MAHALLA YoShLARINING MASLAHATGOʻYIGA AYLANGAN YeTAKChI

Oʻzbekiston – yoshlar mamlakati. Shu bois, yurtimizda yosh avlod taʼlim-tarbiyasi va kamolotiga alohida eʼtibor qaratilmoqda. Yoshlarning talab va ehtiyojlarini oʻrganish, ularga yangidan-yangi imtiyoz va imkoniyatlar yaratishga ahamiyat berilmoqda.
Fozilbek Qurbonboyev Toʻlqin ovuli yoshlar yetakchisi sifatida bugungi kunda oʻz faoliyatini olib bormoqda. Yoshlar toʻgʻrisidagi zarur maʼlumotlarni “Yoshlar daftari” va “Yoshlar portali” elektron platformalariga kiritib, oʻquvchi-yoshlarning boʻsh vaqtini mazmunli tashkil etish, ularning ijtimoiy faolligini oshirish, iqtidori va isteʼdodini ragʻbatlantirish va shu kabi boshqa maqsadlarda koʻpgina ishlarni amalga oshirmoqda. Shu bilan birga, aholi, ayniqsa, yoshlar orasida tadbirkorlikni targʻib etib, kredit va yordam choralarini jalb qilishda amaliy yordam berib kelmoqda.
Ovulda jami aholi soni 8170 nafardan iborat boʻlsa, shundan 3182 nafari yoshlar hisoblanadi. “Yoshlar daftari” platformasiga 2022-yil yanvar oyidan boshlab, shu kungacha 143 nafar yoshlar yetakchi tavsiyasi bilan kiritildi. Shundan, 135 nafar yoshga platforma orqali dehqon xoʻjaligi yuritish uchun yer uchastkasi berildi va ularning bandligi taʼminlandi. Bundan tashqari, 7 nafar yoshga imtiyozli kredit asosida dehqonchilikda qoʻllaniladigan motokultivatorlar olib berildi. 1 nafar yoshga kredit asosida tikuv mashinasi olib berilib, hozirgi kunda aholiga xizmat koʻrsatish orqali daromad manbaiga ega boʻldi. Uning tashabbusi bilan “Toʻlqin chevarlari” oʻquv-markazi tashkil etilib, hozirda u yerda ovuldagi xotin-qizlar tikuvchilikning sir-asrorlarini oʻrganishmoqda.
“Besh tashabbus olimpiadasi” doirasidagi “Quvnoqlar va zukkolar” koʻrik-tanlovida mahalla yoshlaridan iborat “Yoshlik” jamoasi mahalla, sektor va tuman bosqichlarida mutlaq 1-oʻrinni egallab, hududiy bosqich yoʻllanmasini qoʻlga kiritdi.
Mahalla hududida 3 ta maktab, 2 ta sunʼiy qoplamali sport maydonchasi mavjud boʻlib, undan ovul yoshlari foydalanmoqda.  
Axborot texnologiyalaridan samarali foydalanish maqsadida ovulda “Kompyuter savodxonligi”, “Yosh dasturchi” toʻgaragi tashkil etilib, muntazam dars mashgʻulotlari yoʻlga qoʻyilgan. Mahalla fuqarolar yigʻini binosi yonida yoshlarni kitobxonlikka targʻib qilish maqsadida kutubxona barpo etilib, kitoblar jamlanmasi bilan toʻldirildi. Maʼnaviyat va kitobxonlikni yoshlar ongiga singdirish borasida amalga oshirilgan ishlar natijasini yoshlarning turli tanlovlarda faxrli oʻrinlarni egallaganidan ham bilsak boʻladi. “Besh tashabbus olimpiadasi” doirasidagi “Yosh kitobxon oila”, “Mushoira”, “Zukko kitobxon” tanlovlarining mahalla bosqichlari oʻtkazildi. “Yosh kitobxon oila” tanlovida Sultonovlar oilasi sektor bosqichida 2-oʻrinni qoʻlga kiritdi. “Mushoira” tanlovida Oyjamol Ibragimova tuman bosqichida 2-oʻrin, “Zukko kitobxon” tanlovida mahalla yoshlaridan iborat “Bilimdon” jamoasi faxrli 2-oʻrinni qoʻlga kiritdi. “Zakovat” intellektual oʻyinining sektor bosqichida 2-oʻrin, tuman bosqichida faxrli 3-oʻrinni egallashdi.
Mahallada yoshlar yetakchisi sifatida mehnat faoliyatini olib borayotgan Fozilbek izlanuvchan va tashabbuskor yetakchi sifatida boshqalarga oʻrnak boʻlib kelmoqda. Mahalla yetakchisi yurt ravnaqi, porloq kelajak qurish yoʻlida munosib hissa qoʻshish uchun oʻzining bor kuch-gʻayrat va salohiyatini safarbar qilmoqda.

Sevara ISMOILOVA,
QDU talabasi.