“Ягона мактаб формаси – амалда” мавзусида ярмаркалар ўтказилмоқда

Амударё туманининг Қиличбой овулидаги 15-сонли умумтаълим мактабида овул фаоллари, ҳудуддаги мактаб ўқитувчилари ва оммавий ахборот воситалари ходимлари иштирокида “Ягона мактаб формаси – амалда” мавзусида ярмарка ўтказилди. Унда ягона мактаб формасининг афзалликлари, ота-оналар учун ҳам, мактаб ўқувчилари учун ҳам бирдай қулай ва ҳамёнбоп харид бўлиши ҳақида сўз юритилди.

Маълумки, Ўзбекистон Республикаси Вазирлар Маҳкамасининг 2018 йил 15 августдаги 666-сонли Қарорига мувофиқ мамлакатимиздаги барча умумтаълим мактаблари ўқувчилари учун ягона мактаб формасини жорий этиш ва уни амалга ошириш бўйича вазифалар белгилаб берилди. Мазкур Қарор ижросини таъминлаш коронавирус пандемияси туфайли маълум муддатга кечиктирилиб, умумтаълим мактаблари ўқувчилари гибрид шаклдаги мактаб формаларидан фойдаланиб келишаётган эди.

Айни кунларда жорий 2022-2023 ўқув йилидан бошлаб Вазирлар Маҳкамасининг юқоридаги Қарори раҳбарликка олиниб, барча мактабларнинг ўқувчилари “Ягона мактаб формаси” билан қамраб олиниши учун режали саъй-ҳаракатлар бошлаб юборилди.

Қиличбой овулидаги 15-сонли умумтаълим мактаби ҳудуддаги намунали ўқув масканларидан бири саналади. 2021-2022 ўқув йилида мазкур илм даргоҳини 50 нафар ёш битириб, уларнинг деярли барчаси олий таълим муассасаларига ҳужжат топширишди.

Айни пайтда мактабда 798 нафар ўқувчи таҳсил олиши учун барча шароитлар яратилган. 2022-2023 ўқув йилидан ягона мактаб формасига ўтиш бўйича мактаб маъмурияти, ўқитувчилар ва ота-оналар иштирокида тушунтириш-тарғибот ишлари олиб борилиб, барча ўқувчиларнинг ягона мактаб формаси билан тўлиқ таъминланишига зарур имконият яратиш мақсадида “Ягона мактаб формаси – амалда” мавзусида ташкил этилган ярмаркада “Тамара тестиль” хусусий корхонаси маҳсулотлари намойиш этилди.

Ярмаркани мактаб дирекори Ж.Ортиқов очди ва барча иштирокчиларга жорий этилаётган ягона мактаб формасининг афзалликлари, бериладиган буюртмаларнинг “Тамара текстиль” хусусий корхонаси чеварлари томонидан тез ва сифатли, ҳамёнбоп нархларда тайёрлаб берилиши хусусида батафсил маълумот берди.

Шундан сўнг, Қиличбой овул фуқаролар йиғини раиси Баҳром Қодиров ижтимоий ҳимояга муҳтож, камхарж оилаларнинг фарзандларига мактаб формаси харид қилишда фуқаролар йиғини томонидан кўмак берилишини, албатта, ҳар бир оила фарзандининг оддий ва ихчам кийинишига эътибор бериши зарурлигини таъкидлади.

Тадбирда сўзга чиққанлар янги 2022-2023 ўқув йилидан амалиётга жорий этилаётган ягона мактаб формаси ўқувчиларнинг дарс пайтида диққатини жамлаш, дарсга масъулият ва қунт билан ёндашиш имкониятини ошириши ҳақида ўз фикрларини билдирдилар.

Ярмарка давомида ота-оналар “Тамара текстиль” хусусий корхонаси чеварлари томонидан тайёрланган ихчам ва бежирим мактаб формаларини фарзандлари учун харид қилдилар.

Шунингдек, Амударё туманидаги 6-сонли мактабда ҳам “Ягона мактаб формаси – амалда” мавзусида ярмарка ташкил этилди. Унда 6-сонли мактаб ўқитувчилари, ўқувчиларнинг ота-оналари ва оммавий ахборот воситалари ходимлари иштирок этишди.

Ярмаркада “Тамара текстиль” хусусий корхонаси чеварлари томонидан тайёрланган замон талабларига мос русумдаги мактаб формалари намойиш этилди.

Ота-оналар фарзандлари учун мос бичимдаги мактаб формаларини харид қилишди. Шунингдек, шу ернинг ўзида “Тамара текстиль” хусусий корхонаси дизайнер ва чеварлари ота-оналардан янги буюртмалар ҳам қабул қилиб олдилар.

Айтиш керакки, умумтаълим мактаблари ўқувчиларининг нечоғлик маданиятлилиги унинг юриш-туриши, эгнидаги либосига кўп жиҳатдан боғлиқ. Чунки тўғри танланган либос ўқувчининг нафақат жисмоний етуклиги, балки хулқ-атвори, ҳатто илм эгаллаш даражаси ҳақида ҳам хулоса чиқариш имконини беради. Қолаверса, ихчам, содда ва оддий, барча ижтимоий қатламларга ҳам мос келадиган мактаб формаси ота-оналар учун ҳам, оилалар иқтисоди учун ҳам муҳим аҳамиятга эга.

 “Ягона мактаб формаси – амалда” ярмаркаси Амударё туманининг барча ҳудудларида ўтказилмоқда. Олис қишлоқлардаги ота-оналар учун қулай ва имтиёзли нархларда харидни амалга ошириш имкониятини яратиш мақсадида ташкил этилаётган мазкур тадбирдан, албатта, ота-оналар мамнун бўлишмоқда.

Робия Йўлдошева.