umumtaʼlim maktablari oʻquvchilari uchun yagona maktab formasini joriy etish va uni amalga oshirish boʻyicha vazifalar belgilab berildi. Mazkur Qaror ijrosini taʼminlash koronavirus pandemiyasi tufayli maʼlum muddatga kechiktirilib, umumtaʼlim maktablari oʻquvchilari gibrid shakldagi maktab formalaridan foydalanib kelishayotgan edi.

Ayni kunlarda joriy 2022-2023 oʻquv yilidan boshlab Vazirlar Mahkamasining yuqoridagi Qarori rahbarlikka olinib, barcha maktablarning oʻquvchilari “Yagona maktab formasi” bilan qamrab olinishi uchun rejali saʼy-harakatlar boshlab yuborildi.

Qilichboy ovulidagi 15-sonli umumtaʼlim maktabi hududdagi namunali oʻquv maskanlaridan biri sanaladi. 2021-2022 oʻquv yilida mazkur ilm dargohini 50 nafar yosh bitirib, ularning deyarli barchasi oliy taʼlim muassasalariga hujjat topshirishdi.

Ayni paytda maktabda 798 nafar oʻquvchi tahsil olishi uchun barcha sharoitlar yaratilgan. 2022-2023 oʻquv yilidan yagona maktab formasiga oʻtish boʻyicha maktab maʼmuriyati, oʻqituvchilar va ota-onalar ishtirokida tushuntirish-targʻibot ishlari olib borilib, barcha oʻquvchilarning yagona maktab formasi bilan toʻliq taʼminlanishiga zarur imkoniyat yaratish maqsadida “Yagona maktab formasi – amalda” mavzusida tashkil etilgan yarmarkada “Tamara testil” xususiy korxonasi mahsulotlari namoyish etildi.

Yarmarkani maktab direkori J.Ortiqov ochdi va barcha ishtirokchilarga joriy etilayotgan yagona maktab formasining afzalliklari, beriladigan buyurtmalarning “Tamara tekstil” xususiy korxonasi chevarlari tomonidan tez va sifatli, hamyonbop narxlarda tayyorlab berilishi xususida batafsil maʼlumot berdi.

Shundan soʻng, Qilichboy ovul fuqarolar yigʻini raisi Bahrom Qodirov ijtimoiy himoyaga muhtoj, kamxarj oilalarning farzandlariga maktab formasi xarid qilishda fuqarolar yigʻini tomonidan koʻmak berilishini, albatta, har bir oila farzandining oddiy va ixcham kiyinishiga eʼtibor berishi zarurligini taʼkidladi.

Tadbirda soʻzga chiqqanlar yangi 2022-2023 oʻquv yilidan amaliyotga joriy etilayotgan yagona maktab formasi oʻquvchilarning dars paytida diqqatini jamlash, darsga masʼuliyat va qunt bilan yondashish imkoniyatini oshirishi haqida oʻz fikrlarini bildirdilar.

Yarmarka davomida ota-onalar “Tamara tekstil” xususiy korxonasi chevarlari tomonidan tayyorlangan ixcham va bejirim maktab formalarini farzandlari uchun xarid qildilar.

Shuningdek, Amudaryo tumanidagi 6-sonli maktabda ham “Yagona maktab formasi – amalda” mavzusida yarmarka tashkil etildi. Unda 6-sonli maktab oʻqituvchilari, oʻquvchilarning ota-onalari va ommaviy axborot vositalari xodimlari ishtirok etishdi.

Yarmarkada “Tamara tekstil” xususiy korxonasi chevarlari tomonidan tayyorlangan zamon talablariga mos rusumdagi maktab formalari namoyish etildi.

Ota-onalar farzandlari uchun mos bichimdagi maktab formalarini xarid qilishdi. Shuningdek, shu yerning oʻzida “Tamara tekstil” xususiy korxonasi dizayner va chevarlari ota-onalardan yangi buyurtmalar ham qabul qilib oldilar.

Aytish kerakki, umumtaʼlim maktablari oʻquvchilarining nechogʻlik madaniyatliligi uning yurish-turishi, egnidagi libosiga koʻp jihatdan bogʻliq. Chunki toʻgʻri tanlangan libos oʻquvchining nafaqat jismoniy yetukligi, balki xulq-atvori, hatto ilm egallash darajasi haqida ham xulosa chiqarish imkonini beradi. Qolaversa, ixcham, sodda va oddiy, barcha ijtimoiy qatlamlarga ham mos keladigan maktab formasi ota-onalar uchun ham, oilalar iqtisodi uchun ham muhim ahamiyatga ega.

 “Yagona maktab formasi – amalda” yarmarkasi Amudaryo tumanining barcha hududlarida oʻtkazilmoqda. Olis qishloqlardagi ota-onalar uchun qulay va imtiyozli narxlarda xaridni amalga oshirish imkoniyatini yaratish maqsadida tashkil etilayotgan mazkur tadbirdan, albatta, ota-onalar mamnun boʻlishmoqda.

Robiya Yoʻldosheva.